اسٹیل پلانٹ میں زوردار دھماکہ
رانچی: جھارکھنڈ کے ہزاری باغ ضلع کے تحت برہی میں پون پترا اسٹیل اینڈ الائے پلانٹ میں دھماکے میں 7 مزدور بری طرح جھلس گئے۔ ان میں سے کچھ کے ہلاک ہونے کا شبہ ہے، حالانکہ، سرکاری طور پر اس کی تصدیق نہیں ہو سکی ہے۔ چار شدید زخمی مزدوروں کو علاج کے لیے ہزاری باغ کے آروگیم اسپتال میں داخل کرایا گیا ہے۔
بتایا گیا کہ دوپہر 12 بجے کے قریب پلانٹ کی چمنی میں دھماکہ ہوا۔ دھماکہ اتنا زور دار تھا کہ وہاں کام کرنے والے مزدور دور تک ہوا میں اُڑ گئے۔ زخمیوں میں سے 4 لوگوں کو علاج کے لیے ہزاری باغ لایا گیا ہے وہ 80 سے 90 فیصد تک جھلس چکے ہیں۔ اس کا علاج کرنے والے ڈاکٹروں کا کہنا ہے کہ ان کی حالت انتہائی تشویشناک ہے۔ تین دیگر زخمی مزدوروں کے بارے میں فی الحال معلومات نہیں دی گئی ہیں۔
جھارکھنڈ انڈسٹریل ایریا ڈیولپمنٹ اتھارٹی (JIADA) کے ذریعہ برہی میں صنعتی راہداری تیار کی جارہی ہے۔ یہاں کئی صنعتیں لگنے لگی ہیں۔ پون پترا اسٹیل اینڈ الائے کمپنی کا پلانٹ جہاں دھماکہ ہوا تھا، تقریباً دو سال قبل یہاں قائم کیا گیا تھا۔
دھماکے سے فیکٹری کو بھی کافی نقصان پہنچا۔ فی الحال پلانٹ کی جانب سے کوئی باضابطہ اطلاع نہیں دی جا رہی ہے کہ دھماکہ کیسے ہوا۔ واقعہ کی اطلاع ملتے ہی پولیس اور انتظامیہ کے افسران بھی موقع پر پہنچ گئے۔ جھارکھنڈ کے وزیر صحت بننا گپتا اور برہی سے کانگریس ایم ایل اے اوماشنکر اکیلا بھی موقع پر پہنچ گئے ہیں۔
بھارت ایکسپریس۔
