Delhi School Bomb Threat : دہلی کے دو اسکولوں کو بم سے اُڑانے کی دھمکی، سیکورٹی ایجنسیاں الرٹ

دہلی کے دو اسکولوں کو بم سے اُڑانے کی دھمکی موصول ہوئی ہے، اور موقع پر اینٹی بم اسکواڈ پہنچ چکا ہے۔ بتایا جا رہا ہے کہ یہ واقعہ دارالحکومت دہلی کے چانکیہ پوری علاقے کا ہے، جہاں ایک نیوی اسکول کو بم سے اُڑانے کی دھمکی ملی ہے۔ اس کے علاوہ دوارکا میں ایک سی آر پی ایف (CRPF) اسکول کو بھی ایسی ہی دھمکی دی گئی ہے۔ دونوں اسکولوں کو یہ دھمکیاں ای میل کے ذریعے موصول ہوئی ہیں۔

VIDEO | Delhi: Police conduct security check at Chanakyapuri’s Navy Children School after the school received a bomb threat earlier today.

(Full video available on PTI Videos – https://t.co/n147TvrpG7) pic.twitter.com/ic2B0hzcQY

— Press Trust of India (@PTI_News) July 14, 2025

ای میل آتے ہی اسکول انتظامیہ میں کھلبلی مچ گئی، اور فوری طور پر بم اسکواڈ اور پولیس سے رابطہ کیا گیا۔ فی الحال تحقیقات کا آغاز کر دیا گیا ہے اور دونوں اسکولوں کا باریکی سے معائنہ کیا جا رہا ہے۔ خوش آئند بات یہ ہے کہ اب تک تحقیقاتی ٹیم کو دونوں اسکولوں میں کوئی مشتبہ چیز نہیں ملی ہے۔

یہ پہلا موقع نہیں ہے جب دہلی کے اسکولوں کو ایسی دھمکیاں دی گئی ہوں۔ اس سال بھی کئی مواقع پر ایسی دھمکیاں آ چکی ہیں، لیکن ہر بار تحقیقات میں یہ ای میلز جعلی ثابت ہوئی ہیں اور بم والی بات بھی جھوٹی نکلی ہے۔ تفتیش سے معلوم ہوتا ہے کہ کسی اور مقصد کے تحت خوف و ہراس پیدا کرنے کے لیے ایسی حرکت کی جاتی ہے۔

اب اس معاملے میں بھی پولیس تفتیش کر رہی ہے کہ یہ دھمکی کیوں دی گئی، اور کس نے بچوں کو اس طرح ڈرانے کی کوشش کی ہے۔ ویسے اس بار چونکہ دھمکی براہ راست فوج سے وابستہ دونوں اسکولوں کو دی گئی ہے، اس لیے معاملہ اور بھی حساس ہو گیا ہے۔

ابھی تک پولیس نے اس واقعے پر کوئی باضابطہ بیان جاری نہیں کیا ہے، اور اولین ترجیح اسکولوں کی مکمل تلاشی کو دی جا رہی ہے۔ اسکولوں کی باریک بینی سے جانچ جاری ہے۔

بھارت ایکسپریس اردو