بہار میں اسمبلی انتخابات جیسے جیسے قریب آ رہے ہیں، سیاسی سرگرمیاں بھی تیز ہو گئی ہیں۔ اسی سلسلے میں بیگو سرائے میں سابق مرکزی وزیر رام کرپال یادو نے اپوزیشن لیڈر تیجسوی یادو پر براہ راست حملہ کیا۔ انہوں نے کہا: تیجسوی یادو ان دنوں صرف راہل گاندھی کے پیچھے پیچھے تالیاں بجانے کا کام کر رہے ہیں، جس سے ان کی اپنی شبیہہ دھندلی پڑتی جا رہی ہے۔
انہوں نے طنزیہ انداز میں کہا کہ ووٹروں کے حق کی یاترا (Voter Adhikar Yatra) میں بھی یہ واضح طور پر نظر آیا۔ کبھی گاڑی تیجسوی چلا رہے تھے اور راہل گاندھی مزے کر رہے تھے۔
بیگو سرائے میں این ڈی اے کارکن کانفرنس
یہ بیان بیگو سرائے کے کوآپریٹو کالج کے احاطے میں منعقد این ڈی اے کارکن کانفرنس کے دوران دیا گیا۔ اس کا انعقاد مقامی ایم ایل اے کندن کمار نے کیا تھا۔ اس موقع پر بڑی تعداد میں لوگ موجود تھے۔
اسٹیج پر سابق مرکزی وزیر رام کرپال یادو اور بہار کے سڑک تعمیرات کے وزیر نیتن نوین جیسے سینئر لیڈران کی موجودگی نے ماحول کو پرجوش بنا دیا۔ جیسے ہی یہ دونوں لیڈر اسٹیج پر پہنچے، پورا احاطہ “بھارت ماتا کی جے” اور “وندے ماترم” کے نعروں سے گونج اٹھا۔
راہل گاندھی کے گرد ہی گھوم رہی تیجسوی کی سیاست — رام کرپال یادو
رام کرپال یادو نے کہا: لالو پرساد یادو کی سیاست مختلف نوعیت کی تھی۔ اگرچہ انہوں نے کانگریس سے اتحاد ضرور کیا، لیکن کبھی کسی کے پیچھے چلنے کے بجائے برابر کی سطح پر سیاست کی۔
انہوں نے مزید کہا: لالو یادو نے خود کو کبھی کسی لیڈر کا پیروکار نہیں بنایا، جب کہ تیجسوی کی سیاست اب صرف راہل گاندھی کے گرد گھومتی نظر آتی ہے۔
نتیش کمار کی قیادت میں بہار ترقی کر رہا ہے — نیتن نوین
دوسری جانب، بہار کے سڑک تعمیرات کے وزیر نیتن نوین نے اسٹیج سے این ڈی اے حکومت کی کامیابیاں گنوائیں۔ انہوں نے دعویٰ کیا: آج نتیش کمار کی قیادت میں بہار ترقی کی راہ پر گامزن ہے۔ پہلے پٹنہ سے بیگو سرائے جانے میں سات گھنٹے لگتے تھے، اب یہ سفر صرف دو گھنٹوں میں مکمل ہوتا ہے۔ یہی ہے اصلی بدلاؤ اور این ڈی اے کا ترقیاتی ماڈل۔”
انہوں نے مزید کہا کہ: دیہی اور شہری علاقوں میں سڑکوں کا نیٹ ورک تیزی سے پھیل رہا ہے، ریاست میں چار لین سڑکیں بن رہی ہیں اور کئی نئے ایکسپریس ویز بھی تعمیر ہو رہے ہیں۔ اس میں مرکزی حکومت کا بھی اہم کردار ہے۔
کارکنوں سے اتحاد کی اپیل
آخر میں دونوں لیڈروں نے این ڈی اے کارکنان سے اپیل کی کہ وہ ایک جٹ ہو کر آئندہ اسمبلی انتخابات میں این ڈی اے کی فتح کو یقینی بنائیں۔ انہوں نے کہا: بہار کی عوام نے این ڈی اے حکومت میں ترقی کو محسوس کیا ہے، اور اب وقت آ گیا ہے کہ ووٹ کے ذریعے اس ترقی کو مزید مضبوط کیا جائے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
