نئی دہلی:ہندوستان کے بابائے قوم مہاتما گاندھی کی جینتی کے موقع پر راہل گاندھی، اکھلیش یادو، اروند کیجریوال سمیت اپوزیشن کے کئی سرکردہ رہنماؤں نے خراج عقیدت پیش کیا۔ ان رہنماؤں نے گاندھی جی کے سچائی، عدم تشدد، ہم آہنگی اور انسانیت کے نظریات کو یاد کرتے ہوئے ان اصولوں کو اپنانے پر زور دیا۔
راہل گاندھی: نفرت کے مقابل امن، بھائی چارہ اور سچائی کا راستہ
کانگریس کے سینئر رہنما اور لوک سبھا میں قائد حزب اختلاف راہل گاندھی نے سوشل میڈیا پلیٹ فارم ایکس پر ایک تصویر شیئر کرتے ہوئے لکھا: سچائی، عدم تشدد اور ہم آہنگی کے اصولوں سے بھارت کو متحد کرنے والے باپو کے نظریات ہمیں نفرت کے سامنے امن، بھائی چارے، سچائی اور انسانیت کی راہ پر چلنے کی ترغیب دیتے رہیں گے۔ بابائے قوم مہاتما گاندھی کو جینتی کے موقع پر سچے دل سے نمن۔
اکھلیش یادو: آج صرف سچ کا تہوار ہے
سماجوادی پارٹی کے صدر اکھلیش یادو نے گاندھی-شاستری جینتی اور دسہرے کی مبارکباد دیتے ہوئے لکھا:”سچ ایک رخ والا ہوتا ہے اور جھوٹ دس چہروں والا۔ آج سچ کی جیت کا دن ہے اور ان عظیم شخصیات کی جینتی بھی، جنہوں نے سچائی اور سادگی کو ہی اپنی زندگی مانا۔ آج بس سچ کا ہی اتسو (تہوار) ہے۔ دنیا بھر کو دسہرہ اور گاندھی-شاستری جینتی کی دلی مبارکباد۔
کیجریوال: تعلیم، علاج اور بھائی چارے کا بھارت
عام آدمی پارٹی کے قومی کنوینر اور دہلی کے وزیر اعلیٰ اروند کیجریوال نے بھی عوام کو مبارکباد دیتے ہوئے لکھا: گاندھی جی کا خواب تھا ایک ایسا ملک جہاں ہر بچے کو اچھی تعلیم ملے، ہر ضرورت مند کو بہترین علاج حاصل ہو، اور سبھی مذہب و ذات کے لوگ بھائی چارے کے ساتھ رہیں۔ آج ہم ان کی جینتی پر انہیں خراج عقیدت پیش کرتے ہیں اور ان کے خوابوں کا بھارت بنانے کے لیے پرعزم ہیں۔
اشوک گہلوت: گاندھی جی یُگ پرش تھے
راجستھان کے سابق وزیر اعلیٰ اور کانگریس کے سینئر رہنما اشوک گہلوت نے لکھا:”پوری دنیا کو سچ، عدم تشدد اور ستیہ گرہ کا راستہ دکھانے والے بابائے قوم مہاتما گاندھی کو ان کی جینتی پر میرا سچے دل سے نمن۔ گاندھی جی یُگ پرش تھے، جنہوں نے دکھایا کہ سچ اور عدم تشدد کے بل پر آمریت کا خاتمہ ممکن ہے۔ دنیا میں امن صرف گاندھی جی کے اصولوں سے ہی قائم ہو سکتا ہے۔ ہمیں ان کے نظریات کو یاد کر کے اپنی زندگی میں اپنانا چاہیے۔
دیگر اپوزیشن رہنماؤں کی خراج عقیدت
سماجوادی پارٹی کی رکن پارلیمنٹ ڈمپل یادو نے سادہ مگر پراثر پیغام میں لکھا:”بابائے قوم مہاتما گاندھی کی جینتی پر کوٹی کوٹی نمن۔
جموں و کشمیر کے وزیر اعلیٰ عمر عبداللہ نے بھی گاندھی جینتی پر پیغام دیتے ہوئے کہا:”سچ، عدم تشدد، امن اورانسانیت کا گاندھی جی کا لازوال پیغام ہمیشہ یاد رکھا جائے گا۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
