وزیر اعلیٰ عمر عبداللہ۔
کشتواڑ: جموں و کشمیر کے کشتواڑ میں جمعرات کے روز بادل پھٹنے کے واقعے نے ایک ہولناک سانحہ کو جنم دیا۔ وزیر اعلیٰ عمر عبداللہ نے ہفتہ کے روز اس سانحہ سے متاثرہ علاقوں کا دورہ کیا اور متاثرہ خاندانوں سے ملاقات کی۔ انہوں نے اس آفت سے ہونے والے جانی و مالی نقصان پر گہرے دکھ کا اظہار کرتے ہوئے کہا کہ حکومت اس مشکل وقت میں پوری طاقت کے ساتھ عوام کے ساتھ کھڑی ہے۔
ابھی تک لاپتہ ہیں تقریباً 70 سے 80 افراد
میڈیا سے بات کرتے ہوئے سی ایم عمر عبداللہ نے صورتحال کو انتہائی سنگین قرار دیتے ہوئے کہا کہ ہم نے کئی قیمتی جانیں کھو دی ہیں۔ تقریباً 55 افراد ہلاک اور 100 سے زائد زخمی ہیں۔ ان میں سے کچھ شدید زخمیوں کو جموں کے اسپتال منتقل کیا گیا ہے، جہاں ان کا علاج جاری ہے۔ تقریباً 70 سے 80 افراد تاحال لاپتہ ہیں اور ان کا کوئی سراغ نہیں مل سکا ہے۔ یہ تعداد مسلسل بڑھ رہی ہے۔
جنگی پیمانے پر راحت اور بچاؤ کا کام شروع
ان کا مزید کہنا تھا کہ جب وہ متاثرہ علاقوں کا معائنہ کرنے کے بعد واپس آرہے تھے تبھی راستے میں ایک لاش بھی برآمد ہوئی جو بادل پھٹنے سے بہہ گئی۔ وزیراعلیٰ نے کہا کہ انتظامیہ اپنی پوری کوشش کر رہی ہے کہ لاپتہ افراد کو جلد تلاش کیا جائے اور پھر ان کی بحالی کا کام شروع کیا جائے۔ حکومت نے جنگی پیمانے پر راحت اور بچاؤ کا کام شروع کر دیا ہے۔
’’متاثرہ خاندانوں کی ہر ممکن مدد کی جائے گی‘‘
وزیراعلیٰ عمر عبداللہ نے مزید کہا کہ جان کی قیمت کوئی نہیں لگا سکتا لیکن متاثرہ خاندانوں کی ہر ممکن مدد کی جائے گی۔ کئی مکانات کو بھی نقصان پہنچا ہے اور انہیں امداد پہنچانے کا کام بھی جاری ہے۔ نقصان کا مکمل اندازہ فی الحال ممکن نہیں لیکن ہماری ترجیح لوگوں کی جان بچانا ہے۔
کشتواڑ میں بادل پھٹنے کے بعد اچانک آیا سیلاب
آپ کو بتا دیں کہ جمعرات کے روز کشتواڑ کے چشوتی علاقے میں بادل پھٹنے کے بعد اچانک سیلاب آگیا۔ یہ واقعہ اس جگہ پیش آیا جہاں شری مچل یاترا کے لیے چار پہیہ گاڑیاں کھڑی ہوتی ہیں اور کئی عارضی دکانیں لگی ہیں۔ اے ڈی سی کشتواڑ کے مطابق شری مچل یاترا کو اگلے نوٹس تک ملتوی کر دیا گیا ہے۔ مقامی پولیس انتظامیہ کے علاوہ ایس ڈی آر ایف، این ڈی آر ایف اور دیگر ایجنسیاں بڑے پیمانے پر راحت اور بچاؤ کے کاموں میں مصروف ہیں۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
