ہندوستان کے الیکشن کمیشن نے جمعہ کو نائب صدر کے انتخابات کے انعقاد کے لیے ایک ریٹرننگ افسر اور دو اسسٹنٹ ریٹرننگ افسروں کا تقرر کر دیا ہے۔ کمیشن نے کہا کہ اس سلسلے میں مطلوبہ گزٹ نوٹیفکیشن جس میں انتخابات کے شیڈول کی وضاحت کی جائے گی، الگ سے جاری کی جائے گی۔
کمیشن نے ایک سرکاری بیان میں کہا ہے کہ وزارت قانون و انصاف کے ساتھ مشاورت اور راجیہ سبھا کے معزز ڈپٹی چیئرمین کی رضامندی سے، راجیہ سبھا کے سکریٹری جنرل پی سی مودی کو نائب صدر کے انتخاب کے لیے ریٹرننگ آفیسر مقرر کیا ہے۔ وہیں کمیشن نے راجیہ سبھا سکریٹریٹ کی جوائنٹ سکریٹری محترمہ گریما جین اور راجیہ سبھا سکریٹریٹ کے ڈائرکٹر شری وجے کمار کو اسسٹنٹ ریٹرننگ آفیسرز کے طور پر مقرر کیا ہے۔ الیکشن کمیشن نے بیان میں کہا ہے کہ ’’کنونشن کے مطابق سکریٹری جنرل، لوک سبھا یا سکریٹری جنرل، راجیہ سبھا کو روٹیشن کے ذریعہ ریٹرننگ آفیسر کے طور پر مقرر کیا جاتا ہے۔ پچھلے نائب صدر کے انتخاب کے دوران، لوک سبھا کے سکریٹری جنرل کو ریٹرننگ آفیسر کے طور پر مقرر کیا گیا تھا۔‘‘
واضح رہے کہ آرٹیکل 324 کے تحت الیکشن کمیشن آف انڈیا نائب صدر جمہوریہ کا انتخاب کراتا ہے۔ یہ انتخاب صدارتی اور نائب صدارتی انتخابات ایکٹ، 1952 اور ’’صدارتی اور نائب صدارتی انتخابات کے قواعد، 1974‘‘ کے مطابق ہوتا ہے۔ صدارتی اور نائب صدارتی انتخابات ایکٹ، 1952 کے سیکشن 3 کے تحت، الیکشن کمیشن مرکزی حکومت کے ساتھ مشاورت سے، ایک ریٹرننگ افسر کا تقرر کرتا ہے، جس کا دفتر نئی دہلی میں ہوگا، اور وہ ایک یا زیادہ اسسٹنٹ ریٹرننگ افسروں کا تقرر بھی کر سکتا ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
