نئی دہلی: وزیر اعظم نریندر مودی منگل کے روز بھارتیہ جنتا پارٹی (بی جے پی) کے سینئر لیڈر اور دہلی بی جے پی کے پہلے صدر پروفیسر وجے کمار ملہوترا کے گھر پہنچے اور انہیں خراجِ عقیدت پیش کیا۔ وجے کمار ملہوترا کا منگل کی صبح انتقال ہو گیا۔ وزیر اعظم نے غمزدہ خاندان کے ساتھ ہمدردی کا اظہار بھی کیا۔ وزیر اعظم مودی نے وی کے ملہوترا کو یاد کرتے ہوئے کہا کہ دہلی کی ترقی اور ہماری پارٹی کے بہتر حکمرانی کے ایجنڈے کو آگے بڑھانے میں ان کے کردار کو ہمیشہ یاد رکھا جائے گا۔
وزیر اعظم نے سوشل میڈیا پلیٹ فارم ایکس پر تصاویر شیئر کرتے ہوئے لکھا، ’’وی کے ملہوترا کے رہائش گاہ پر جا کر انہیں خراجِ عقیدت پیش کیا۔ ان کے خاندان کے تئیں تعزیت کا اظہار کیا۔ دہلی کی ترقی اور ہماری پارٹی کے بہتر حکمرانی کے ایجنڈے کو آگے بڑھانے میں ان کے کردار کو ہمیشہ یاد رکھا جائے گا۔‘‘
اس سے پہلے وزیر اعظم مودی نے وی کے ملہوترا کے انتقال پر رنج و غم کا اظہار کرتے ہوئے ایکس پر لکھا، ’’وجے کمار ملہوترا نے ایک شاندار لیڈر کے طور پر اپنی پہچان بنائی، انہیں عوامی مسائل کی گہری سمجھ تھی۔ انہوں نے دہلی میں ہماری پارٹی کو مضبوط بنانے میں اہم کردار ادا کیا۔ پارلیمانی امور میں بھی انہیں ان کی خدمات کے لیے یاد کیا جائے گا۔ ان کے انتقال سے دکھ پہنچا ہے۔ ان کے خاندان اور مداحوں کے ساتھ تعزیت۔‘‘
بی جے پی کے سینئر لیڈر وجے کمار ملہوترا، جو دہلی سے 5 مرتبہ رکن پارلیمان اور 2 مرتبہ رکن اسمبلی رہے، منگل کے روز انتقال کر گئے۔ بی جے پی کے بڑے لیڈران میں شمار کیے جانے والے ملہوترا اپنی مضبوط شخصیت کے لیے جانے جاتے تھے۔
ان کی شخصیت کا اندازہ اس بات سے لگایا جا سکتا ہے کہ انہوں نے 1999 کے لوک سبھا انتخابات میں منموہن سنگھ کو (وزیر اعظم بننے سے قبل) بھاری ووٹوں سے شکست دی تھی۔ بھارتی سیاست کے اہم چہروں میں شامل وجے کمار ملہوترا نے 9ویں اور 14ویں لوک سبھا میں دہلی صدر اور جنوبی دہلی کی نمائندگی کی۔
82 برس کی عمر میں بھی، مودی حکومت کی جانب سے کوئی عہدہ نہ دیے جانے کے باوجود، وی کے ملہوترا نے دہلی کے لیے بی جے پی کے انتخابی مہم کے صدر بننے کی پیشکش کی اور تمام 7 نشستوں پر شاندار جیت دلا کر پارٹی کو کامیابی دلائی۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
