دہلی کے تین مندروں پر چلے گا بلڈوزر؟ پوری رات جاری رہا ڈرامہ، سپریم کورٹ سے نہیں ملی راحت

اس معاملے پرسپریم کورٹ نے کہا کہ آپ ہائی کورٹ کیوں نہیں جاتے۔ وکیل وشنوجین نے کہا کہ جہانگیر پوری معاملے میں سپریم کورٹ نے مداخلت کی تھی۔ سپریم کورٹ نے کہا کہ ہائی کورٹ جائیے۔ ساتھ ہی عدالت عظمیٰ نے ان کی عرضی خارج کردی۔ سپریم کورٹ نے اس معاملے میں سماعت سے انکار کردیا ہے اور تینوں مندر کمیٹیوں کو ہائی کورٹ جانے کی چھوٹ دی ہے۔ سپریم کورٹ نے عرضی گزاروں سے کہا کہ آپ نے آرٹیکل 32 کے تحت عرضی کیوں داخل کی ہے۔ سپریم کورٹ نے یہ بھی کہا کہ آپ جتنا ہمیں بتا رہے ہیں، اس معاملے میں بہت کچھ ہے۔

پوری رات ہوئی مخالفت

دہلی ڈیولپمنٹ اتھارٹی (ڈی ڈی اے) کی طرف سے تین مندروں کو توڑے جانے کا نوٹس آنے کے بعد سے ہی مقامی لوگ اس فیصلے سے برہم ہوگئے تھے اوراس کے خلاف احتجاج کررہے تھے۔ مندروں پر کوئی کارروائی نہ کی جائے، اسی لئے پوری رات مندروں میں پوجا کی جارہی تھی۔ جہاں پوری رات اس کی مخالفت کی گئی، وہیں نوٹس جاری ہونے کے اگلی صبح ہی 5 بجے انتظامیہ کے ایک درجن سے زیادہ بلڈوزر مندروں کو منہدم کرنےکے لئے پہنچ گئے۔ انتظامیہ کے بلڈوزر کے پہنچنے کے بعد لوگوں نے جم کرمخالفت کی۔ ہنگامہ اس حدتک بڑھ گیا کہ سنجے جھیل پارک میں مندروں پر بلڈوزر سے ہونے والی کارروائی فی الحال غیرمعینہ وقت کے لئے روک دی گئی ہے۔

بلڈوزر ایکشن پر مقامی لوگوں کا ردعمل

مندر کے خلاف کی جانے والی کارروائی کے بعد سیکٹرکے لوگوں کا ردعمل بھی سامنے آیا ہے۔ ان کا کہنا ہے کہ یہ مندر40 سال پرانی ہیں۔ سبھی مندر رجسٹرڈ ہیں، ہرسال وہاں درگا پوجا ہوتی ہے اور سرسوتی پوجا پروگرام مندروں میں ہوتے آرہے ہیں۔ اسی کے ساتھ سیکٹر کے لوگوں نے یہ بھی سوال اٹھایا کہ نوٹس میں ڈپارٹمنٹ کی مہرکے ساتھ افسر کے دستخط بھی نہیں ہیں، اس سے متعلق بھی سوال اٹھائے گئے۔ جن مندردوں پر کارروائی کی جارہی ہے، ان میں مندر کالی باڑی مندر ہے، دوسرا امرناتھ مندر ہے اور تیسرا بدری ناتھ مندر ہے۔ مندرمیں تقریباً 10 سال سے پوجا کرنے والے پجاری کا کہنا ہے کہ یہاں پر کئی سالوں سے وہ پوجا کرتے آئے ہیں۔ کسی طرح کی کوئی پریشانی نہیں ہے۔