جھارکھنڈ میں JPSC امتحان میں مبینہ دھاندلی کو لے کر طلبہ کا غصہ کم ہونے کا نام نہیں لے رہا ہے۔ احتجاج کے 19ویں روز پولیس کے لاٹھی چارج، طلبہ کی خاموش ریلی اور مظاہرین کے پنڈال کی بجلی کاٹ دیے جانے سے ماحول مکمل طور پر کشیدہ ہوگیا ہے۔ اسی دوران ریاستی حکومت میں کانگریس کوٹے کے چار بڑے وزرا نے ایک ساتھ محاذ کھول دیا ہے۔ انہوں نے براہ راست بھارتیہ جنتا پارٹی (BJP) پر طلبہ کو اکسانے اور سیاسی فائدہ اٹھانے کا سنگین الزام عائد کیا ہے۔
3 گھنٹے کی بحث سے بھاگی BJP
سینئر وزیر اور وزیر خزانہ رادھا کرشن کشور نے بی جے پی پر گہری سازش رچنے کا الزام لگایا۔ انہوں نے انکشاف کیا کہ بزنس ایڈوائزری کمیٹی کی میٹنگ میں طے کیا گیا تھا کہ 10 اگست کو ایوان میں طلبہ کے مسئلے پر 3 گھنٹے تک خصوصی بحث ہوگی۔ لیکن بی جے پی کے ارکان اسمبلی بحث سے دور رہے اور اسی روز وزیر اعلیٰ کی رہائش گاہ کا گھیراؤ کرنے کی سازش رچی۔کشور نے کہا کہ بی جے پی دراصل بحث چاہتی ہی نہیں ہے، اس کا مقصد صرف احتجاج کو بھڑکانا ہے۔
راہل گاندھی پر الزام، کانگریس کا پلٹ وار
بی جے پی کے ریاستی صدر آدتیہ ساہو نے الزام عائد کیا تھا کہ یہ سب کچھ راہل گاندھی کے اشارے پر ہو رہا ہے۔ اس پر پلٹ وار کرتے ہوئے وزیر زراعت نیہا شلپی ٹرکی نے کہا کہ یہ الزام جھوٹ کو بھی شرمندہ کرنے والا ہے۔ انہوں نے واضح کیا کہ واقعے کے فوراً بعد راہل گاندھی نے پولیس کارروائی کی مذمت کی تھی۔وہیں وزیر صحت ڈاکٹر عرفان انصاری نے بھی اپنے جارحانہ انداز میں بی جے پی کو کٹہرے میں کھڑا کیا اور احتجاج کو بھڑکانے والوں کو سخت وارننگ دی۔
ٹی ڈی پی ایل کو بچانے کے لیے CBI تحقیقات کا مطالبہ؟
پورے تنازع میں سب سے بڑا اور چونکا دینے والا بیان دیہی ترقی کی وزیر دیپیکا پانڈے نے دیا۔ بی جے پی کی جانب سے JPSC معاملے کی CBI تحقیقات کے مطالبے پر جواب دیتے ہوئے انہوں نے کہا کہ ریاست کی CID بہترین کام کر رہی ہے اور ہر روز امتحانی ایجنسی TDPL کی نئی بے ضابطگیوں کو بے نقاب کر رہی ہے۔ دیپیکا پانڈے نے واضح طور پر کہا کہ بی جے پی CBI تحقیقات کا مطالبہ اس لیے کر رہی ہے تاکہ TDPL کو بچایا جا سکے۔ انہوں نے کہا کہ ماضی میں بھی CBI نے کئی گھوٹالوں کی تحقیقات اپنے ہاتھ میں لی ہیں، لیکن ان میں سے کئی معاملات میں آج تک کوئی پیش رفت نہیں ہوئی۔اس چاروں طرف سے ہونے والی سیاسی بیان بازی کے بعد جھارکھنڈ کی سیاست مزید گرم ہوگئی ہے اور طلبہ کا احتجاج اب ایک بڑی سیاسی لڑائی میں تبدیل ہوتا دکھائی دے رہا ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
