Shahid Siddiqui returns to SP: شاہد صدیقی کی ہوئی گھر واپسی،اکھلیش یادو کی موجودگی میں سماجوادی پارٹی کا تھاما دامن

مشہور صحافی اور سینئر سیاسی رہنما شاہد صدیقی ایک بار پھر سماجوادی پارٹی کا حصہ بن گئے ہیں ۔ آج انہوں نے یوپی کے مظفرنگر میں سماجوادی پارٹی کے چیف اکھلیش یادو کی موجودگی میں سماجوادی پارٹی کی دوبارہ رکنیت حاصل کی اور اس موقع سے ان کے حامیوں کی ایک بڑی تعداد نے بھی سماجوادی پارٹی کا دامن تھاما۔ آر ایل ڈی سے استعفیٰ دے کر سماجوادی پارٹی میں گھر واپسی کرنے والے شاہد صدیقی کو لیکر یہ بھی قیاس لگایا جارہا تھا کہ وہ کانگریس کا دامن تھام سکتے ہیں لیکن اب یہ صاف ہوگیا ہے کہ شاہد صدیقی نے سماجوادی پارٹی میں گھر واپسی کرلی ہے۔

आज मुज़फ़्फ़रनगर मैं अपने हज़ारों साथियों के साथ अपनी पुरानी पार्टी समाजवादी मैं वापसी की। संविधान और लोकतंत्र विरोधी शक्तियों को प्राजित करने के लिए इंडिया अलायन्स को मज़बूत करने का फ़ैसला किया । ग़रीब मज़दूर किसान अल्पसंखियक का एक ही नेता श्री @yadavakhilesh जी। pic.twitter.com/EPuneAfT13

— shahid siddiqui (@shahid_siddiqui) April 15, 2024

یاد رہے کہ آر ایل ڈی کے سابق قومی نائب صدر شاہد صدیقی نے یکم اپریل کو پارٹی سے استعفیٰ دے دیا تھا۔ انہوں نے اپنا استعفی جینت چودھری کو بھیج دیاتھا۔ انہوں نے یہ معلومات سوشل میڈیا کے ایکس پلیٹ فارم پر پوسٹ کی تھیں۔ انہوں نے اپنی سوشل میڈیا پوسٹ میں لکھاتھا کہ ، ‘کل میں نے راشٹریہ لوک دل کی رکنیت اور قومی نائب صدر کے عہدے سے اپنا استعفیٰ قومی صدر جینت سنگھ کو بھیج دیا ہے۔

انہوں نے اپنی پوسٹ میں مزید لکھاتھا، ‘آج جب ہندوستان کا آئین اور جمہوری ڈھانچہ خطرے میں ہے، خاموش رہنا گناہ ہے۔ میں جینت جی کا شکر گزار ہوں لیکن بھاری دل کے ساتھ میں خود کو آر ایل ڈی سے دور کرنے پر مجبور ہوں۔ ہندوستان کا اتحاد، سالمیت، ترقی اور بھائی چارہ سب کو عزیز ہے۔ اسے بچانا ہر شہری کی ذمہ داری اور فرض ہے۔سابق آر ایل ڈی لیڈر نے ایک اور پوسٹ میں لکھاتھا، ‘میں نے اپنا استعفیٰ راشٹریہ لوک دل کے صدر جینت چودھری کو بھیج دیا ہے۔ میں خاموشی سے ملک کے جمہوری ڈھانچے کو ختم ہوتے نہیں دیکھ سکتا۔ میں جینت سنگھ جی اور آر ایل ڈی میں اپنے ساتھیوں کا شکر گزار ہوں۔ شکریہ۔

بھارت ایکسپریس۔