مہاراشٹر میں ایڈوکیٹ آرتی ساٹھے کی بمبئی ہائی کورٹ کے جج کے طور پر تقرری نے تنازعہ کو جنم دیا ہے، کیوں کہ یہ بات سامنے آئی کہ وہ مہاراشٹر بی جے پی کی سرکاری ترجمان کے طور پر خدمات انجام دے رہی ہیں۔ واضح رہے کہ سپریم کورٹ نے 28 جولائی 2025 کو ہونے والی اپنی میٹنگ میں اجیت بھگوان راؤ کڈیتھانکر، آرتی ارون ساٹھے اور سشیل منوہر گھوڈیشور کی بمبئی ہائی کورٹ کے ججوں کے طور پر تقرری کی تجویز کو منظوری دی۔ تاہم بمبئی ہائی کورٹ کے جج کے طور پر ساٹھے کی تقرری نے مہاراشٹر میں سیاسی ہنگامہ برپا کر دیا ہے، جہاں حزب اختلاف نے سخت اعتراض کرتے ہوئے مطالبہ کیا ہے کہ ہندوستانی عدالتی نظام میں انصاف اور غیر جانبداری کو برقرار رکھنے کے لیے ان کی تقرری کو روکا جائے۔
ایم ایل اے روہت پوار نے اٹھائے سوال
ایم ایل اے اور این سی پی (ایس پی) کے جنرل سکریٹری روہت پوار نے مہاراشٹر بی جے پی کے لیٹر ہیڈ پر مہاراشٹر بی جے پی کے ترجمان کے طور پر آرتی ساٹھے کی تقرری کا اسکرین شاٹ پوسٹ کرتے ہوئے کہا کہ عوامی پلیٹ فارم سے حکمران پارٹی کی وکالت کرنے والے شخص کی بطور جج تقرری جمہوریت کے لیے سب سے بڑا دھچکا ہے۔ روہت پوار نے مزید کہا کہ اس طرح کی تقرریوں کے ہندوستانی عدالتی نظام کی غیر جانبداری پر دور رس نتائج مرتب ہوں گے۔
روہت پوار نے پوچھا کہ ’’محض جج بننے کی اہلیت کا حامل ہونے پر سیاسی طور پر وابستہ افراد کو براہ راست جج مقرر کرنا – کیا یہ عدلیہ کو سیاسی میدان میں تبدیل کرنے کے مترادف نہیں؟‘‘ پوار نے مزید کہا کہ اختیارات کی علیحدگی کا اصول آئین میں درج ہے تاکہ اس بات کو یقینی بنایا جا سکے کہ کسی کے پاس بھی غیر چیک شدہ طاقت نہ رہے اور چیک اینڈ بیلنس کو برقرار رکھا جائے۔
सार्वजनिक व्यासपीठावरून सत्ताधारी पक्षाची बाजू मांडणाऱ्या व्यक्तीची न्यायाधीश म्हणून नेमणूक होणं म्हणजे लोकशाहीवर केलेला सर्वांत मोठा आघात आहे. याचा भारतीय न्याय व्यवस्थेच्या निःपक्षपणावर दूरगामी परिणाम होईल. केवळ न्यायाधीश होण्याची पात्रता आहे म्हणून थेट राजकीय व्यक्तींना… pic.twitter.com/d3w2rIHNK2
— Rohit Pawar (@RRPSpeaks) August 5, 2025
انھوں نے پوچھا کہ ایسی صورت حال میں ’’کیا سیاسی ترجمان کی بطور جج تقرری اختیارات کی علیحدگی کے اصول کو مجروح نہیں کرتی اور توسیع کے ذریعے آئین کو توڑنے کی کوشش نہیں کرتی؟‘‘ انھوں نے مزید کہا کہ ’’جب ہائی کورٹ میں جج کے طور پر تعینات ہونے والا شخص سیاسی پس منظر رکھتا ہو اور حکمران جماعت میں کسی عہدے پر فائز ہو، تو کون ضمانت دے سکتا ہے کہ انصاف کی فراہمی کا عمل سیاسی تعصب سے داغدار نہیں ہو گا۔ کیا کسی ایک سیاسی شخصیت کی تقرری انصاف کی فراہمی کے پورے عمل پر سوال نہیں اٹھاتی؟‘‘
روہت پوار نے مزید کہا کہ مقرر کردہ شخص کی اہلیت پر کوئی اعتراض نہیں ہے، لیکن ایسے شخص کی تقرری عام شہریوں کے اس جذبات پر ضرب لگاتی ہے کہ انصاف کسی تعصب کے بغیر فراہم کیا جاتا ہے۔ انھوں نے حکومت سے آرتی ساٹھے کی بامبے ہائی کورٹ کے جج کے طور پر تقرری پر دوبارہ غور کرنے کو کہا۔
بی جے پی نے کہا-وہ پہلے ہی دے چکی ہیں استعفیٰ
دوسری جانب مہاراشٹر بی جے پی میڈیا سیل کے انچارج نوناتھ بنگ نے کہا کہ یہ درست ہے کہ محترمہ آرتی ساٹھے مہاراشٹر بی جے پی کی ترجمان تھیں، لیکن بمبئی ہائی کورٹ کے جج کے طور پر ان کی تقرری سے پہلے ہی وہ پارٹی ترجمان کے طور پر اپنا استعفیٰ پیش کر چکی ہیں اور ان کی تقرری میں کوئی مسئلہ نہیں ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
