روسی صدر ولادیمیر پوتن نے پیر کے روز ہندوستانی وزیر اعظم نریندر مودی کو ذاتی طور پر فون کیا اور 22 اپریل کو پہلگام میں ہونے والے وحشیانہ دہشت گردانہ حملے کی سخت مذمت کی۔ فون پر بات چیت کے دوران صدر پوتن نے معصوم جانوں کی ہلاکت پر دلی تعزیت کا اظہار کیا اور دہشت گردی کے خلاف جنگ میں ہندوستان کی مکمل حمایت کا اعلان کیا۔ ہندوستانی وزارت خارجہ (MEA) کے ترجمان رندھیر جیسوال نے اس پیش رفت کی اطلاع دیتے ہوئے کہا کہ صدر پوتن نے اس گھناؤنے حملے کے مرتکب افراد اور ان کے حامیوں کو انصاف کے کٹہرے میں لانے کی ضرورت پر زور دیا۔
اسٹریٹجک پارٹنرشپ کو مضبوط بنانے پر بھی ہوئی بات چیت
پہلگام دہشت گردانہ حملے سے نمٹنے کے علاوہ دونوں لیڈروں نے ہندوستان-روس خصوصی اور مراعات یافتہ اسٹریٹجک پارٹنرشپ کو مزید مضبوط بنانے کے اپنے مشترکہ عزم کا اعادہ کیا۔ وزیر اعظم مودی نے صدر پوتن کو ’’وکٹری ڈے‘‘ (یومِ فتح) کی 80 ویں سالگرہ پر مبارکباد دی اور انھیں اس سال کے آخر میں ہندوستان میں ہونے والی آئندہ سالانہ ہندوستان-روس چوٹی کانفرنس میں شرکت کی دعوت دی۔
President Putin @KremlinRussia_E called PM @narendramodi and strongly condemned the terror attack in Pahalgam, India. He conveyed deepest condolences on the loss of innocent lives and expressed full support to India in the fight against terrorism. He emphasised that the…
— Randhir Jaiswal (@MEAIndia) May 5, 2025
واضح رہے کہ صدر پوتن نے وزیر اعظم مودی کو روس کے وکٹری ڈے کی تقریب میں شرکت کے لیے مدعو کیا تھا، لیکن وزیر اعظم مودی نے پہلگام دہشت گردانہ حملے کے بعد فی الحال روس کا سفر نہ کرنے کا انتخاب کیا ہے۔ حملے کے دن صدر پوتن نے پہلے ہی صدر دروپدی مرمو اور وزیر اعظم مودی دونوں کو تعزیت کے رسمی پیغامات بھیجے تھے۔
دونوں ممالک کے وزرائے خارجہ نے بھی کی ہے بات
دریں اثنا سفارتی رفتار کو مزید تقویت دیتے ہوئے روسی وزیر خارجہ سرگئی لاوروف نے 2 مئی کو ہندوستانی وزیر خارجہ ایس جے شنکر کے ساتھ فون پر بات چیت کی۔ انھوں نے نئی دہلی اور ماسکو کے درمیان وسیع تر تعاون کے ساتھ ساتھ پہلگام حملے کے بعد ہندوستان اور پاکستان کے درمیان بگڑتی ہوئی صورت حال پر تبادلۂ خیال کیا۔ لاوروف نے ہندوستان اور پاکستان پر زور دیا کہ وہ اپنے اختلافات کو سیاسی اور سفارتی ذرائع سے حل کریں، جو کہ 1972 کے شملہ معاہدے اور 1999 کے لاہور اعلامیے کے مطابق ہو۔ وہیں صدر پوتن 2026 کے اوائل میں ہندوستان کا دورہ کرنے کا ارادہ رکھتے ہیں۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
