وزیر اعظم مودی نے ٹیرف میں کمی کے لیے امریکی صدر ٹرمپ کا شکریہ ادا کیا۔
نئی دہلی: امریکی صدر ڈونالڈ ٹرمپ نے بھارت پر عائد ٹیرف کو 25 فیصد سے کم کرکے 18 فیصد کر دیا ہے۔ اس بات کی جانکاری صدر ٹرمپ نے اپنے سوشل میڈیا پلیٹ فارم ’ٹروتھ سوشل‘ پر ایک پوسٹ کے ذریعے دی۔ وزیر اعظم نریندر مودی نے امریکہ کے اس اقدام کا خیر مقدم کیا ہے۔
وزیر اعظم مودی نے سوشل میڈیا پلیٹ فارم ’ایکس‘ پر لکھا کہ آج اپنے عزیز دوست صدر ٹرمپ سے بات کر کے بہت خوشی ہوئی۔ یہ جان کر بے حد خوشی ہوئی کہ اب ’میڈ اِن انڈیا‘ مصنوعات پر ٹیرف کم ہو کر 18 فیصد رہ جائے گا۔ اس شاندار اعلان پر بھارت کی 140 کروڑ آبادی کی جانب سے صدر ٹرمپ کا تہہ دل سے شکریہ۔‘‘ انہوں نے کہا کہ جب دنیا کی دو بڑی معیشتیں اور سب سے بڑی جمہوریتیں مل کر کام کرتی ہیں تو اس سے عوام کو فائدہ پہنچتا ہے اور باہمی مفاد پر مبنی تعاون کے وسیع مواقع پیدا ہوتے ہیں۔
Wonderful to speak with my dear friend President Trump today. Delighted that Made in India products will now have a reduced tariff of 18%. Big thanks to President Trump on behalf of the 1.4 billion people of India for this wonderful announcement.
When two large economies and the…
— Narendra Modi (@narendramodi) February 2, 2026
وزیر اعظم مودی نے مزید کہا کہ عالمی امن، استحکام اور خوشحالی کے لیے صدر ٹرمپ کی قیادت نہایت اہم ہے۔ بھارت امن کے لیے ان کی کوششوں کی مکمل حمایت کرتا ہے۔ میں ان کے ساتھ مل کر کام کرنے اور ہماری شراکت داری کو بے مثال بلندیوں تک لے جانے کے لیے پُرعزم ہوں۔
اس سے پہلے امریکی صدر ڈونالڈ ٹرمپ نے وزیر اعظم نریندر مودی سے ٹیلی فون پر گفتگو کی تھی۔ اس بات چیت کے دوران دونوں لیڈران کے درمیان کئی اہم امور پر تبادلۂ خیال ہوا، جن میں تجارت سمیت دیگر موضوعات شامل تھے۔ اس کی جانکاری بھارت میں امریکی سفیر سرجیو گور نے دی۔
اس دوران صدر ڈونالڈ ٹرمپ نے اپنے سوشل میڈیا پلیٹ فارم ’ٹروتھ سوشل‘ پر وزیر اعظم مودی سے ہونے والی گفتگو کے حوالے سے ایک تفصیلی بیان جاری کیا۔ ٹرمپ نے لکھا، ’’آج صبح بھارت کے وزیر اعظم مودی سے بات کرنا میرے لیے باعثِ اعزاز تھا۔ وہ میرے بہترین دوستوں میں سے ایک ہیں اور اپنے ملک کے ایک طاقتور اور معزز لیڈر ہیں۔”
ٹرمپ کے مطابق، دونوں لیڈران کے درمیان تجارت اور روس-یوکرین جنگ کے خاتمے جیسے کئی اہم مسائل پر گفتگو ہوئی۔ انہوں نے دعویٰ کیا کہ وزیر اعظم مودی نے روس سے تیل کی خریداری بند کرنے اور امریکہ اور ممکنہ طور پر وینزویلا سے زیادہ تیل خریدنے پر رضامندی ظاہر کی ہے۔ ٹرمپ نے کہا کہ اس اقدام سے یوکرین میں جاری جنگ کو ختم کرنے میں مدد ملے گی، جہاں ہر ہفتے ہزاروں افراد ہلاک ہو رہے ہیں۔
بھارت اور امریکہ کے درمیان تجارتی معاہدے پر اتفاق
صدر ٹرمپ نے یہ بھی دعویٰ کیا کہ وزیر اعظم مودی کی درخواست اور باہمی دوستی کے تحت بھارت اور امریکہ کے درمیان ایک تجارتی معاہدے پر اتفاق ہو گیا ہے۔ اس معاہدے کے تحت امریکہ بھارت پر عائد باہمی ٹیرف کو 25 فیصد سے کم کرکے 18 فیصد کر دے گا، جبکہ بھارت امریکہ کے خلاف اپنے ٹیرف اور غیر ٹیرف رکاوٹوں کو صفر کی سطح تک لانے کی سمت میں پیش رفت کرے گا۔
امریکہ سے بڑے پیمانے پر خریداری کا کیا گیا وعدہ
ٹرمپ کے مطابق، وزیر اعظم مودی نے ’بائے امریکن‘ پالیسی کے تحت امریکہ سے بڑے پیمانے پر خریداری کا بھی وعدہ کیا ہے، جس میں 500 ارب ڈالر سے زائد مالیت کی امریکی توانائی، ٹیکنالوجی، زراعت، کوئلہ اور دیگر مصنوعات شامل ہوں گی۔ ٹرمپ نے کہا کہ بھارت-امریکہ تعلقات آئندہ وقت میں مزید مضبوط ہوں گے اور دونوں لیڈر ایسے ہیں “جو باتوں کے بجائے عمل پر یقین رکھتے ہیں۔”
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
