اندور میں آلودہ پانی پینے سے کئی افراد کی موت کے معاملے پر لوک سبھا میں قائد حزب اختلاف راہل گاندھی نے بی جے پی اور مدھیہ پردیش کی حکومت کو سخت تنقید کا نشانہ بنایا ہے۔ انہوں نے جمعہ 2 جنوری 2025 کو کہا کہ بی جے پی کے زیر اقتدار مدھیہ پردیش بدانتظامی کا مرکز بن چکا ہے اور غریبوں کی جان جانے پر وزیر اعظم نریندر مودی ہمیشہ کی طرح خاموش ہیں۔ راہل گاندھی نے الزام لگایا کہ حقِ حیات کی خلاف ورزی کے لیے بی جے پی کا ڈبل انجن مکمل طور پر ذمہ دار ہے۔راہل گاندھی نے سوشل میڈیا پلیٹ فارم ایکس پر پوسٹ کرتے ہوئے کہا کہ اندور میں پانی نہیں بلکہ زہر تقسیم کیا گیا اور انتظامیہ گہری نیند میں رہی۔ ان کے مطابق گھروں میں ماتم کا ماحول ہے، غریب بے بس ہیں اور اس کے اوپر بی جے پی رہنماؤں کے تکبر بھرے بیانات سامنے آئے۔ جن خاندانوں کے گھروں کے چولہے بجھ گئے تھے، انہیں تسلی کی ضرورت تھی مگر حکومت نے غرور پیش کیا۔ انہوں نے سوال اٹھایا کہ جب لوگ بار بار گندے اور بدبودار پانی کی شکایت کر رہے تھے تو ان کی بات کیوں نہیں سنی گئی۔
इंदौर में पानी नहीं, ज़हर बंटा और प्रशासन कुंभकर्णी नींद में रहा।
घर-घर मातम है, गरीब बेबस हैं – और ऊपर से BJP नेताओं के अहंकारी बयान। जिनके घरों में चूल्हा बुझा है, उन्हें सांत्वना चाहिए थी; सरकार ने घमंड परोस दिया।
लोगों ने बार-बार गंदे, बदबूदार पानी की शिकायत की – फिर भी…
— Rahul Gandhi (@RahulGandhi) January 2, 2026
قائد حزب اختلاف نے مزید کہا کہ سیور کا پانی پینے کے پانی میں کیسے شامل ہوا، وقت پر سپلائی بند کیوں نہیں کی گئی اور ذمہ دار افسران و رہنماؤں کے خلاف کارروائی کب ہوگی۔ ان کے مطابق یہ محض سوال نہیں بلکہ جواب دہی کا مطالبہ ہے۔ صاف پانی کوئی احسان نہیں بلکہ زندگی کا بنیادی حق ہے، اور اس حق کی پامالی کے لیے بی جے پی کا ڈبل انجن، اس کی لاپرواہ انتظامیہ اور غیر حساس قیادت پوری طرح ذمہ دار ہیں۔
راہل گاندھی نے یہ بھی الزام لگایا کہ مدھیہ پردیش اب بدانتظامی کا گڑھ بن چکا ہے۔ کہیں کھانسی کی شربت سے اموات ہو رہی ہیں، کہیں سرکاری اسپتال میں بچوں کی جان لینے والے چوہے ہیں اور اب سیور ملا پانی پینے سے لوگ جان گنوا رہے ہیں۔ انہوں نے کہا کہ جب بھی غریب مرتے ہیں، وزیر اعظم مودی ہمیشہ کی طرح خاموش رہتے ہیں۔دوسری جانب اندور کے میئر پش یمتر بھارگو نے جمعہ کو بتایا کہ بھاگیرتھ پورہ علاقے میں آلودہ پانی پینے سے پھیلے الٹی دست کے مرض کے باعث 10 افراد کی موت کی اطلاع ملی ہے۔ مقامی شہریوں کا دعویٰ ہے کہ اس وبا سے چھ ماہ کے بچے سمیت 14 افراد کی جان گئی ہے، تاہم محکمہ صحت نے اس دعوے کی تصدیق نہیں کی ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
