PM Modi Gujarat Visit: جام نگر سے وزیر اعظم مودی کے دو روزہ دورے کا آغاز، سومناتھ اور وڈودرا میں متعدد پروگراموں میں ہوں گے شریک

نئی دہلی : وزیراعظم نریندر مودی نے اپنے دو روزہ دورۂ گجرات کا آغاز اتوار کی رات جام نگر پہنچ کر کیا۔ اس دورے کے دوران وہ سومناتھ، گر سومناتھ اور وڈودرا میں کئی مذہبی، سماجی اور انتظامی پروگراموں میں شرکت کریں گے۔ وزیر اعظم کے دورے کے پیش نظر جام نگر، سومناتھ اور وڈودرا میں سخت حفاظتی انتظامات کیے گئے ہیں، جب کہ ان کے استقبال کے لیے خصوصی تقریبات کا بھی اہتمام کیا گیا ہے۔وزیر اعظم   مودی پیر کی صبح تاریخی سومناتھ مندر میں خصوصی پوجا اور مذہبی رسومات میں شرکت کریں گے۔ وزیر اعظم کے دفتر  (پی ایم او)کے مطابق وہ ’سومناتھ امرت مہوتسو‘ میں شامل ہوں گے، جو مندر کی تعمیر نو اور افتتاح کے 75 سال مکمل ہونے کے موقع پر منعقد کیا جا رہا ہے۔ اس موقع پر وزیر اعظم ’مہا پوجا‘، ’کمبھابھیشیک‘ اور ’دھوجا روہن‘ جیسی اہم رسومات ادا کریں گے۔ اس کے علاوہ وہ ایک یادگاری ڈاک ٹکٹ اور خصوصی سکہ بھی جاری کریں گے، جسے اس تاریخی تقریب کی یادگار کے طور پر دیکھا جا رہا ہے۔سومناتھ مندر ہندو عقیدت مندوں کے لیے خاص اہمیت رکھتا ہے اور وزیر اعظم مودی کا یہ دورہ مذہبی اور ثقافتی اعتبار سے کافی اہم مانا جا رہا ہے۔ مقامی انتظامیہ نے ہزاروں عقیدت مندوں اور بی جے پی کارکنان کی موجودگی کے پیش نظر سکیورٹی کے خصوصی انتظامات کیے ہیں۔

اس کے بعد وزیر اعظم مودی  وڈودرا روانہ ہوں گے، جہاں ان کے اعزاز میں ایک  روڈ شو کا اہتمام کیا گیا ہے۔ گجرات اور مغربی بنگال کے بلدیاتی انتخابات میں بھارتیہ جنتا پارٹی کی حالیہ کامیابی کے بعد اس پروگرام کو سیاسی اعتبار سے بھی اہم سمجھا جا رہا ہے۔ حکام کے مطابق بڑی تعداد میں عوام اور پارٹی کارکنان وزیر اعظم کے استقبال کے لیے سڑکوں پر موجود رہیں گے۔گجرات کے نائب وزیر اعلیٰ ہرش سنگھوی نے کہا ہے کہ ریاست بھر کے لوگ وزیر اعظم کے دورے کو لے کر بے حد پُرجوش ہیں اور مختلف شہروں میں ان کے استقبال کی تیاریاں مکمل کر لی گئی ہیں۔وزیر اعظم مودی  وڈودرا میں ’سردار دھام بھون-3‘ کا افتتاح بھی کریں گے، جسے ’شری دشینت اور دکشا پٹیل کمپلیکس‘ کے نام سے جانا جاتا ہے۔ تقریباً 150 کروڑ روپے کی لاگت سے تعمیر کیا گیا یہ جدید کمپلیکس نیشنل ہائی وے 8 اے پر واگھوڈیا کراسنگ کے قریب واقع ہے۔

تقریباً 4.75 لاکھ مربع فٹ رقبے پر پھیلے اس کمپلیکس میں 278 رہائشی کمرے، این آر آئی گیسٹ ہاؤس، ای-لائبریری، کیریئر گائیڈنس سینٹر، ٹریننگ سینٹر اور ایک ہزار افراد کی گنجائش والا ہال شامل ہے۔اسی تقریب کے دوران پٹیدار برادری کی اہم تنظیموں کی جانب سے وزیر اعظم نریندر مودی کو سماجی اصلاحات میں ان کے کردار کے اعتراف میں ’سردار رتن‘ ایوارڈ سے بھی نوازا جائے گا۔ اس پروگرام میں وزیر اعلیٰ بھوپیندر پٹیل، نائب وزرائے اعلیٰ، ریاستی کابینہ کے اراکین اور مختلف شعبوں سے تعلق رکھنے والی شخصیات کی شرکت متوقع ہے۔

بھارت ایکسپریس اردو