پارلیمنٹ کے مانسون اجلاس کا آغاز 21 جولائی سے ہو رہا ہے، جو 18ویں لوک سبھا کے پانچویں اجلاس کا پہلا دن ہوگا۔ اس اجلاس کے آغاز سے قبل وزیر اعظم نریندر مودی صحافیوں سے خطاب کریں گے۔ سرکاری بیان کے مطابق وہ تسلیم شدہ میڈیا نمائندوں کو اجلاس سے قبل اہم نکات پر بریفنگ دیں گے۔ واضح رہے کہ پارلیمنٹ کا یہ اجلاس کئی حساس موضوعات پر گرما گرم بحث کا مرکز بننے والا ہے۔ اپوزیشن پہلگام میں ہوئے حالیہ دہشت گرد حملے پر حکومت سے جواب دہی کا مطالبہ کرنے کے ساتھ ساتھ بہار میں ووٹر لسٹ پر خصوصی نظرِثانی (Special Intensive Revision – SIR) جیسے اہم موضوعات اٹھانے کی تیاری کر رہی ہے۔
دوسری جانب حکومت نے اس اجلاس کے دوران متعدد اہم بلوں پر بات چیت کا ارادہ ظاہر کیا ہے، جن میں جی ایس ٹی، کان کنی، کھیل، انسداد ڈوپنگ، بھارتی بندرگاہیں، انکم ٹیکس اور بھارتی بندرگاہوں سے متعلق قوانین شامل ہیں۔ پارلیمانی ایجنڈے میں شامل کچھ اہم بل درج ذیل ہیں:
۔ منی پور جی ایس ٹی (ترمیمی) بل 2025
۔ ٹیکسیشن لاز (ترمیمی) بل 2025
۔ جیو ہیریٹیج اینڈ جیو ریلکٹس بل 2025
۔ نیشنل اسپورٹس گورننس بل 2025
۔ انڈین پورٹس بل 2025
۔ انکم ٹیکس بل 2025
۔ گووا میں درج فہرست قبائل کی اسمبلی نشستوں کی ازسرنو ترتیب کا بل 2024
اجلاس سے قبل ہوئی آل پارٹی میٹنگ، اتفاقِ رائے اور ذمہ داری پر زور
حکومت نے اس اجلاس سے قبل تمام سیاسی جماعتوں کے ساتھ ایک آل پارٹی میٹنگ بھی منعقد کی، جس میں پارلیمنٹ کے دونوں ایوانوں میں مؤثر کارروائی کو یقینی بنانے کے لیے ان سے تعاون کا مطالبہ کیا گیا۔ اس میٹنگ میں 51 سیاسی جماعتوں کے 54 نمائندے شریک ہوئے۔ مرکزی وزیر برائے پارلیمانی امور، کرن رجیجو نے میڈیا سے گفتگو کرتے ہوئے کہا کہ حکومت تمام اہم امور پر بحث کے لیے تیار ہے، بشمول ’’آپریشن سندور‘‘۔ کرن رجیجو نے کہا کہ ’’ہم مختلف نظریات رکھتے ہیں لیکن پارلیمنٹ کی مؤثر کارروائی ہر کسی کی مشترکہ ذمہ داری ہے — چاہے وہ حزب اقتدار ہو یا حزب اختلاف۔‘‘
حزب اختلاف کی حکمت عملی
وہیں 19 جولائی کو اپوزیشن کے انڈیا بلاک کے 24 اراکین نے اس اجلاس میں اٹھائے جانے والے مشترکہ نکات پر اتفاق کیا۔ ان میں پہلگام حملے پر بحث اور بہار میں ووٹر لسٹوں کی SIR کو مرکز اہمیت حاصل ہے۔ واضح رہے کہ پارلیمنٹ کا یہ اجلاس 21 جولائی سے 21 اگست تک جاری رہے گا اور اس دوران اہم قومی اور ریاستی امور زیر بحث آئیں گے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
