نئی دہلی۔ وزیراعظم نریندر مودی نے اتوار کو اپنے ماہانہ پروگرام من کی بات کے 128ویں ایپیسوڈ میں ملک کے عوام سے گفتگو کرتے ہوئے شہد کی بڑھتی ہوئی پیداوار اور اس کی معاشی و طبی اہمیت پر تفصیل سے روشنی ڈالی۔ اس موقع پر انہوں نے بتایا کہ گزشتہ کئی برسوں میں بھارت نے شہد کی پیداوار کے میدان میں بڑا سنگ میل حاصل کیا ہے، جسے انہوں نے ‘مَدو کرانتی’ کا نام دیا۔ وزیراعظم مودی نے کہا کہ 11 سال قبل بھارت میں تقریباً 76 ہزار میٹرک ٹن شہد پیدا ہوتا تھا، لیکن جدید تکنیکی مدد، سرکاری اسکیموں اور کسانوں کی محنت کی بدولت یہ پیداوار بڑھ کر ڈیڑھ لاکھ میٹرک ٹن تک پہنچ گئی ہے۔ انہوں نے کہا کہ یہ کامیابی صرف زرعی ترقی کی مثال نہیں بلکہ دیہی روزگار اور کسانوں کی آمدنی بڑھانے کا بہترین ذریعہ بھی ہے۔
پی ایم مودی نے بتایا کہ حکومت نے قومی مکھی بانی اور شہد مشن (National Beekeeping & Honey Mission) کے تحت بی باکس (Bee Boxes) کی تقسیم کے ذریعے ہزاروں نوجوانوں اور کسانوں کو روزگار کے نئے مواقع فراہم کیے ہیں۔ ان کے مطابق شہد کی بڑھتی ہوئی مانگ نے چھوٹے کسانوں کو مضبوط اقتصادی سہارا دیا ہے۔
مختلف ریاستوں کے شہد کی منفرد خصوصیات
اپنے خطاب میں وزیراعظم نے ملک کے مختلف حصوں میں تیار ہونے والے شہد کا ذکر کرتے ہوئے بتایا کہ جJammu & Kashmir کے ضلع رامبن میں “سولائی کے سفید پھولوں” سے تیار ہونے والا شہد سفید رنگ کا ہوتا ہے اور اسے جی آئی ٹیگ بھی ملا ہے۔ یہ اپنی نایاب خصوصیات کی وجہ سے پورے ملک میں مقبول ہو چکا ہے۔ انہوں نے بتایا کہ جنوبی بھارت کے علاقے پُتّور کا شہد بھی بے حد اعلیٰ معیار رکھتا ہے۔ یہاں کی نباتات اور جنگلات کی وجہ سے تیار ہونے والا شہد اب برانڈ کی شکل اختیار کر چکا ہے اور ہزاروں دیہی کسانوں کی آمدنی کا اہم ذریعہ بنا ہے۔
اسی طرح وزیراعظم نے کرناٹک کے تُماکورو کے شہد کی تعریف کی، جو مقامی روایت اور قدرتی مٹھاس کا بہترین امتزاج ہے۔ انہوں نے ناگالینڈ کی “کلف ہنی ہنٹنگ” تکنیک کو ملک میں شہد حاصل کرنے کا سب سے خطرناک طریقہ قرار دیا، جس میں کسان اونچی چٹانوں پر بنے چھتوں سے خطرہ مول لے کر شہد اکٹھا کرتے ہیں۔ وزیراعظم نے آخر میں عوام سے اپیل کی کہ شہد کو اپنی زندگی میں شامل کریں، مقامی شہد خریدیں اور کسانوں کی محنت کی قدر کریں۔ انہوں نے کہا کہ شہد نہ صرف صحت مند غذائی انتخاب ہے بلکہ دیہی معیشت کو مضبوط کرنے کا مؤثر ذریعہ بھی ہے۔
بھارت ایکسپر یس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
