نئی دہلی : نئی دہلی کے بھارت منڈپم میں جاری 18ویں برکس سربراہی اجلاس کا اختتام ہوگیا ہے۔ اجلاس کی صدارت کرنے والے ہندوستان کے وزیر اعظم نریندر مودی نے اختتامی خطاب میں تمام رکن ممالک اور وفود کی فعال شرکت اور تعاون کے لیے شکریہ ادا کیا۔ اس کے ساتھ ہی انہوں نے برکس کے اگلے سربراہی اجلاس کی میزبانی کے لیے چین کو نیک خواہشات بھی پیش کیں۔وزیر اعظم نریندر مودی نے کہا، دوستو، 18ویں برکس سربراہی اجلاس کے اختتام پر میں آپ سب کی فعال شرکت اور قیمتی تعاون کے لیے دل کی گہرائیوں سے شکریہ ادا کرتا ہوں۔ آپ کے اہم خیالات اور تجاویز نے ہمارے تعاون کو وسعت بھی دی ہے اور گہرائی بھی۔ آپ کی موجودگی برکس کی بڑھتی ہوئی اہمیت، کشادگی اور شمولیت کا ثبوت ہے۔ گزشتہ دو دنوں میں ہماری بات چیت نے اس یقین کو مزید مضبوط کیا ہے کہ برکس صرف ممالک کا ایک گروپ نہیں بلکہ حل تلاش کرنے کا ایک نظام ہے۔
’نئی دہلی اعلامیہ مشترکہ سوچ اور تعاون کو واضح سمت دے گا‘
پی ایم مودی نے کہا کہ امید ہے کہ سربراہی اجلاس میں منظور کیا گیا ’نئی دہلی اعلامیہ‘ ہماری مشترکہ سوچ اور مستقبل کے تعاون کے لیے ایک واضح سمت فراہم کرے گا۔ انہوں نے کہا کہ تمام نتائج کو مقررہ وقت کے اندر مکمل کیے جانے والے اقدامات میں تبدیل کرنا ہوگا، جن کا اثر زمینی سطح پر بھی نظر آئے۔انہوں نے کہا، ہم مل کر یہ یقینی بنائیں گے کہ ہمارا فریم ورک صرف کاغذی کارروائی تک محدود نہ رہے بلکہ حقیقی زندگی میں اس کا ٹھوس اثر دکھائی دے۔‘‘
’برکس اپنے تیسرے عشرے میں داخل ہونے جا رہا ہے‘
وزیر اعظم نے کہا کہ برکس اب اپنے تیسرے عشرے میں داخل ہونے جا رہا ہے۔ دنیا اب ہم سے صرف خیالات اور وعدوں کی نہیں بلکہ ٹھوس نتائج کی امید رکھتی ہے۔ انہوں نے اعتماد ظاہر کیا کہ اجتماعی کوششوں کے ذریعے برکس ان توقعات پر ضرور پورا اترے گا۔پی ایم مودی نے برکس کی اگلی میزبانی کے لیے چین کو ایک بار پھر نیک خواہشات پیش کیں۔ انہوں نے نئی دہلی سربراہی اجلاس کو کامیاب بنانے کے لیے تمام رکن ممالک اور ان کی ٹیموں کی خصوصی طور پر ستائش کی اور سبھی کی محفوظ اور خوشگوار واپسی کے لیے نیک خواہشات کا اظہار کیا۔
چین اور روس کے صدور بھی وطن روانہ
اجلاس کے اختتام سے قبل چین کے صدر شی جن پنگ اور روس کے صدر ولادیمیر پوتن اپنا اپنا ہندوستان کا دورہ مکمل کرکے وطن واپس روانہ ہوگئے۔ ہندوستان نئی دہلی اعلامیے کی منظوری کو اس برکس سربراہی اجلاس کی بڑی سفارتی کامیابی کے طور پر دیکھ رہا ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
