وزیراعظم نریندر مودی 13 ستمبر کو ممکنہ طور پر بیرابی-سائرانگ ریلوے منصوبے کا افتتاح کریں گے، جس کے بعد آیزول، شمال مشرق کی ایسی چوتھی ریاستی دارالحکومت بن جائے گی جسے براہِ راست ریل رابطہ حاصل ہوگا۔ یہ خبر میزورم کے وزیر اعلیٰ کے دفتر کے ایک اعلیٰ افسر نے دی ہے۔ یہ منصوبہ آسام کے ہائیلاکنڈی ضلع کے بیرابی اسٹیشن کو آیزول کے قریب سائرانگ سے جوڑتا ہے، جس کی کل لمبائی 51.38 کلومیٹر ہے۔ وزیر اعلیٰ لالدوہوما نے خود اشارہ دیا ہے کہ وزیراعظم اس منصوبے کا افتتاح کر سکتے ہیں۔ واضح رہے کہ پی ایم او کی جانب سے باضابطہ تصدیق تاحال باقی ہے۔
وزیراعظم مودی کو اس کے افتتاح کی دعوت میزورم کے وزیر اعلیٰ نے 14 جولائی کو نئی دہلی میں ان سے ملاقات کے دوران دی تھی۔ ریلوے سیفٹی کمشنر کی منظوری کے بعد اب اس لائن پر مسافر اور مال گاڑیاں دونوں چلائی جا سکیں گی۔ 8215 کروڑ روپے کی لاگت سے مکمل ہونے والا یہ منصوبہ میزورم کی دیرینہ خواہش کی تکمیل کے ساتھ ریاست کی تجارتی، سماجی و معاشی ترقی کو نئی رفتار دے گا۔ یہ منصوبہ نہ صرف دشوار گزار پہاڑی علاقوں میں تعمیراتی مہارت کا مظہر ہے بلکہ ایک اہم انفرا اسٹرکچر سنگ میل بھی ہے۔
اس شاندار ریلوے لائن میں 48 سرنگیں، 55 بڑے اور 87 چھوٹے پل شامل ہیں، جن میں پل نمبر 196 کی اونچائی 104 میٹر ہے، جو دہلی کے قطب مینار سے بھی 42 میٹر زیادہ بلند ہے۔ اس کے علاوہ 5 روڈ اوور برج اور 6 روڈ انڈر برج بھی اس منصوبے کا حصہ ہیں۔ یہ منصوبہ وزیراعظم مودی کے ’مشرقی ہندوستان کی ترقی‘ کے وژن کے تحت شمال مشرقی ریاستوں کو قومی دھارے سے جوڑنے کی ایک اور بڑی پیش رفت ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
