نئی دہلی: وزیراعظم نریندر مودی نے ملک کے طویل ترین عرصے تک مسلسل خدمات انجام دینے والے منتخب وزیراعظم بننے کے تاریخی سنگ میل پر کہا ہے کہ انہوں نے کبھی تصور بھی نہیں کیا تھا کہ وہ اس مقام تک پہنچیں گے۔ انہوں نے اس موقع کو اپنی زندگی کا عظیم اعزاز قرار دیتے ہوئے کہا کہ عوام کی خدمت ہی ان کے لیے عبادت اور روحانی ریاضت ہے۔ این ڈی اے رہنماؤں کے اجلاس سے خطاب کرتے ہوئے وزیراعظم مودی نے کہا کہ اس سیاسی سفر میں بے شمار نشیب و فراز آئے، لیکن انہوں نے مسلسل آگے بڑھنے کے اصول ’’چرویتی، چرویتی‘‘ (آگے بڑھتے رہو) کو اپنا شعار بنائے رکھا۔ انہوں نے کہا، ’’آپ سب نے آج کے دن کو میرے لیے یادگار بنا دیا ہے۔ میں بے حد جذباتی اور شکر گزار ہوں۔ میں نے کبھی تصور نہیں کیا تھا کہ ایک دن یہ سنگِ میل حاصل ہوگا۔ مسلسل سب سے طویل مدت تک منتخب وزیراعظم کے طور پر خدمت کرنے کا موقع ملنا میرے لیے سب سے بڑا اعزاز ہے۔‘‘
’عوام ہی میرے لیے بھگوان کا روپ ہیں‘
وزیراعظم نے کہا کہ اتنے طویل عرصے تک بھارت ماتا کی خدمت کا موقع صرف بھگوان کے خصوصی فضل سے ہی ممکن ہے۔ ان کے مطابق عوام ہی ان کے لیے بھگوان کا روپ ہیں، اسی لیے انہوں نے ہمیشہ عوامی خدمت کو ایک روحانی مشق کے طور پر دیکھا ہے۔ مودی نے کہا کہ یہ سفر کسی ایک فرد کا نہیں بلکہ ایک اجتماعی ’’یگیہ‘‘ (قومی خدمت) ہے، جس میں این ڈی اے کے ساتھیوں اور بے شمار کارکنوں نے فرض شناسی کے جذبے کے ساتھ اپنا تعاون دیا ہے۔
حکومت کی فلاحی پالیسیوں کا ذکر
وزیر اعظم مودی نے اپنی حکومت کی فلاحی پالیسیوں کا ذکر کرتے ہوئے کہا کہ گزشتہ برسوں میں لاکھوں نہیں بلکہ کروڑوں افراد غربت سے باہر آئے ہیں، لیکن اب یہ یقینی بنانا ضروری ہے کہ جو لوگ غربت سے نکل کر ’’نو متوسط طبقہ‘‘ (Neo Middle Class) کا حصہ بنے ہیں، وہ دوبارہ غربت کا شکار نہ ہوں۔ انہوں نے کہا کہ حکومت اور عوامی نمائندوں کو دن رات محنت کرنی ہوگی تاکہ 140 کروڑ بھارتیوں کی امیدوں پر پورا اترا جا سکے۔ ان کے مطابق نوجوانوں، خواتین، متوسط طبقے اور کسانوں کی امنگوں کو پورا کرنا حکومت کی اولین ترجیح ہے۔
نہرو کا ریکارڈ پیچھے چھوڑا، کابینہ نے منظور کی قرارداد
بدھ کے روز مرکزی کابینہ نے 10 جون 2026 کو ہندوستانی جمہوریت کی تاریخ کا ایک اہم دن قرار دیتے ہوئے وزیراعظم نریندر مودی کے اعزاز میں ایک قرارداد منظور کی۔ کابینہ کے مطابق مودی نے مسلسل 4,399 دن تک منتخب وزیراعظم کے طور پر خدمات انجام دے کر جواہرلال نہرو کا 4,398 دن کا ریکارڈ پیچھے چھوڑ دیا ہے۔ قرارداد میں کہا گیا کہ یہ موقع ہندوستان کی جمہوری روایت، عوامی اعتماد اور ’’راشٹر فرسٹ‘‘ (قوم سب سے پہلے) کے جذبے کی علامت ہے، جس کی بدولت عوام نے وزیر اعظم مودی پر مسلسل اعتماد کا اظہار کیا ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
