این ڈی اے کا منشور جاری۔
نئی دہلی: پٹنہ میں جمعہ کے روز نیشنل ڈیموکریٹک الائنس (این ڈی اے) نے بہار اسمبلی انتخاب 2025 کے لیے اپنا مشترکہ منشور جاری کیا۔ دارالحکومت کے ہوٹل موریہ میں منعقد پریس کانفرنس میں نائب وزیر اعلیٰ سمراٹ چودھری نے منشور جاری کیا۔
اس موقع پر وزیر اعلیٰ نتیش کمار، بی جے پی کے صدر جے پی نڈا، لوجپا (رام ولاس) کے سربراہ چراغ پاسوان، ’ہم‘ پارٹی کے سربراہ جیتن رام مانجھی اور آر ایل ایم کے اپندر کشواہا سمیت این ڈی اے کے تمام سینئر لیڈران موجود تھے۔
منشور میں روزگار، تعلیم، صحت، خواتین کے بااختیار بنانے اور کسانوں کی خوشحالی پر خاص زور دیا گیا ہے۔ این ڈی اے نے کہا کہ یہ سنکلپ پترا بہار کو اگلے پانچ برسوں میں آتم نربھر، ترقی یافتہ اور جدید ریاست بنانے کا روڈ میپ ہے۔
این ڈی اے نے ہر نوجوان کے ’سنہرے مستقبل کی گارنٹی‘ کا وعدہ کیا ہے۔ منشور کے مطابق، ایک کروڑ سے زائد سرکاری نوکریاں اور روزگار کے مواقع پیدا کیے جائیں گے۔ ہر ضلع میں میگا اسکل سینٹر قائم کیے جائیں گے، جو عالمی معیار کے ’گلوبل اسکلنگ سینٹر‘ کے طور پر ترقی دیے جائیں گے۔
خواتین کو معاشی طور پر بااختیار بنانے کے لیے ’وزیر اعلیٰ خواتین روزگار یوجنا‘ کے تحت دو لاکھ روپے تک کی مالی امداد دی جائے گی۔ ایک کروڑ خواتین کو ’لکھپتی دیدی‘ اور ’کوٹپتی مشن‘ کے ذریعے کاروبار سے جوڑا جائے گا تاکہ وہ خودمختار بن سکیں۔
کسانوں کے لیے ’کسان سمان اور ایم ایس پی گارنٹی یوجنا‘ لائی جائے گی۔ ہر کسان کو ہر سال 3,000 روپے کی مالی مدد دی جائے گی۔ اسی کے ساتھ پنچایت سطح پر دھان، گیہوں، دالیں اور مکئی کی خرید ایم ایس پی پر یقینی بنائی جائے گی۔ ایک لاکھ کروڑ روپے کی زرعی بنیادی ڈھانچے میں سرمایہ کاری سے ماہی پروری، دودھ اور زراعتی مشن کو رفتار دی جائے گی۔
منشور میں کے جی سے پی جی تک مفت اور معیاری تعلیم دینے کا وعدہ کیا گیا ہے۔ ہر ضلع کے اسکولوں کی حالت بہتر کی جائے گی اور عالمی معیار کے ’ورلڈ کلاس ایجوکیشن اسٹیٹ‘ قائم کیے جائیں گے۔ صحت کے شعبے میں ہر ضلع میں میڈیکل کالج اور جدید سپر اسپیشلٹی اسپتال تعمیر کیے جائیں گے۔
این ڈی اے نے بہار میں 7 نئے ایکسپریس ویز، 3,600 کلومیٹر ریل پٹریوں کی جدید کاری اور 4 نئے شہروں میں میٹرو سروس شروع کرنے کا اعلان کیا ہے۔ صنعتی انقلاب کے لیے ایک لاکھ کروڑ روپے کی سرمایہ کاری سے 10 نئے انڈسٹریل پارک اور ’میک اِن بہار‘ مشن شروع کیا جائے گا۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
