نئی دہلی :پیپلز ڈیموکریٹک پارٹی (پی ڈی پی) کی صدر محبوبہ مفتی نے ایران کے سابق سپریم لیڈر آیت اللہ سید علی خامنہ ای کی آخری رسومات میں شرکت کے بعد گہرے رنج و غم کا اظہار کیا ہے۔ انہوں نے سوشل میڈیا پر اپنے جذبات کا اظہار کرتے ہوئے کہا کہ لیڈرکو آخری خراج عقیدت پیش کرنا ان کی زندگی کے سب سے دردناک اور دل دہلا دینے والے تجربات میں سے ایک تھا۔محبوبہ مفتی نے سوشل میڈیا پلیٹ فارم ایکس پر اپنی پوسٹ میں لکھا کہ حسینیہ جماران جانا ان کے لیے ایک انتہائی جذباتی لمحہ تھا۔ ان کے مطابق یہ وہ سادہ سا گھر تھا ،جہاں ایران کے سپریم لیڈر آیت اللہ سید علی خامنہ ای نے اپنی زندگی گزاری اور جہاں وہ شہید ہوئے۔ انہوں نے لکھا کہ رہنما اور ان کے خاندان کی عظیم قربانیاں، بالخصوص 14 ماہ کی شہید زہرا محمدی گلپایگانی کی شہادت، ان کی قیادت، ثابت قدمی اور انسان دوستی کا واضح ثبوت ہیں۔ محبوبہ مفتی نے یہ بھی کہا کہ اس امام باڑے کو دیکھنا ان کے لیے باعثِ عقیدت تھا جہاں آیت اللہ خامنہ ای نماز ادا کیا کرتے تھے۔ انہوں نے دعا کی کہ اللہ تعالیٰ مرحوم کو جنت الفردوس میں اعلیٰ مقام عطا فرمائے۔
اس سے قبل پی ڈی پی کی جانب سے جاری ایک پریس بیان میں بتایا گیا تھا کہ محبوبہ مفتی کو ایران کے سپریم لیڈر کے دفتر کے شعبۂ بین الاقوامی تعلقات کی طرف سے سرکاری دعوت نامہ موصول ہوا تھا۔ دعوت نامے میں کہا گیا تھا کہ 28 فروری 2026 کو آیت اللہ علی خامنہ ای کے انتقال کے بعد ایران میں قومی سوگ کا اعلان کیا گیا ہے اور انہیں سرکاری اعزاز کے ساتھ سپردِ خاک کرنے کی تقریب منعقد کی جا رہی ہے۔دعوت نامے میں محبوبہ مفتی سے کہا گیا تھا کہ وہ بھارت کی ایک ممتاز سیاسی شخصیت کی حیثیت سے اس تقریب میں شرکت کریں۔ اس میں یہ بھی کہا گیا کہ ان کی موجودگی بھارت اور ایران کے درمیان تاریخی دوستی، باہمی احترام اور دونوں قدیم تہذیبوں کے گہرے تعلقات کی علامت ہوگی۔
دوسری جانب آیت اللہ علی خامنہ ای کی آخری رسومات کے دوران ایران کی اعلیٰ سیاسی قیادت بھی جذبات پر قابو نہ رکھ سکی۔ ایرانی پارلیمنٹ کے اسپیکر محمد باقر قالیباف اور وزیر خارجہ عباس عراقچی تقریب کے دوران آبدیدہ ہو گئے۔ ایران کی سرکاری خبر رساں ایجنسی فارس کے مطابق تہران کے گورنر محمد صادق معتمدیان نے بتایا کہ آخری رسومات کے موقع پر غیر معمولی سکیورٹی انتظامات کیے گئے تھے تاکہ تقریب پُرامن انداز میں مکمل ہو سکے۔انہوں نے کہا کہ تہران کے گرینڈ مصلیٰ نماز گاہ کے دروازے مقامی وقت کے مطابق صبح چھ بجے کھول دیے جائیں گے تاکہ سوگوار بڑی تعداد میں شرکت کر سکیں۔ حکام کے مطابق اگر ضرورت پیش آئی تو عوام کی سہولت کے لیے دروازے مقررہ وقت سے پہلے بھی کھولے جا سکتے ہیں۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
