دو سال بعد لکھنؤ جیل سے رہا ہوئے کیرالہ کے صحافی صدیقی کپن، PFI سے تعلق رکھنے کا تھا الزام
Siddiqui Kappan: کیرالہ سے تعلق رکھنے والے ایک صحافی صدیقی کپن جو ہندوستان میں ایک کالعدم تنظیم پی ایف آئی (پاپولر فرنٹ آف انڈیا) کے سرگرم رکن ہونے کے الزام میں دو سال سے لکھنؤ جیل میں بند تھے، جمعرات کی صبح رہا کر دیے گئے۔ جیل سے باہر آنے کے بعد صحافیوں سے گفتگو کرتے ہوئے انہوں نے کہا کہ کافی جدوجہد کے بعد رہائی ملی۔ جب ان سے پی ایف آئی کے ساتھ تعلق کے الزام کے بارے میں پوچھا گیا تو ان کا کہنا تھا کہ وہ رپورٹنگ کے لیے گئے تھے اور ان کے ساتھ جو تین لوگ تھے وہ طالب علم تھے۔ ان پر جھوٹا الزام لگایا گیا تھا۔ اس دوران کپن نے یہ بھی کہا کہ انہیں میڈیا کی حمایت حاصل ہے۔
واضح رہے کہ کپن کو اکتوبر 2020 میں گرفتار کیا گیا تھا۔ دو سال سے زیادہ جیل میں رہنے کے بعد لکھنؤ کی سیشن عدالت نے بدھ کو کپن کی رہائی کے احکامات پر دستخط کیے تھے اور وہ جمعرات کی صبح لکھنؤ جیل سے باہر آئے تھے۔ کپن کے وکیل ایشان بگھیل نے میڈیا کو یہ معلومات دی۔ اگرچہ کپن کے بدھ کی شام کو جیل سے باہر نکلنے کی توقع تھی، لیکن انہیں رہا نہیں کیا جا سکا کیونکہ منی لانڈرنگ کی روک تھام کی خصوصی عدالت کے جج بار کونسل کے انتخابات میں مصروف تھے۔ رہائی کے حکم میں، ڈسٹرکٹ اینڈ سیشن جج سنجے شنکر پانڈے نے لکھنؤ جیل سپرنٹنڈنٹ کو ہدایت دی کہ اگر وہ کسی اور معاملے میں مطلوب نہیں ہیں تو کپن کو رہا کریں۔ تاہم، 23 دسمبر 2022 کو الہ آباد ہائی کورٹ کی لکھنؤ بنچ نے پی ایم ایل اے کیس میں کپن کو ضمانت دے دی۔
Lucknow, Uttar Pradesh | Kerala journalist Siddique Kappan who was booked by the UP government under the Unlawful Activities Prevention Act (UAPA) released from jail after he was granted bail. pic.twitter.com/iW02VwqprG
— ANI (@ANI) February 2, 2023
کیرالہ کے ملاپورم کا رہنے والے کپن 5 اکتوبر 2020 کو اتر پردیش کے ہاتھرس شہر میں ایک دلت خاتون کی اجتماعی عصمت دری اور قتل کو کور کرنے جا رہے تھے، جہاں انہیں متھرا ٹول پلازہ سے تین دیگر افراد کے ساتھ گرفتار کر لیا گیاتھا۔ پولیس نے دعویٰ کیا تھا کہ ملزمان پی ایف آئی کے سرگرم رکن تھے اور علاقے میں امن و امان کو خراب کرنے کی کوشش کر رہے تھے۔ صحافی کے خلاف تعزیرات ہند (IPC) کی مختلف دفعات کے تحت مقدمہ درج کیا گیا تھا، بشمول UAPA اور انفارمیشن ٹیکنالوجی (IT) ایکٹ۔ بعد میں ان کے خلاف انفورسمنٹ ڈائریکٹوریٹ نے پی ایم ایل اے کیس میں مقدمہ درج کیا تھا۔
-بھارت ایکسپریس
