PM Modi In Kerala: کیرالہ کو ملی نئی رفتار: اسٹارٹ اپ ہب، مضبوط ریل کنیکٹیویٹی اور غریبوں کے لیے پی ایم سوندھی کریڈٹ کارڈ کا تحفہ

ترووننت پورم: وزیر اعظم نریندر مودی نے جمعہ کو کیرالہ کی راجدھانی ترووننت پورم سے ریاست اور ملک کے لیے کئی اہم ترقیاتی اقدامات کا اعلان کرتے ہوئے کہا کہ آج کیرالہ کے ترقیاتی سفر کو ایک نئی رفتار ملی ہے۔ انہوں نے زور دے کر کہا کہ مرکز کی این ڈی اے حکومت کیرالہ کو کنیکٹیویٹی، اختراع، صحت اور غریبوں کی فلاح کے میدان میں ایک مضبوط اور خود کفیل ریاست بنانے کے لیے مسلسل کام کر رہی ہے۔ اپنے خطاب میں وزیر اعظم نے کہا کہ کیرالہ میں ریل کنیکٹیویٹی کو مزید مضبوط کیا گیا ہے اور ترووننت پورم کو ملک کے بڑے اسٹارٹ اپ ہب کے طور پر فروغ دینے کے لیے ٹھوس اور عملی اقدامات کیے جا رہے ہیں۔ ان کے مطابق، بہتر ریل نیٹ ورک نہ صرف مسافروں کو سہولت فراہم کرے گا بلکہ تجارت، سیاحت اور روزگار کے نئے مواقع بھی پیدا کرے گا، جس سے ریاست کی معیشت کو تقویت ملے گی۔ وزیر اعظم مودی نے کہا، ’’آج کیرالہ کی سرزمین سے پورے ملک کے لیے غریبوں کی فلاح سے جڑی ایک بڑی شروعات ہو رہی ہے۔ پی ایم سوندھی کریڈٹ کارڈ کا آغاز کیا گیا ہے، جس سے ریہڑی، پٹری اور فٹ پاتھ پر محنت کرنے والے ہمارے ساتھیوں کو براہ راست فائدہ پہنچے گا۔‘‘ انہوں نے کہا کہ یہ اقدام ان لاکھوں لوگوں کے لیے مالی تحفظ کا ذریعہ بنے گا جو چھوٹے کاروبار کے ذریعے اپنی روزی روٹی کماتے ہیں۔

انہوں نے واضح کیا کہ ترقی یافتہ بھارت کی تعمیر کے لیے پورا ملک متحد ہو کر کام کر رہا ہے اور اس عمل میں شہروں کا کردار انتہائی اہم ہے۔ وزیر اعظم کے مطابق، گزشتہ 11 برسوں میں مرکزی حکومت نے شہری بنیادی ڈھانچے میں بڑے پیمانے پر سرمایہ کاری کی ہے، جس کا فائدہ اب ملک کے مختلف حصوں میں نظر آ رہا ہے۔ سڑکوں، ریلویز، میٹرو، ڈیجیٹل انفراسٹرکچر اور شہری سہولتوں میں بہتری نے عام شہری کی زندگی کو آسان بنایا ہے۔ وزیر اعظم نے بتایا کہ مرکز کی حکومت خاص طور پر کنیکٹیویٹی، سائنس اور اختراع، اور صحت خدمات پر توجہ مرکوز کر رہی ہے۔ کیرالہ میں سی ایس آئی آر کے انوویشن ہب کا افتتاح اور ایک میڈیکل کالج میں ریڈیو سرجری سینٹر کا آغاز ریاست کو سائنس، ٹیکنالوجی، اختراع اور جدید طبی سہولتوں کا اہم مرکز بنانے میں مددگار ثابت ہوگا۔ ان منصوبوں سے نہ صرف مقامی نوجوانوں کو روزگار کے مواقع ملیں گے بلکہ تحقیق اور نئی ٹیکنالوجی کو بھی فروغ ملے گا۔ خطاب کے آغاز میں وزیر اعظم مودی نے کیرالہ کے گورنر راجندر وشوناتھ آرلیکر، وزیر اعلیٰ پنرائی وجین، مرکزی کابینہ کے ساتھیوں، ترووننت پورم کے نو منتخب میئر اور دیگر معزز شخصیات کا خیر مقدم کیا۔ انہوں نے کہا کہ مرکز اور ریاست مل کر کام کریں تو ترقی کی رفتار کئی گنا بڑھ سکتی ہے۔

ریل کنیکٹیویٹی کے حوالے سے وزیر اعظم نے کہا کہ مضبوط اور جدید ریل نظام سے مسافروں کے ساتھ ساتھ تاجروں اور صنعت کاروں کو بھی فائدہ ہوگا۔ بہتر ٹرانسپورٹ سے اشیاء کی ترسیل آسان ہوگی، جس سے کاروبار بڑھے گا اور روزگار کے نئے مواقع پیدا ہوں گے۔ وزیر اعظم مودی نے غریب اور متوسط طبقے کے لیے شروع کی گئی مختلف فلاحی اسکیموں کا بھی ذکر کیا۔ انہوں نے کہا کہ بجلی کے اخراجات کم کرنے کے لیے پی ایم سوریہ گھر مفت بجلی یوجنا متعارف کرائی گئی ہے۔ آیوشمان بھارت یوجنا کے تحت معاشی طور پر کمزور طبقے کو پانچ لاکھ روپے تک کا مفت صحت بیمہ فراہم کیا جا رہا ہے۔ خواتین کی فلاح کے لیے ماتر وندنا یوجنا سمیت کئی اسکیمیں چلائی جا رہی ہیں، تاکہ خواتین کو بااختیار بنایا جا سکے۔ انہوں نے یہ بھی بتایا کہ مرکز نے سالانہ 12 لاکھ روپے تک کی آمدنی کو ٹیکس فری قرار دیا ہے، جس سے خاص طور پر متوسط طبقے کو بڑی راحت ملی ہے اور کیرالہ کے لاکھوں خاندان بھی اس سے مستفید ہو رہے ہیں۔ وزیر اعظم کے مطابق، یہ فیصلے عام آدمی کی مالی حالت کو مضبوط بنانے کی سمت اہم قدم ہیں۔ وزیر اعظم نے کہا کہ گزشتہ 11 برسوں میں حکومت نے کروڑوں لوگوں کو رسمی بینکنگ نظام سے جوڑا ہے۔ اب غریب، درج فہرست ذات، درج فہرست قبائل، پسماندہ طبقات، خواتین اور ماہی گیر بھی آسانی سے بینک قرض حاصل کر سکتے ہیں۔ جن لوگوں کے پاس ضمانت نہیں ہوتی، ان کے لیے حکومت خود ضامن بنتی ہے، تاکہ وہ خود کفیل بن سکیں۔

ریہڑی اور پٹری والوں کی مشکلات کا ذکر کرتے ہوئے وزیر اعظم نے کہا کہ پہلے انہیں سامان خریدنے کے لیے بہت زیادہ سود پر چھوٹے قرض لینے پڑتے تھے۔ اسی مسئلے کے حل کے لیے پی ایم سونِدھی یوجنا شروع کی گئی، جس کے تحت لاکھوں اسٹریٹ وینڈرز کو پہلی بار بینک سے قرض ملا۔ اب حکومت نے ایک قدم آگے بڑھاتے ہوئے ان کے لیے خصوصی کریڈٹ کارڈ بھی شروع کیا ہے۔ وزیر اعظم نے بتایا کہ ترووننت پورم میں حال ہی میں پی ایم سونِدھی کریڈٹ کارڈ مستحقین میں تقسیم کیے گئے ہیں۔ کیرالہ میں دس ہزار سے زیادہ اور ترووننت پورم میں چھ سو سے زائد افراد کو یہ کارڈ مل چکے ہیں۔ انہوں نے کہا کہ پہلے کریڈٹ کارڈ صرف امیروں تک محدود تھے، مگر اب اسٹریٹ وینڈرز کے ہاتھ میں بھی سونِدھی کریڈٹ کارڈ ہے، جو سماجی انصاف اور شمولیتی ترقی کی علامت ہے۔ آخر میں وزیر اعظم نے پردھان منتری آواس یوجنا کا حوالہ دیتے ہوئے کہا کہ ملک بھر میں اب تک چار کروڑ سے زیادہ مکانات تعمیر کیے جا چکے ہیں، جن میں شہری غریبوں کے لیے ایک کروڑ سے زائد گھر شامل ہیں۔ ان کے مطابق، یہ سب اقدامات اس عزم کا ثبوت ہیں کہ حکومت ہر شہری کو باوقار اور محفوظ زندگی فراہم کرنا چاہتی ہے۔

بھارت ایکسپریس اردو