Ministry of Consumer Affairs: غذائی ذخائر پر حکومت کی بریفنگ،  کہا-’’ہندوستان کے پاس غذائی اجناس کا ذخیرہ مقررہ حد سے تین گنا زیادہ‘‘

نئی دہلی میں ایک پریس بریفنگ کے دوران محکمہ خوراک و عوامی تقسیم کی جوائنٹ سکریٹری سی شکھا نے بتایا کہ ملک کے پاس گندم اور چاول کا خاطر خواہ بفر اسٹاک موجود ہے، جو مقررہ معیار سے تقریباً تین گنا زیادہ ہے۔ انہوں نے کہا کہ اس وقت ملک میں تقریباً 222 لاکھ میٹرک ٹن گندم اور 380 لاکھ میٹرک ٹن چاول موجود ہے، اس طرح مجموعی غذائی ذخیرہ تقریباً 602 لاکھ میٹرک ٹن بنتا ہے۔

پی ڈی ایس اور ہنگامی حالات کے لیے کافی ذخیرہ

سی شکھا کے مطابق یہ ذخیرہ عوامی تقسیم کے نظام (PDS) کی ضروریات کو پورا کرنے کے ساتھ ساتھ کسی بھی ہنگامی صورتحال سے نمٹنے کے لیے بھی مکمل طور پر کافی ہے۔ انہوں نے یقین دہانی کرائی کہ حکومت خوراک کی دستیابی پر مسلسل نظر رکھے ہوئے ہے اور ضرورت پڑنے پر فوری مداخلت کرے گی۔ انہوں نے مزید بتایا کہ انڈونیشیا، ملائیشیا، روس، یوکرین، ارجنٹینا اور برازیل جیسے ممالک سے درآمدات مسلسل جاری ہیں، جس سے سپلائی میں استحکام برقرار ہے۔ ساتھ ہی سرسوں کی بہتر پیداوار نے خاص طور پر خوردنی تیل کے شعبے میں گھریلو دستیابی کو مزید مضبوط کیا ہے۔

خلیجی خطے میں بھارتی جہاز اور ملاح محفوظ

دوسری جانب وزارت بندرگاہ، جہازرانی و آبی گزرگاہ کے ایڈیشنل سکریٹری مکیش منگل نے بتایا کہ مغربی ایشیا میں موجود تمام بھارتی ملاح محفوظ ہیں اور سمندری سرگرمیاں معمول کے مطابق جاری ہیں۔ انہوں نے کہا کہ گزشتہ دو دنوں میں بھارتی پرچم بردار ایل پی جی ٹینکر ’’گرین سانوی‘‘ اور ’’گرین آشا‘‘ آبنائے ہرمز سے بحفاظت گزر چکے ہیں۔

سمندری نگرانی اور آپریشن جاری

مکیش منگل کے مطابق اس وقت مغربی خلیجی علاقے میں 16 سے 18 بھارتی جہاز موجود ہیں، جن پر سیکڑوں بھارتی ملاح سوار ہیں۔ حکومت وزارتِ خارجہ اور دیگر اداروں کے ساتھ مسلسل رابطے میں ہے تاکہ ملاحوں کی حفاظت اور سمندری آپریشنز کو بلا تعطل جاری رکھا جا سکے۔ انہوں نے یہ بھی بتایا کہ اب تک 964 سے زائد ملاحوں کو وطن واپس لایا جا چکا ہے، جبکہ ملک کی بندرگاہوں پر کام معمول کے مطابق جاری ہے۔

بھارت ایکسپریس اردو۔