Rajnath Singh at commissioning of stealth frigates: ہندوستان بحری سرحدوں کے تحفظ کی مکمل صلاحیت رکھتا ہے اور کسی بھی صورتحال میں فوری اور فیصلہ کن ردعمل دینے کے لیے تیار ہے: راج ناتھ سنگھ

وشاکھاپٹنم: وزیردفاع راج ناتھ سنگھ نے منگل کے روز کہا کہ ہندوستان بحری سرحدوں کے تحفظ کی مکمل صلاحیت رکھتا ہے اور کسی بھی صورتحال میں فوری اور فیصلہ کن ردعمل دینے کے لیے تیار ہے۔ وہ وشاکھاپٹنم میں منعقدہ تقریب سے خطاب کر رہے تھے جہاں دو ملکی ساختہ ملٹی مشن اسٹیلتھ فریگیٹس، آئی این ایس اُدے گری اور آئی این ایس ہم گری کو باضابطہ طور پر بحریہ میں شامل کیا گیا۔

وطن کی خدمت کرنے والوں کو خراج تحسین

راج ناتھ سنگھ نے کہا کہ ’’میں اُن تمام افراد کو دل کی گہرائیوں سے خراج تحسین پیش کرتا ہوں جو پوری لگن کے ساتھ وطن کی خدمت میں مصروف ہیں۔ میں بھارتی بحریہ کے افسران، گارڈن ریچ شپ بلڈرز اینڈ انجینئرز لمیٹڈ اور اپنے تمام ہم وطنوں کو مبارکباد پیش کرتا ہوں۔ آج کا یہ منظر ہندوستان کے خوابوں کی تعبیر اور ہمارے عزم و وژن کا ثبوت ہے۔‘‘

وشاکھاپٹنم کا انتخاب کیوں؟

وزیردفاع نے کہا ’’اگر پورے ملک میں کسی ایک شہر کو اس عالمی سطح کے موقع پر نئی سوچ کو عملی جامہ پہنانے کے لیے منتخب کیا جا سکتا تو وہ وشاکھاپٹنم ہی ہوتا۔ جب کوئی شخص زندگی میں کچھ بڑا اور انقلابی کرنے کا ارادہ کرتا ہے تو وہ ایسے مقامات کا انتخاب کرتا ہے جو اسٹریٹیجک اور ثقافتی طور پر مضبوط ہوں اور یہی وجہ ہے کہ وشاکھاپٹنم کا انتخاب کیا گیا۔‘‘

بھارتی بحریہ کی صلاحیت میں اضافہ

راج ناتھ سنگھ نے کہا کہ دو نئے جنگی جہازوں کی شمولیت سے بھارتی بحریہ مزید مضبوط ہوئی ہے اور یہ ایک حقیقی ’’بلو واٹر نیوی‘‘ کے طور پر اُبھری ہے۔ انہوں نے کہا ’’ہم اب نہ صرف ساحلی علاقوں کے تحفظ کے لیے بلکہ بحر ہند کے انتہائی دور دراز حصوں میں بھی کام کرنے کے قابل ہیں، چاہے وہ قزاقی کے خلاف کارروائی ہو، اسمگلنگ اور غیر قانونی سرگرمیوں کا خاتمہ، سمندری دہشت گردی کا مقابلہ، یا قدرتی آفات کے بعد امداد فراہم کرنا ہو۔‘‘

خود انحصاری کی جانب بڑا قدم

وزیردفاع نے کہا کہ آئی این ایس اُدے گری اور آئی این ایس ہِم گری کی کمیشننگ ’’آتم نربھر بھارت‘‘ کے خواب کی عملی تصویر ہے۔ انہوں نے واضح کیا کہ یہ دونوں جنگی جہاز مکمل طور پر ہندوستان میں تیار کیے گئے ہیں اور ان کے ہتھیار و سینسر پیکیجز انہیں سمندروں کے ناقابل شکست محافظ بناتے ہیں۔ انہوں نے بتایا کہ ان میں طویل فاصلے تک مار کرنے والے ہتھیار، سپر سونک میزائل، راکٹ لانچرز، ٹارپیڈو لانچرز، جدید جنگی نظم و نسق کے نظام اور فائر کنٹرول سسٹم نصب ہیں۔

جہازوں کے ناموں کی علامتی اہمیت

راج ناتھ سنگھ نے کہا ’’اُدے گری، جو طلوع آفتاب کی علامت ہے، ہمیں یاد دلاتا ہے کہ ہر نیا دن نئی توانائی، نئے چیلنجز اور نئے مواقع لے کر آتا ہے۔ دوسری طرف ہِم گری، جو ہمالیہ کی مضبوط اور اٹل طاقت کی نمائندگی کرتا ہے، ہمیں یہ یقین دلاتا ہے کہ سمندر کی موجوں کے بیچ بھی بھارتی بحریہ ہمالیہ کی طرح مضبوطی سے کھڑی ہے۔‘‘

ہمسایہ اول پالیسی اور SAGAR وژن کی تقویت

انہوں نے کہا کہ یہ دونوں جہاز نہ صرف ملکی سلامتی کو مضبوط کریں گے بلکہ انسانی ہمدردی پر مبنی امدادی اور آفات سے نجات کے مشنوں کو بھی بہتر بنائیں گے۔ یہ اقدام ’’Neighbourhood First‘‘ پالیسی اور SAGAR (Security and Growth for All in the Region) وژن کو بھی مزید تقویت دے گا۔

تاریخی سنگ میل

راج ناتھ سنگھ نے اس لمحے کو تاریخی قرار دیتے ہوئے کہا کہ ’’آج وشاکھاپٹنم سے شروع ہونے والا آئی این ایس اُدے گری اور آئی این ایس ہِم گری کا سفر محض ایک عام سفر نہیں، بلکہ یہ ہندوستان کے وقار اور ترقی کا سفر ہے۔‘‘

بھارت ایکسپریس اردو۔