وندے بھارت ایکسپریس پر پتھراؤ کے واقعات نہیں رک رہے
Vande Bharat Express : وندے بھارت ایکسپریس پر ایک بار پھر پتھراؤ کا واقعہ سامنے آیا ہے۔ بہار کے کٹیہار کے بلرام پور کے قریب ٹرین پر پتھراؤ کیا گیا۔ پتھراؤ سے ٹرین کی کھڑکی کے شیشے ٹوٹ گئے۔ تازہ ترین معاملہ 20 جنوری (جمعہ) کا ہے۔ وندے بھارت ٹرین پر پتھراؤ کے واقعات مسلسل سامنے آرہے ہیں۔ ریلوے اس معاملے کی تحقیقات میں مصروف ہے۔ ریلوے نے ایسے واقعات کو روکنے کے لیے کئی اقدامات کیے ہیں۔ لیکن وندے بھارت ٹرین پر پتھراؤ کے واقعات ملک کے مختلف حصوں میں کم ہوتے نظر نہیں آرہے ہیں۔
22302 ڈاؤن وندے بھارت ایکسپریس کی ایسکارٹ ٹیم نے بتایا کہ کوچ-C6 کی برتھ نمبر 70 پر مسافروں نے ڈالکھولا-تیلتا ریلوے اسٹیشن کو عبور کرتے وقت پتھراؤ کی اطلاع دی ہے۔ ڈالکھولا-تیلتا ریلوے اسٹیشن کٹیہار، بہار کے بلرام پور کے تحت آتا ہے۔ پتھراؤ کی وجہ سے کوچ C-6 کے دائیں جانب کی کھڑکی کا شیشہ ٹوٹ گیا ہے۔
یہ بھی پڑھیں- Vande Bharat Express: بنگال میں 24 گھنٹوں میں دوسری بار وندے بھارت ٹرین پر پتھراؤ، …گرمائی سیاست
ریلوے پروٹیکشن فورس کے سینئر سیکورٹی کمشنر کمل سنگھ نے واقعہ کی تصدیق کی۔ انہوں نے بتایا کہ 20 جنوری (جمعہ) کو دال کولا آر پی ایف چوکی کے تحت تیلتا ریلوے اسٹیشن کے قریب ٹرین نمبر 22302 ڈاؤن وندے بھارت ایکسپریس پر پتھراؤ کیا گیا۔ اس کے بعد آر پی ایف اور جی آر پی کی ٹیم نے متعلقہ واقعہ کا جائزہ لیا اور کٹیہار کے ایس پی جتیندر کمار سے بات کی۔ پتھراؤ کا یہ واقعہ مغربی بنگال کی سرحد کے قریب بہار کے کٹیہار ضلع میں پیش آیا۔
ٹرین کو مغربی بنگال میں بھی بنایا گیا تھا نشانہ
اس سے قبل جنوری کے پہلے ہفتے میں مغربی بنگال میں بھی اس طرح کے کیس رپورٹ ہوئے تھے۔ جب وندے بھارت ٹرین ہاوڑہ سے نیو جلپائی گڑی جارہی تھی تو ٹرین پر دارجلنگ ضلع میں پتھراؤ کیا گیاتھا۔ دارجلنگ ضلع میں پھانسی دیوا کے قریب ٹرین پر پتھراؤ کیا گیا تھا۔ اور اسی راستے پر ایک اور پتھراؤ کیا گیا تھا۔ وندے بھارت ٹرین پر پتھراؤ کے اس واقعہ کے بارے میں بی جے پی نے الزام لگایا تھا کہ ٹی ایم سی کے لوگوں نے ہی ٹرین کو نشانہ بنایا ہے۔ اس سے پہلے وشاکھاپٹنم میں وندے بھارت ٹرین پر پتھراؤ کیا گیا تھا۔
-بھارت ایکسپریس
