انڈیا اسلامک کلچرل سینٹر کی فلاح کے لئے کوشاں شخصیات کی جانب سے سلمان خورشید کی جانب سے ایک اہم میٹنگ کا انعقاد کیا گیا۔
نئی دہلی: انڈیا اسلامک سینٹرالیکشن میں کامیابی کے بعد سپریم کورٹ کے سینئرایڈوکیٹ اورکانگریس کے سینئرلیڈرسلمان خورشید کے حوصلے بلند ہیں۔ انہوں نے ایک بارپھردوہرایا ہے کہ انہوں نے انڈیا اسلامک کلچرل سینٹرکے الیکشن کے دوران جووعدہ کیا ہے، اس کو پورا کریں گے۔ دراصل، جامعہ نگرواقع ہوٹل ریور ویو میں معروف قومی وملی رہنما، معمرصحافی اورعالمی صوفی مشن کے صدرشاہ اشتیاق ایوبی کی دعوت پرانڈیا اسلامک کلچرل سینٹرکی مطلوبہ تعمیروترقی پر بلا تاخیراقدام وعمل کے لئے ہوٹل ایک خصوصی میٹنگ کا انعقاد کیا گیا تھا۔ سلمان خورشید نے خطاب کرتے ہوئے کہا کہ انتخابی مہم کے دوران ہم نے جتنے بھی وعدے کئے ہیں اسے پورا کرنے کے لئے ہم پابند عہد ہیں۔ ہم نے اپنےکئے گئے وعدوں پرعمل کرنا بھی شروع کر دیا ہے۔ سچ تو یہ ہے کہ کامیابی حاصل کرنا یا وعدوں کے ذریعہ انتخابی کامیابی حاصل کرنا بڑا کمال نہیں بلکہ کامیابی کو سنبھالنا اورکئے گئے وعدوں پرعمل کرنا یا نبھانے کے پرخارراستوں پرچلنا بڑے کمال کی بات ہے۔
اسلامک سینٹرمیں خواتین کو پہلی بار دی گئی بڑی ذمہ داری
انہوں نے اپنے خطاب میں مزید کہا کہ ہم نے سب سے پہلا وعدہ کیا تھا کہ خواتین کوایمپاورمنٹ کے تقاضوں کواسلامک سینٹر میں نافذ کریں گے۔ ہم نے یہ وعدہ شاہانہ خان کوسکریٹری بنا کروعدہ پورا کیا۔ آج سے قبل مسلم یا اقلیتی اداروں، یا شرعی نظام پرنفرتی سیاست اورحکومت کے ذریعہ پیدا کئے جارہے پیچیدہ مسائل پرگزشتہ صدارت گونگی ثابت ہو رہی تھی، لیکن میں مسلم اقلیت، اسرائیلی جنگ اوراوقاف جیسے مسائل کی ترجمانی کا حق اسلامک سینٹرکے پلیٹ فارم سے پہلی بارادا کرکے اپنی بیباک اوربے خوف صدارت ثبوت فراہم کررہا ہوں اورکرتا رہوں گا۔ اپنے وعدوں کی تکمیل کا سلسلہ جاری رکھتے ہوئے ہم نے اسلامک سینٹرکے کیفیٹیریا کو بقایہ رقم کی وصولی کے ساتھ غلط اوربے ایمان عناصرسے آزاد کرالیا ہے۔ اسلامک سینٹر میں ملازمین کے تعلق سے اصلاحی اقدام کرتے ہوئے، جو غلط تھے انہیں باہرکا راستہ دکھا دیا ہے۔ باقی ملازمین کی سخت نگرانی جاری ہے، جیسے ہی پکڑمیں آئیں گے باہرکا راستہ دکھانے میں قطعی تاخیرنہیں ہوگی۔
بانی اکابرین کی تصاویرسینٹرمیں آویزاں کی گئیں
سلمان خورشید نے یہ بھی کہا کہ ہمارے اسلامک سینٹرکی محسن اول سابق وزیراعظم آنجہانی اندرا گاندھی اوردیگربانی اکابرین کی تصاویرکی صورت میں یادگار حوالوں سے یہ ادارہ گزشتہ 20 سالوں سے محروم تھا۔ ہم نے یہ محرومی ڈاکٹرمحسن ولی اوراپنے نہایت سرگرم ناقد ومحرک دوست شاہ اشتیاق ایوبی کے تاریخ ساز تعاون سے بانی بزرگوں کی تصویراسلامک سینٹرکی دیواروں پرآویزاں کردیا ہے تاکہ سینٹرمیں ہرآنے والا شخص ہمارے بانی بزرگوں کے گراںقدراحسانات کو ان کی تصاویردیکھ کر محسوس کرسکے۔ انہوں نے کہا کہ اسلامک سینٹرکی تیزگام ترقی کے لئے اپنے فعال ممبران پر مشتمل 23 ذیلی کمیٹیاں تشکیل کردی ہیں اور ہر ذیلی کمیٹی پرالگ الگ ذمہ داریاں عائد کی گئ ہیں۔ ان کمیٹیوں پرمیری ذاتی نگہبانی جاری ہے۔ ان شاء اللہ یہ سبھی کمیٹیاں اپنی ذمہ داریوں کو بخوبی نبھا کرکسوٹی پرکھرا اترنے کا ثبوت فراہم کریں گی۔ فائنانس آڈٹ اور ممبر شپ اصلاحات کے تعلق سے بھی کام جاری ہے جلد ہی اس کے اچھے نتائج آپ لوگوں کے پیش نظر ہوں گے۔
بدعنوانیوں پر خاص توجہ مرکوز
انڈیا اسلامک کلچرل سینٹرکے نومنتخب صدرنے کہا کہ ہم اچھی طرح گزشتہ صدارتی دورپرعائد الزامات اورمختلف شکایتوں کے حوالے سے واقف ہیں کہ یہاں ہاسپیٹالیٹی کا شعبہ بدعنوانیوں کی جڑہے۔ ہم کسی طرح کی بدعنوانی سے کوئی سمجھوتہ نہیں کرنے کے لئے پابند عہد ہیں۔ ہاسپیٹالیٹی کے کام کاج کی اندراورباہر دونوں جانب سے سخت نگرانی جاری ہے۔ ہم یقین دلانا چاہتے ہیں کہ میرے دورصدارت میں کسی کو بھی معمولی آمریت یا کھلے ہاتھ کی اجازت نہیں ہوگی۔ ہم ایک بارپھرباورکرا دینا چاہتے ہیں کہ اسلامک سینٹرکے دامن عظمت پرگزشتہ 20 سال میں جو داغ لگے ہیں، ہم اسے صاف کرنے ائے ہیں، صاف کررہے ہیں، صاف کرکے رہیں گےاورجو کچھ پہلے ہوتا رہا ہے، اب دوبارہ قطعی نہیں ہونے دیں گے۔ اپنے خطاب کے آخرمیں بڑے دل سوزاندازمیں حاضرین کوتسلی اورتسکین فراہم کرنے کے ضمن میں کہا کہ آپ بخوبی واقف ہیں کہ گزشتہ 20 سال میں اسلامک سینٹرکومردوں کا مقبرہ بنایا گیا ہے، ہم اسے زندہ اورفعال لوگوں کی مثالی فعالیت پرمشتمل ایک عالمی مرکزبنا کرہی دم لیں گے۔
سلمان خورشید کی صدارت اورقیادت سے نئے صبح کا آغازہوا: اشتیاق ایوبی
عالمی صوفی مشن کے صدراورمعروف قومی وملی رہنما شاہ اشتیاق ایوبی نے کہا کہ انڈیا اسلامک کلچرل سینٹر نہ صرف ایک قومی سطح کا بلکہ عالمی سطح کا نمائندہ اورترجمان ادارہ ہے۔ اس ادارے کے اول 6 عظیم بانیان محمد وسیم خان یوسف زئی، مفتی عتیق الرحمن، جسٹس ہدایت اللہ، بدرالدین طیب جی، حکیم عبدالحمید خان، بیگم عابدہ احمد مرحومین کے ہاتھوں قائم کردہ اس عالمی ادارے کا بنیادی غرض ومقصد بھی یہی تھا کہ اگراقوام عالم یا ہندوستانی عوام کے پیچیدہ مسائل کی آوازجہاں کمزورپڑے، وہاں یہ ادارہ اس کمزورآوازکوتقویت فراہم کرنے اورایک فعال قیادت نبھانے کا کردارادا کرے۔ انہوں نے کہا کہ افسوس صد افسوس کہ گزشتہ 20 سالہ نا اہل صدارت کے زیرسایہ قابض ٹیم یا گزشتہ صدارت تویہ کردارنبھانے میں کلی طورپرغیرفعال یا ناکام ثابت ہوئی، لیکن ابھی 2024 میں انتخابی عمل کے ذریعہ قائم ہوئی سلمان خورشید کی فعال صدارت اورباوقارقیادت کے دورمیں ایک نئے دورکی نئی صبح کی سنہری کرنوں کی طرح سب کچھ تبدیل ہوتا نظرآرہا ہے۔ نشست سے مخاطب ہوکراس اہم میٹنگ کے روح رواں شاہ اشتیاق ایوبی نے کہا کہ گزشتہ 20 سال میں جو کچھ نہیں ہوا اس کے برعکس اپنے پہلے دن سے سلمان خورشید کی کرشمہ سازصدارت بخوبی انجام دے رہی ہے۔ ہم سبھی کو چاہئے کہ ہم اپنی اپنی استطاعت کے مطابق سلمان خورشید کا تعاون کرکے ان کےعزائم کو حوصلہ اورتقویت فراہم کریں۔ قابل ذکرہے کہ اس نشست میں شرکت کرنے والی معززشخصیات میں ڈاکٹرمحمد فاروق(آرتھو) محقق ادویات ڈاکٹرسید فاروق(ہمالیہ ڈرگ)، ماہرامراض قلب ڈاکٹر محسن ولی، ڈاکٹرپروفیسرمعظم، ملی وسماجی لیڈرکلیم الحفیظ، محمد نورخان (کارپوریٹ) معروف عصرصحافی علی عادل، خورشید عثمانی، تنویراحمد (آکسفورڈ) سلمان وارث (کارپوریٹ) نوجوان لیڈرپرویزعالم خان وغیرہ کے علاوہ دیگر حاضرین کی بڑی تعداد موجود رہی۔ نشست کا اختتام سرپرست ڈاکٹرمحمد فاروق کے ناصحانہ کلمات اورہدیہ تشکر کے ساتھ ہوا۔
بھارت ایکسپریس۔
