Bharat Express
Bharat Express
  1. Home » قومی » Eid-ul-Adha 2023: پورے ملک میں پُرامن طریقے سے ادا کی گئی عیدالاضحیٰ کی نماز، فرزندان توحید خلوص وایثار کے ساتھ پیش کر رہے ہیں قربانی

Eid-ul-Adha 2023: پورے ملک میں پُرامن طریقے سے ادا کی گئی عیدالاضحیٰ کی نماز، فرزندان توحید خلوص وایثار کے ساتھ پیش کر رہے ہیں قربانی

Eid-ul-Adha 2023 News: قومی دارالحکومت دہلی سمیت پورے ہندوستان میں عیدالاضحیٰ کے موقع پر فرزندان توحید نے نمازادا کی۔

Eid-ul-Adha 2023: پورے ملک میں عیدالاضحیٰ کا تہوار انتہائی تزک واحتشام کے ساتھ منایا جار ہا ہے۔ عید الاضحیٰ کی نماز ادا کرنے کے لئے عیدگاہوں اورمساجد میں صبح سے فرزندان توحید جمع ہونے لگے۔ صبح 6 بجے سے عیدالاضحیٰ کی نماز کی ادائیگی ہونے لگی تھی۔ مسلمانوں عیدالاضحیٰ کے موقع پر اللہ کی بارگاہ میں قربانی پیش کرتے ہیں۔

دراصل اسلامی کلینڈرکے لحاظ سے دو عید منائی جاتی ہے۔ پہلا عید الفطراور دوسرا عیدالاضحیٰ۔ آج دوسری عید منائی جا رہی ہے۔ نمازعیدالاضحیٰ کے بعد اللہ کی بارگاہ میں قربانی پیش کی جاتی ہے۔

وہیں، عیدالاضحیٰ کی نماز آج ملک بھرمیں پرامن ماحول میں ادا کی گئی۔ کچھ ریاستوں میں بارش کی وجہ سے کھلے میدان میں نماز ادا نہیں کی جا سکی جس کی وجہ سے مساجد میں زبردست بھیڑ دیکھنے کو ملی۔ حالانکہ کچھ ریاستیں ایسی بھی رہیں جہاں دھوپ کی تپش میں لوگوں کو نمازِ عید ادا کرنی پڑی۔

ملک کی راجدھانی دہلی میں کچھ مقامات پر بارش ضرور ہوئی، لیکن عید کی نماز میں زیادہ رخنہ پیدا نہیں ہوا۔ تاریخی جامع مسجد میں ہر بار کی طرح نماز میں بوڑھے، جوان اور بچوں کا جم غفیر شامل ہوا۔ نماز کے بعد ملک میں امن و امان اور خیر سگالی و بھائی چارہ کے لیے دعا کرائی گئی۔ بعد ازاں بڑے اور بچوں نے گلے مل کر سبھی کو عید کی مبارکباد پیش کی۔ اس موقع پر جامع مسجد کے علاوہ دہلی کے دیگر اہم مساجد اور عیدگاہوں میں پولیس کی سخت سیکورٹی دی گئی۔

بہار میں راجدھانی پٹنہ سمیت کئی مقامات پر بارش کی وجہ سے عید کی نماز پڑھنے عیدگاہ یا مسجد جانے والے لوگوں کو کافی مشکلات کا سامنا کرنا پڑا۔ کہیں رک رک کر تو کہیں تیز بارش کی خبریں سامنے آ رہی ہیں۔ موصولہ اطلاعات کے مطابق پٹنہ کے گاندھی میدان میں بارش کی وجہ سے عید کی نماز کینسل ہو گئی جس کا نتیجہ یہ ہوا کہ مساجد میں نماز پڑھنے کے لیے لوگوں کی زبردست پہنچی۔ کچھ مساجد میں نماز کے لیے دوسری جماعت کا بھی انتظام کیا گیا۔

اتر پردیش میں کچھ مقامات پر موسم خوشگوار رہا جبکہ کچھ ضلعوں میں گرمی اور تپش کے درمیان عید کی نماز ادا کی گئی۔ راجستھان، جموں و کشمیر، مدھیہ پردیش، مہاراشٹر، آندھرا پردیش، تلنگانہ، ہریانہ وغیرہ سے  بھی عید کی نماز پرامن ماحول میں پڑھے جانے کی خبریں سامنے آ رہی ہیں۔ نیچے پیش ہیں کچھ اہم ریاستوں میں عید کی نماز ادا کیے جانے کی ویڈیوز۔

 بھارت ایکسپریس۔

Also Read

تازہ ترین خبریں