ڈبروگڑھ (آسام): مرکزی وزیر داخلہ امت شاہ نے جمعہ کو کانگریس پارٹی پر شدید حملہ کرتے ہوئے الزام عائد کیا کہ کانگریس نے آسام کو غیر قانونی دراندازی کا مرکز (ہاٹ اسپاٹ) بنا دیا ہے اور ووٹ بینک سیاست کے تحت دراندازوں کو اقتدار حاصل کرنے کا ذریعہ بنایا ہے۔ ڈبروگڑھ میں ایک عوامی اجتماع سے خطاب کرتے ہوئے امت شاہ نے کہا کہ آسام میں دراندازی ایک سنگین مسئلہ ہے اور کانگریس نے اسے جان بوجھ کر فروغ دیا۔
’’کیا آسام میں دراندازی ہونی چاہیے؟‘‘
امت شاہ نے کہا: ’’میں آسام کے عوام سے بہت سنجیدگی سے پوچھنا چاہتا ہوں کہ کیا آسام میں دراندازی ہونی چاہیے؟ کیا یہاں غیر قانونی گھس پیٹھ درست ہے؟ کانگریس پارٹی نے آسام کو دراندازی کا ہاٹ اسپاٹ بنایا اور ووٹ بینک کی سیاست کے لیے اسے ایک ہتھیار کے طور پر استعمال کیا۔‘‘ مرکزی وزیر داخلہ نے بی جے پی کی قیادت والی آسام حکومت اور وزیر اعلیٰ ہمنتا بسوا سرما کی تعریف کرتے ہوئے کہا کہ موجودہ حکومت نے ریاست میں آبادیاتی تبدیلی کے عمل کو روکنے کے لیے مؤثر اقدامات کیے ہیں۔ انہوں نے کہا: ’’میں بی جے پی حکومت اور آسام کے وزیر اعلیٰ کو مبارکباد دینا چاہتا ہوں کہ انہوں نے آبادی کے توازن کو بگاڑنے کے عمل کو روکا۔ بنگلہ دیشی دراندازوں کے قبضے سے 1 لاکھ 26 ہزار ہیکٹیئر زمین کو آزاد کرانا بی جے پی حکومت کی بڑی کامیابی ہے۔‘‘
سبھی دراندازوں کو باہر نکالنے کا اعلان
امت شاہ نے پُرزور لہجے میں کہا کہ اگر بی جے پی تیسری بار اقتدار میں آئی تو ہر غیر قانونی درانداز کو آسام سے باہر نکال دیا جائے گا۔ انہوں نے اعلان کیا: ’’آسام کی دوسری راجدھانی کی سرزمین سے میں وعدہ کرتا ہوں کہ اگر آپ ہمنتا بسوا سرما کی قیامیں تیسری بار بی جے پی کی حکومت بناتے ہیں تو میں آسام سے ہر درانداز کو باہر نکال دوں گا۔‘‘
825 کروڑ روپے کے ترقیاتی منصوبوں کا سنگ بنیاد
اس سے قبل امت شاہ نے مہاتما گاندھی کی 78ویں برسی پر انہیں خراج عقیدت پیش کیا اور آسام میں تقریباً 825 کروڑ روپے مالیت کے پانچ بڑے ترقیاتی منصوبوں کا سنگ بنیاد رکھا۔ انہوں نے وزیر اعلیٰ ہمنتا بسوا سرما کو مبارکباد دیتے ہوئے کہا کہ ریاستی حکومت نے آسام کو مزید جامع اور ترقی یافتہ بنانے کے اپنے وعدے کو عملی شکل دی ہے۔ امت شاہ نے بتایا کہ 2025 میں وزیر اعلیٰ نے ڈبروگڑھ کو آسام کی دوسری راجدھانی بنانے کا اعلان کیا تھا، جو اب عملی صورت اختیار کرچکا ہے۔ انہوں نے کہا کہ 250 ایکڑ پر پھیلے نئے قانون ساز اسمبلی کمپلیکس کا سنگ بنیاد رکھا گیا ہے، جو اپر آسام کے لیے ایک تاریخی قدم ہے۔ انہوں نے کہا: ’’آج کے بعد ڈبروگڑھ کے شہری پورے ملک میں آسام کی دوسری راجدھانی کے باشندوں کے طور پر پہچانے جائیں گے۔‘‘
ایک روزہ دورۂ آسام
مرکزی وزیر داخلہ امت شاہ آسام کے ایک روزہ دورے پر ہیں۔ جمعرات کی رات ڈبروگڑھ پہنچنے پر وزیر اعلیٰ ہمنتا بسوا سرما نے ہوائی اڈے پر ان کا پرتپاک استقبال کیا۔ ایکس (سابقہ ٹوئٹر) پر ایک پوسٹ میں وزیر اعلیٰ نے کہا کہ امت شاہ کا یہ دورہ ترقی، گورننس اور ثقافتی سرگرمیوں کے حوالے سے اپر آسام کے لیے اہم سنگ میل ثابت ہوگا۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
