Congress ‘Save MNREGA’ campaign: کانگریس پارٹی کرے گی ملک گیر احتجاج، 10 جنوری سے ’’منریگا بچاؤ سنگرام‘‘ کا اعلان

نئی دہلی: آل انڈیا کانگریس کمیٹی نے منریگا کے حق پر مبنی کردار کے تحفظ کے لیے ملک گیر عوامی تحریک شروع کرنے کا اعلان کیا ہے۔ کانگریس کے جنرل سکریٹری اور رکنِ پارلیمنٹ کے سی وینوگوپال نے تمام پردیش کانگریس کمیٹیوں (پی سی سی) کو خط لکھ کر ’منریگا بچاؤ سنگرام‘ کے قومی سطح پر آغاز کی اطلاع دی ہے۔ یہ تحریک مرکزی حکومت کی جانب سے تجویز کردہ نئے ’وکست بھارت-جی رام جی ایکٹ‘ کے خلاف شروع کی جا رہی ہے، جسے کانگریس نے دیہی روزگار اور ذریعۂ معاش پر براہِ راست حملہ قرار دیا ہے۔

کے سی وینوگوپال نے اپنے خط میں کہا کہ مہاتما گاندھی نیشنل رورل ایمپلائمنٹ گارنٹی ایکٹ (منریگا) سال 2005 میں یو پی اے حکومت کے ذریعے نافذ کیا گیا ایک حق پر مبنی قانون ہے۔ یہ قانون دیہی خاندانوں کو مزدوری پر روزگار کا مطالبہ کرنے کا قانونی حق دیتا ہے۔ اس کے تحت ریاستی حکومتوں کے لیے 15 دن کے اندر کام فراہم کرنا لازمی ہے، بصورت دیگر بے روزگاری بھتہ دینا پڑتا ہے۔ یہی قانونی ضمانت منریگا کی سب سے بڑی پہچان ہے۔

دیہی روزگار کی ریڑھ کی ہڈی ہے منریگا

کانگریس کا کہنا ہے کہ منریگا دیہی روزگار کی ریڑھ کی ہڈی رہا ہے، جس کے ذریعے ہر سال 5 سے 6 کروڑ خاندانوں کو روزگار ملتا ہے۔ اس اسکیم سے مجبوری میں ہونے والی ہجرت میں کمی آئی ہے، دیہی مزدوری میں اضافہ ہوا ہے اور دیہات میں پائیدار اجتماعی اثاثے وجود میں آئے ہیں۔ اس منصوبے سے خواتین، دلتوں، آدیواسیوں اور محروم طبقات کو خصوصی فائدہ پہنچا ہے۔ مجموعی کام کے دنوں میں خواتین کی شراکت داری تقریباً 60 فیصد بتائی جاتی ہے۔

کانگریس کا جی رام جی ایکٹ پر سخت اعتراض

کانگریس نے نئے وکست بھارت جی رام جی ایکٹ پر سخت اعتراض ظاہر کیا ہے۔ پارٹی کا الزام ہے کہ یہ نیا قانون منریگا کی بنیادی روح کے بالکل برخلاف ہے۔ اس سے کام کی قانونی ضمانت ختم ہو جاتی ہے، فیصلوں کا اختیار مرکز کے ہاتھ میں چلا جاتا ہے اور گرام سبھاؤں و پنچایتوں کا کردار کمزور ہو جاتا ہے۔ اس کے ساتھ ہی مرکزی حکومت کے مزدوری اخراجات میں حصہ داری کو تقریباً 90 فیصد سے گھٹا کر 60 فیصد کرنے کی بات کہی گئی ہے، جس سے مالی بوجھ ریاستوں اور مزدوروں پر پڑے گا۔ بجٹ کی حد بندی، زرعی مصروف موسم میں کام پر پابندی اور مزدوری کے تحفظ سے متعلق کمزور دفعات کے باعث روزگار میں کمی اور دیہی بحران کے بڑھنے کا خدشہ ظاہر کیا گیا ہے۔

کانگریس ورکنگ کمیٹی کی میٹنگ میں فیصلہ

کانگریس نے یہ بھی کہا کہ اس اسکیم سے مہاتما گاندھی کا نام ہٹانا محنت کی وقار اور گرام سوراج کی اقدار کو کمزور کرنے کے مترادف ہے۔ انہی وجوہات کی بنا پر کانگریس ورکنگ کمیٹی نے 27 دسمبر کو منعقدہ اجلاس میں متفقہ طور پر ’’منریگا بچاؤ سنگرام‘‘ کے نام سے ملک گیر تحریک شروع کرنے کا فیصلہ کیا۔

تحریک کے تحت طے ہوں گے مرحلہ وار پروگرام

اس تحریک کے تحت مرحلہ وار پروگرام طے کیے گئے ہیں۔ منصوبے کے مطابق، پہلے پی سی سی ہیڈکوارٹرز میں اجلاس ہوں گے، جن میں نئے قانون کے اثرات پر غور کیا جائے گا اور ضلع وار ذمہ داریاں طے کی جائیں گی۔ 10 جنوری کو تمام اضلاع میں ڈی سی سی دفاتر پر پریس کانفرنس کے ذریعے مہم کا باضابطہ آغاز کیا جائے گا۔ 11 جنوری کو ضلع ہیڈکوارٹرز یا اہم عوامی مقامات پر ایک روزہ علامتی بھوک ہڑتال اور احتجاج ہوگا، جس میں پارٹی لیڈران، منتخب نمائندے اور منریگا مزدور شریک ہوں گے۔

وارڈ اور بلاک سطح پر 30 جنوری کو پُرامن دھرنا

پنچایت سطح پر 12 سے 29 جنوری تک چوپالیں، عوامی رابطہ پروگرام، نکڑ اجلاس اور پمفلٹ تقسیم کیے جائیں گے۔ وارڈ اور بلاک سطح پر 30 جنوری کو پُرامن دھرنے دیے جائیں گے۔ 31 جنوری سے 6 فروری کے درمیان ضلع کلکٹر اور ضلع مجسٹریٹ دفاتر کے سامنے دھرنا دے کر میمورنڈم پیش کیے جائیں گے۔ 7 سے 15 فروری تک ریاستی سطح پر اسمبلیوں کا گھیراؤ کیا جائے گا۔ مہم کے آخری مرحلے میں 16 سے 25 فروری کے درمیان اے آئی سی سی کی جانب سے چار بڑی علاقائی ریلیاں منعقد کی جائیں گی۔

بھارت ایکسپریس۔