خوابوں کی نگری ممبئی کے ملاڈ ایسٹ میں واقع شاردا گیان پیٹھ انٹرنیشنل اسکول میں 22 اگست کی شام ’کجری مہوتسو 2026‘ کا شاندار انعقاد کیا گیا۔ بھارت ایکسپریس نیوز چینل اور بھومیہار جاگرن منچ کے مشترکہ زیر اہتمام منعقدہ اس پروگرام میں پوروانچل کی ثقافتی وراثت اور لوک روایات کی خوبصورت جھلک دیکھنے کو ملی۔تقریب کے آغاز سے قبل بھارت ایکسپریس کے چیئرمین، مینیجنگ ڈائریکٹر (CMD) اور ایڈیٹر اِن چیف اپیندر رائے اور لوک گائیکی کی معروف فنکارہ پدم شری مالنی اوستھی نے صحافیوں سے گفتگو کی اور ساون، لوک ثقافت اور اپنی مٹی سے جڑے اپنے تجربات شیئر کیے۔
’ساون فطرت اور انسان کے گہرے رشتے کا مہینہ ہے‘
صحافیوں سے بات چیت کرتے ہوئے بھارت ایکسپریس کے CMD اپیندر رائے نے کہا کہ کسی پروگرام کا پیمانہ چھوٹا ہے یا بڑا، اس سے زیادہ اہمیت نہیں ہوتی۔ اصل اہمیت اس بات کی ہے کہ وہاں سے کیا پیغام دیا جا رہا ہے۔ اپنے ابتدائی دنوں کو یاد کرتے ہوئے انہوں نے کہا، ’’میں غازی پور کے شیرپور گاؤں سے آتا ہوں۔ دسویں جماعت کے بعد جب گاؤں چھوڑا تو لکھنؤ اور پھر دسمبر 1999 میں ممبئی آیا۔ گاؤں اور شہر کے سنسکاروں کے فرق کو میں نے بہت قریب سے محسوس کیا ہے۔ ساون کا مہینہ دراصل موسیقی اور خوشحالی کا مہینہ ہوتا ہے۔ اس موسم میں بادل برستے ہیں، زمین ہری بھری ہوجاتی ہے اور فطرت و انسان کے درمیان ایک گہرا رشتہ قائم ہوتا ہے۔ ممبئی جیسے عظیم شہر میں شمالی ہند کے لوگوں کا اپنی مٹی کی خوشبو اور ثقافت کو محفوظ رکھنا اور اس طرح کا پروگرام منعقد کرنا انتہائی خوشی کی بات ہے۔‘‘
’ساون پورے سال کے لیے غذا اور توانائی دیتا ہے‘
معروف لوک گلوکارہ پدم شری مالنی اوستھی نے ممبئی میں آباد شمالی ہندوستانی برادری کی تعریف کرتے ہوئے کہا کہ اس برادری نے ممبئی میں اپنی ثقافت کا پودا لگایا ہے اور اس کی خوشبو پوری سرزمین کو معطر کر رہی ہے۔ انہوں نے کہا، ’’بھومیہار سماج بہت محنتی، علم دوست، ترقی پسند اور وسیع سوچ رکھنے والا سماج ہے۔ ساون کا یہ مقدس مہینہ ہم سب کو، خاص طور پر فنکاروں کو، پورے سال کے لیے سوچنے کی توانائی اور غذا فراہم کرتا ہے۔ رکشا بندھن سے عین قبل اس مقدس مہینے میں کجری، جھولا اور ملہار گانے کا موقع ملنا خوش قسمتی کی بات ہے۔‘‘کجری مہوتسو کے ذریعے ممبئی میں پوروانچل کی لوک روایت، موسیقی اور ثقافتی ورثے کو نئی نسل تک پہنچانے کی ایک خوبصورت کوشش سامنے آئی، جہاں ساون کی رومانویت کے ساتھ اپنی مٹی اور تہذیبی جڑوں سے وابستگی کا احساس بھی نمایاں رہا۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
