At least 14 killed, 7 injured in Kolkata: کولکاتہ کے ایک ہوٹل میں لگی خوفناک آگ،14 افراد ہلاک، نصف درجن سے زائد زخمی

مغربی بنگال میں کولکاتہ کے میچواپٹی علاقے میں منگل کی رات ایک ہوٹل میں آگ لگ گئی۔ حادثے میں 14 افراد ہلاک ہو گئے ہیں۔ جبکہ کئی دیگر زخمی ہو گئے ہیں ۔ فائر بریگیڈ کی گاڑیوں نے موقع پر پہنچ کر آگ پر قابو پالیا۔ کولکاتہ کے پولیس کمشنر منوج کمار ورما کے مطابق رات تقریباً 8 بجکر 15 منٹ پر رتوراج ہوٹل کے احاطے میں آگ لگی، جس کے بعد برہ بازار کے بھیڑ بھاڑ والے علاقے میں خوف و ہراس پھیل گیا۔ کئی لوگوں کو عمارت کی کھڑکیوں اور تنگ دیواروں سے فرار ہونے کی کوشش کرتے دیکھا گیا۔ اس دوران چوتھی منزل سے چھلانگ لگانے کی کوشش میں کئی لوگ زخمی ہو گئے۔ انہوں نے کہا کہ 14 لاشیں نکال لی گئی ہیں اور ٹیموں نے کئی لوگوں کو بچا لیا ہے۔ انہوں نے کہا کہ آگ پر قابو پا لیا گیا ہے اور امدادی کارروائیاں جاری ہیں۔ مزید تفتیش جاری ہے۔ تحقیقات کے لیے خصوصی ٹیم بھی تشکیل دے دی گئی ہے۔ انہوں نے کہا کہ آگ لگنے کی وجہ ابھی تک معلوم نہیں ہو سکی ہے۔ تاہم انہوں نے شبہ ظاہر کیا ہے کہ آگ شارٹ سرکٹ کی وجہ سے لگی ہے۔

اطلاع ملنے پر فائر بریگیڈ کی 10 گاڑیوں نے موقع پر پہنچ کر آگ پر قابو پالیا۔ تاہم یہ پرہجوم علاقہ ہونے کی وجہ سے فائر بریگیڈ کی گاڑیوں کو وہاں پہنچنے میں مشکلات کا سامنا کرنا پڑا اور عملے کو بھی پریشانی کا سامنا کرنا پڑا۔  یا د رہے کہ  برہ بازار مشرقی ہندوستان کا سب سے بڑا ہول سیل بازار ہے۔کولکاتہ کے میئر فرہاد حکیم اور پولیس کمشنر منوج ورما نے جائے حادثہ کا دورہ کیاہے۔ اس کے علاوہ، ریاستی بی جے پی صدر سکانتا مجمدار نے لوگوں کی موت پر تعزیت کا اظہار کیا۔ انہوں نے انسٹاگرام پر پوسٹ کیا کہ کولکاتہ کے برہ بازار کے میچوا علاقے میں ایک ہوٹل میں لگنے والی زبردست آگ میں 14 افراد کی موت سے مجھے بہت دکھ ہوا ہے۔ میں مستقبل میں ایسے المناک واقعات کو روکنے کے لیے آگ سے حفاظت کے اقدامات کا مکمل جائزہ لینے اور مزید سخت نگرانی کی اپیل کرتا ہوں۔

مغربی بنگال کانگریس کے صدر سبھانکر سرکار نے اس واقعہ پر ردعمل ظاہر کیا۔ انہوں نے کولکاتہ کارپوریشن پر بھی تنقید کی۔ حکومت نے کہا کہ یہ ایک افسوسناک واقعہ ہے۔ کئی لوگ اب بھی عمارت میں پھنسے ہوئے ہیں۔ کوئی حفاظت یا سیکورٹی نہیں تھی۔ مجھے نہیں معلوم کہ کارپوریشن کیا کر رہی ہے۔