ایشین ڈویلپمنٹ بینک (ADB) کے صدر ماساتو کانڈا نے بھارت میں شہری ترقی کے لیے آئندہ پانچ برسوں میں 10 ارب امریکی ڈالر تک کی سرمایہ کاری کا اعلان کیا ہے۔ یہ سرمایہ کاری خودمختار قرضوں، نجی شعبے کی فائنانسنگ اور تیسرے فریق کے سرمائے پر مشتمل ہوگی۔ ADB کے مطابق اس سرمایہ کاری کا مقصد میٹرو نظام کی توسیع، علاقائی ریپڈ ٹرانزٹ سسٹم (RRTS) کی نئی راہداریوں اور شہری انفراسٹرکچر و سہولیات کو فروغ دینا ہے۔ صدر ماساتو کانڈا نے دہلی میں وزیراعظم نریندر مودی سے ملاقات کے بعد کہا کہ ’’شہر ترقی کے انجن ہیں اور ADB بھارت کی شہری معیشت کو متحرک رکھنے اور ’وکست بھارت @ 2047‘ کے ہدف تک پہنچنے کے لیے معاونت فراہم کرے گا۔‘‘
’’اربن چیلنج فنڈ‘‘ کے تحت نجی سرمایہ کاری کی راہ ہموار
یہ منصوبہ بھارت کے فلیگ شپ ’’اربن چیلنج فنڈ (UCF)‘‘ سے مربوط ہے، جسے ADB کی مدد سے تیار کیا جا رہا ہے تاکہ شہری منصوبوں میں نجی سرمایہ کاری کو فروغ دیا جا سکے۔ دریں اثنا ADB تین ملین ڈالر کی تکنیکی معاونت بھی فراہم کرے گا تاکہ منصوبے فائنانس کے قابل بن سکیں اور ریاستی و مقامی شہری اداروں کی صلاحیت میں اضافہ ہو۔
بھارت میں ADB کی موجودہ سرگرمیاں
ADB نے اب تک بھارت کے 22 ریاستوں میں 110 سے زائد شہروں میں پانی، صفائی، رہائش، اور فضلہ انتظام جیسے منصوبوں پر کام کیا ہے۔ شہری ٹرانسپورٹ کے حوالے سے گزشتہ دہائی میں 8 شہروں کے لیے 300 کلومیٹر طویل میٹرو اور RRTS منصوبوں میں 4 ارب ڈالر کی سرمایہ کاری کی ہے، جن میں دہلی-میرٹھ RRTS، ممبئی، ناگپور، چنئی، اور بنگلورو میٹرو شامل ہیں۔
ADB کا طویل مدتی عزم
دریں اثنا اے ڈی بی کے صدر ماساتو کانڈا نے بھارت کے وزیر خزانہ نرملا سیتا رمن اور وزیر برائے شہری ترقی منوہر لال سے ملاقات کی۔ اس کے علاوہ انھوں نے دہلی-میرٹھ RRTS راہداری کا دورہ کیا اور ان خواتین سے بھی ملاقات کی جنھیں ADB کے منصوبوں کے تحت تربیت دی گئی ہے۔ ساتھ ہی گڑگاؤں میں رینیو انرجی کمپنی کا دورہ کر کے قابل تجدید توانائی کے شعبے میں اشتراک پر گفتگو کی۔ واضح رہے کہ ADB نے 1986 میں بھارت میں کام کا آغاز کیا تھا۔ اپریل 2025 تک ADB کی بھارت میں خودمختار سرمایہ کاری 59.5 ارب ڈالر اور غیر خودمختار سرمایہ کاری 9.1 ارب ڈالر تک پہنچ چکی ہے۔ موجودہ خودمختار منصوبہ جات کی مالیت 16.5 ارب ڈالر ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
