National Cooperation Policy 2025: امت شاہ نے پی ایم مودی کے ’’آتم نربھر بھارت وژن ‘‘کے تحت قومی تعاون پالیسی 2025 کا کیا آغاز، جامع ترقی اور خود انحصاری کو فروغ دینے پر توجہ

مرکزی وزیر داخلہ و تعاون امت شاہ نے 24 جولائی 2025 کو قومی تعاون پالیسی 2025 (NCP) قوم کے نام وقف کی۔ اس پالیسی کا مقصد وزیر اعظم نریندر مودی کے وژن ’’سہکار سے سمردھی‘‘ (تعاون سے خوش حالی) کو عملی جامہ پہنانا ہے۔ یہ پالیسی ایک جامع، حقیقت پسندانہ اور سب کو شامل کرنے والا فریم ورک مہیا کرتی ہے، جو بھارت کو 2047 تک ترقی یافتہ ملک بنانے کے خواب سے ہم آہنگ ہے۔

مرکزی وزیر داخلہ نے اس موقع پر کہا کہ کوآپریٹوز (تعاون پر مبنی ادارے) دیہی معیشت کی ریڑھ کی ہڈی ہیں، جو کسانوں، ہنرمندوں اور چھوٹے کاروباریوں کو معاشی خودمختاری فراہم کرتے ہیں۔ یہ پالیسی نہ صرف ان اداروں کو مضبوط کرے گی بلکہ انھیں عالمی سطح پر مسابقتی کاروباری اداروں میں تبدیل کرنے کی بنیاد فراہم کرے گی۔ اس پالیسی میں شفافیت، شراکت داری، ٹیکنالوجی کے استعمال اور پیشہ ورانہ نظم و نسق کو فروغ دینے پر زور دیا گیا ہے۔ اس کے تحت نوجوانوں اور خواتین کی شمولیت کو ترجیح دی جائے گی تاکہ کوآپریٹو نظام کو عصری تقاضوں سے ہم آہنگ کیا جا سکے۔

پالیسی میں مختصر، درمیانی اور طویل مدتی اصلاحات کی نشاندہی کی گئی ہے جن کے لیے ریاستی اور مرکزی حکومتوں کے درمیان بہتر ہم آہنگی ضروری ہے۔ اس میں موجودہ قوانین میں ہم آہنگی، شفاف حکمرانی اور فعال رکنیت کو یقینی بنانے جیسے اہم اہداف شامل ہیں۔ ساتھ ہی ابھرتے ہوئے شعبوں جیسے شمسی توانائی، نامیاتی کاشتکاری، ڈرون خدمات، مصنوعی ذہانت، ای کامرس، فِن ٹیک، صحت اور ویسٹ مینجمنٹ میں کوآپریٹوز کے قیام کی حوصلہ افزائی کی جائے گی۔ پالیسی میں اس بات پر زور دیا گیا ہے کہ کوآپریٹوز کو ٹیکنالوجی سے لیس، منافع بخش اور پائیدار ادارے بنایا جائے تاکہ وہ ملک کی معیشت میں مؤثر کردار ادا کر سکیں۔ اس سلسلے میں تمام ریاستوں اور مرکز کے زیر انتظام علاقوں کے ساتھ مل کر رکاوٹیں دور کرنے، مکمل ڈیجیٹلائزیشن اور کاروبار میں آسانی جیسے اقدامات کیے جائیں گے۔

بھارت ایکسپریس اردو