ممبئی کے معروف عالم دین مفتی منظور ضیائی کی تصنیف وقف ترمیمی قانون ۲۰۲۵: فائدے اور نقصانات کا اجرا ممبئی کے بعد ناسک، مالیگاوں اور جلگاوں شہر میں عمل میں آیا۔ اس موقع پر مفتی علاوالدین رضوی (شہر قاضی، ضلع تھانے مہاراشٹر)، مولانا اخلاق نظامی (جنرل سیکریٹری، آل انڈیا علما بورڈ ممبئی) کے ساتھ ناسک شہر کی معروف شخصیات نے بھی شرکت کی۔ کتاب کے اجرا کے بعد مفتی منظور ضیائی نے ناسک شہر کے عظیم بزرگ شہنشاہ ناسک حضرت پیر سید صادق شاہ حسینی مدنی چشتی قادری کی بارگاہ میں حاضری دی۔ اس کے ساتھ ہی آپ نے خطیب شہر (ناسک)، کانپور شہر کے مفتی اور ناسک شہر کے پولیس کمشنر سندیپ کرنک سے خصوصی ملاقات کی اور ان کو یہ کتاب تحفتا پیش کی۔ اس کے بعد مفتی منظور نے مالیگاوں کی علمی و ادبی شخصیات سے بھی ملاقات کی نیز جلگاوں میں بھی شہر کی سرکردہ شخصیات نے ملاقات کی اور کتاب کے اجرا پر مفتی صاحب کو مبارکباد پیش کرتے ہوئے اس کتاب کو وقت کی اہم ضرورت قرار دیا۔
مفتی منظور ضیائی نے مالیگاوں کے مشہور عالم دین مولانا محمودالحسن کے یہاں منعقد ایک اہم نشست میں شرکت کی جس میں مالیگاوں شہر کی کئی سرکردہ شخصیات موجود تھیں۔ اس کے ساتھ ہی مالیگاوں کی مشہور کاروباری شخصیت عبید مرزا کی رہائش گاہ پر بھی ایک رسمی ملاقات کا اہتمام کیا گیا جہاں مفتی صاحب نے جناب عبید مرزا کو تحفتا کتاب پیش کی۔ نیز مفتی صاحب نے ہمدم پرنٹنگ پریس کا بھی دورہ کیا اور ان کے کاموں کی ستائش کی۔ مفتی منظور ضیائی نے میڈیا سے خطاب کرتے ہوئے کہا کہ وقف ترمیمی قانون ۲۰۲۵ پر ملک بھر میں چرچہ تیز ہونے پر ہم نے یہ فیصلہ کیا کہ اس سلسلے میں ملک کے کونے کونے میں بسے مسلمانوں سے رابطہ کیا جائے اور ان سے وقف کے تعلق سے بات چیت کی جائے جس کے بعد ہمیں اکثریت کی طرف سے اس انتہائی اہم اور سلگتے ہوئے مسئلے پر امت مسلمہ کی رہنمائی کے لئے ایک کتاب تحریر کرنے کا اصرار کیا گیا۔ ہم نے اس کا احترام کرتے ہوئے کتاب لکھنے کے لئے تگ و دو شروع کی اور دن رات کی انتھک کوششوں اور تقریبا ملک بھر میں بیس ہزار افراد سے رابطہ کیا گیا اور انتہائی سنجیدگی و سخت محنت و مطالعہ سے یہ کتاب اپنی تکمیل کو پہنچی۔
مفتی منظور ضیائی نے کہا کہ اس کتاب کے منظر عام پر آنے سے ان لوگوں کے پیٹ میں یقینا درد ہوگا جنہوں نے وقف کی املاک میں خردبرد کی ہوگی چونکہ جو املاک ایک بار وقف کر دی جاتی ہے اس کے بعد اس کو وقف کرنے والے کا بھی اس پر اختیار نہیں رہتا اور یہ اللہ کی امانت ہو جاتی ہے لہذا جن لوگوں نے امانت میں خیانت کی ہوگی وہ یہاں بھی اور روز محشر اللہ کی بارگاہ میں بھی اپنا منہ نہیں دکھا پائیں گے۔ مفتی منظور نے کہا کہ آخر یہ کتاب پڑھنا کیوں ضروری ہے؟ انہوں نے کہا کہ اس کتاب کے مطالعہ سے لوگ وقف کے بارے میں جانیں گے اور اپنے حقوق سے واقف ہوں گے۔ ورنہ جس طرح سے وہ آج تک اسکول، اسپتال و دیگر سہولیات سے محروم ہیں، مستقبل میں بھی انہیں اس سے جوجھنا پڑے گا۔ انہوں نے زور دیتے ہوئے کہا کہ امت مسلمہ کا ہر فرد وقف ترمیمی قانون ۲۰۲۵ کو پڑھیں اور اس میں جو فائدے ہیں اس کو لے لیں اور جو نقصانات ہیں، اس کے خلاف قانونی طریقے سے جنگ لڑیں۔ انہوں نے کہا کہ ہم ملک بھر میں تین ہزار کتابیں وقف کریں گے تاکہ لوگوں تک کتاب پہنچ سکے۔ اس کے ساتھ ہی ہم یہ بتانا چاہتے ہیں کہ آپ امیزون اور فلپ کارٹ سے بھی آن لائن آرڈر کر کے اس کتاب کو حاصل کر سکتے ہیں۔ ایک سوال کے جواب میں مفتی منظور ضیائی نے کہا کہ ابھی ہم نے اردو زبان میں کتاب کا اجرا کیا ہے اور ہماری کوشش ہے کہ ہم اس کتاب کو مراٹھی، ہندی، انگریزی اور گجراتی زبان میں بھی جلد سے جلد لوگوں تک پہنچائیں تاکہ لوگوں تک وقف سے متعلق اہم معلومات پہنچ سکے۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
