سڈنی: آسٹریلوی پولیس نے ایک جرائم پیشہ گروہ کے خلاف بڑی کارروائی کرتے ہوئے 270 کلوگرام سے زائد غیر قانونی منشیات ضبط کی ہیں اور 18 افراد کو گرفتار کیا ہے۔ پولیس کے مطابق یہ کارروائی نیو ساوتھ ویلز ، ویسٹرن آسٹریلیا اور آسٹریلین فیڈرل پولیس کی مشترکہ آپریشنل ٹیم نے انجام دی۔ منگل کو جاری ایک سرکاری بیان کے مطابق یہ گرفتاریاں اُس مشترکہ اسٹرائیک فورس کے تحت کی گئیں جو 2025 کے اوائل میں بڑے پیمانے پر منشیات کی اسمگلنگ کرنے والے نیٹ ورک کی تحقیقات کے لیے تشکیل دی گئی تھی۔
پولیس نے بتایا کہ مئی سے اکتوبر کے درمیان نیو ساوتھ ویلز اور ویسٹرن آسٹریلیا میں 30 تلاشی کارروائیاں کی گئیں۔ اس دوران 150 کلو سیوڈوایفیڈرین، 95 کلو میتھ ایمفیٹامائن، 21 کلو کیٹامین، 2 کلو کوکین، 14 آتشیں اسلحے، تقریباً 24 لاکھ آسٹریلوی ڈالر نقدی (یعنی 15 لاکھ امریکی ڈالر) اور منشیات تیار کرنے کے لیب کے آلات ضبط کیے گئے۔ پولیس نے بتایا کہ گرفتار شدہ 18 مشتبہ افراد میں سے 11 کا تعلق ویسٹرن آسٹریلیا سے ہے۔ ان پر غیر قانونی منشیات کی اسمگلنگ، سپلائی اور جرائم پیشہ گروہ میں شمولیت کے الزامات عائد کیے گئے ہیں۔
تحقیقات کے مطابق، نیٹ ورک کے اراکین نے پلاسٹک سے لپٹے جوتوں کی ترسیل میں منشیات چھپا کر سمندری راستے سے ملک میں اسمگل کیں۔ بعد ازاں یہ منشیات ڈاک اور ہوائی پروازوں کے ذریعے مختلف ریاستوں میں پہنچائی جاتی تھیں۔ سین ہوا خبر رساں ایجنسی کے مطابق، ضبط شدہ منشیات کی کل مالیت تقریباً 60 ملین آسٹریلوی ڈالر (یعنی 37.5 ملین امریکی ڈالر) بتائی گئی ہے۔
قبل ازیں 19 اکتوبر کو نیو ساوتھ ویلز پولیس نے ریاست کے جنوب مغربی حصے میں ایک اور کارروائی کے دوران 5 کلو سے زائد میتھ ایمفیٹامائن اور 11 کلو کوکین ضبط کی تھی جن کی مشترکہ مالیت 6.3 ملین آسٹریلوی ڈالر (تقریباً 4.09 ملین امریکی ڈالر) تھی۔ اس دوران پولیس نے ہیے علاقے کے اسٹورٹ ہائی وے پر ایک سیاہ کار روکی۔ 30 سالہ ڈرائیور کا منشیات ٹیسٹ مثبت آنے پر گاڑی کی تلاشی لی گئی، جس میں کثیر مقدار میں کوکین، 1.3 لاکھ ڈالر نقد اور دو موبائل فون برآمد ہوئے۔ ملزم کو موقع پر گرفتار کر کے سات الزامات کے تحت مقدمہ درج کیا گیا۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
