آسیان سربراہی اجلاس 26 سے 28 اکتوبر تک ملائیشیا کے کوالالمپور میں منعقد کیا جائے گا۔ اس اجلاس میں شرکت کے لیے وزیراعظم نریندر مودی ملائیشیا نہیں جائیں گے بلکہ وہ ڈیجیٹل ذرائع سے اجلاس میں حصہ لیں گے۔ وزیراعظم نے اس بات کی اطلاع سوشل میڈیا پلیٹ فارم ایکس پر دی ہے۔ وزیراعظم مودی نے ایکس پر پوسٹ کیا کہ ، ’’میرے عزیز دوست، ملائیشیا کے وزیراعظم انور ابراہیم کے ساتھ گرمجوشی سے بات چیت ہوئی۔ انہیں ملائیشیا کی آسیان صدارت پر مبارکباد دی اور آئندہ منعقد ہونے والے سربراہی اجلاس کی کامیابی کے لیے نیک خواہشات کا اظہار کیا۔ آسیان-بھارت سربراہی اجلاس میں ورچوئل طور پر شامل ہونے اور آسیان-بھارت کی وسیع تر اسٹریٹجک شراکت داری کو مزید مضبوط بنانے کے لیے پرجوش ہوں۔‘‘
ملائیشیا کے وزیراعظم انور ابراہیم نے کیا کہا؟
ملائیشیا کے وزیراعظم انور ابراہیم نے بھی ایکس پر لکھا کہ، ’’ کل رات مجھے بھارت کے وزیراعظم نریندر مودی کے قریبی معاون کا فون آیا، جس میں ملائیشیا-بھارت دو طرفہ تعلقات کو مزید اسٹریٹجک اور وسیع سطح پر مضبوط کرنے کی کوششوں پر بات ہوئی۔ ٹیکنالوجی، تعلیم اور علاقائی سلامتی کے شعبوں میں قریبی تعاون کے علاوہ بھارت، تجارت اور سرمایہ کاری کے میدان میں ملائیشیا کا اہم شراکت دار بنا ہوا ہے۔‘‘ انہوں نے کہا کہ ہم نے اس ماہ کے آخر میں کوالالمپور میں 47ویں آسیان سربراہی اجلاس کی میزبانی پر بھی بات کی۔ بھارت کے وزیراعظم نے مجھے بتایا کہ وہ ورچوئل طور پر شرکت کریں گے کیونکہ اس وقت بھارت میں دیوالی کا تہوار منایا جا رہا ہے۔ میں ان کے فیصلے کا احترام کرتا ہوں اور انہیں اور بھارت کے تمام عوام کو دیوالی کی مبارکباد دیتا ہوں۔ ملائیشیا بھارت کے ساتھ تعلقات کو مضبوط کرنے اور ایک زیادہ پرامن اور خوشحال خطے کے لیے آسیان-بھارت تعاون کو فروغ دینے کے لیے پرعزم ہے۔
بہار کے انتخابات کی وجہ سے ملائیشیا کا دورہ ملتوی
بہار میں دو مرحلوں میں 6 اور 11 نومبر کو اسمبلی انتخابات ہونے ہیں۔ انتخابی تیاریوں کے باعث وزیراعظم مودی آسیان اجلاس میں شرکت کے لیے ملائیشیا نہیں جائیں گے۔ گزشتہ دس سال میں یہ دوسرا موقع ہے جب بھارت کے وزیراعظم آسیان سربراہی اجلاس میں شرکت نہیں کر رہے۔ اس سے پہلے 2022 میں ہماچل پردیش اور گجرات کے انتخابات کے دوران بھی وہ آسیان اجلاس میں موجود نہیں تھے۔
47ویں آسیان سربراہی اجلاس کا انعقاد
ملائیشیا 47ویں آسیان سربراہی اجلاس اور متعلقہ اجلاسوں کی میزبانی کی تیاری کر رہا ہے۔ اجلاس میں 30 سے زائد سربراہان مملکت اور حکومتیں کوالالمپور کنونشن سینٹر میں جمع ہوں گی۔ آسیان ممالک کے علاوہ امریکہ، چین، جاپان، جنوبی کوریا، آسٹریلیا، نیوزی لینڈ اور کینیڈا جیسے اہم شراکت دار بھی اس اجلاس میں شامل ہو سکتے ہیں۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
