ویلنگٹن: ہندوستان اور نیوزی لینڈ کے درمیان پہلا ٹیسٹ میچ بیسن ریزرو میں کھیلا جا رہا ہے۔ ٹیسٹ کے تیسرے دن ہندوستانی کپتان شبھمن گل نے شاندار بلے بازی کرتے ہوئے 98 رنز کی بہترین اننگز کھیلی۔ تاہم، وہ اپنی سنچری سے محض 2 رنز دور رہ گئے۔ اس کے باوجود اپنی اس اننگز کے دوران گل نے ایک تاریخی کامیابی اپنے نام کرلی۔
ڈبلیو ٹی سی میں 3000 رنز بنانے والے پہلے ہندوستانی بلے باز
شبھمن گل ورلڈ ٹیسٹ چیمپئن شپ (ڈبلیو ٹی سی) میں ہندوستان کی جانب سے 3000 رنز مکمل کرنے والے پہلے بلے باز بن گئے ہیں۔ انہوں نے 98 رنز کی اپنی اننگز کے دوران یہ اہم سنگ میل عبور کیا۔ گل نے 146 گیندوں کا سامنا کرتے ہوئے 9 چوکے اور 2 چھکے لگائے۔ انہوں نے کے ایل راہل کے ساتھ تیسری وکٹ کے لیے 91 رنز کی شراکت داری کی، جبکہ رشبھ پنت کے ساتھ چوتھی وکٹ کے لیے سنچری شراکت قائم کی۔ گل تیسرے دن کے آخری اوور میں جیکب ڈفی کی گیند پر کلین بولڈ ہوگئے۔
رشبھ پنت بھی 3000 رنز مکمل کرنے والے دوسرے ہندوستانی بنے
شبھمن گل کے ساتھ رشبھ پنت نے بھی ورلڈ ٹیسٹ چیمپئن شپ میں 3000 رنز مکمل کرلیے ہیں۔ وہ یہ کامیابی حاصل کرنے والے دوسرے ہندوستانی بلے باز بن گئے ہیں۔ ٹیسٹ کے تیسرے دن پنت بھی اچھی فارم میں نظر آئے۔ انہوں نے 55 گیندوں میں اپنی نصف سنچری مکمل کی۔ وہ 62 گیندوں پر 55 رنز بناکر ناٹ آؤٹ ہیں۔ اپنی اننگز میں اب تک وہ 5 چوکے اور 2 چھکے لگا چکے ہیں۔
ہندوستان نے پہلی اننگز میں بنائے 486 رنز
دن کا کھیل ختم ہونے تک ہندوستانی ٹیم نے پہلی اننگز میں 4 وکٹوں کے نقصان پر 486 رنز بنا لیے تھے۔ کے ایل راہل نے شاندار بلے بازی کرتے ہوئے سنچری اسکور کی۔ انہوں نے 290 گیندوں پر 9 چوکوں اور 2 چھکوں کی مدد سے 136 رنز بنائے۔ وہیں، دیودت پڈیکل نے 175 گیندوں میں 80 رنز کی عمدہ اننگز کھیلی، جبکہ یشسوی جیسوال نے 85 رنز کا تعاون دیا۔
ہندوستانی بلے بازوں کے سامنے نیوزی لینڈ کے گیند باز تیسرے دن پوری طرح بے بس نظر آئے اور پورے دن کے کھیل میں صرف 3 وکٹیں حاصل کرسکے۔ واضح رہے کہ نیوزی لینڈ کی پوری ٹیم پہلی اننگز میں 368 رنز بناکر آل آؤٹ ہوگئی تھی۔
بھارت ایکسپریس۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔


