Bharat Express DD Free Dish

Kulgam Encounter: جموں و کشمیر کے کولگام میں سکیورٹی فورسز نے ایک دہشت گرد کو گھیرا، خودسپردگی سے انکار کے بعد انکاؤنٹر شروع

کولگام میں سکیورٹی فورسز نے لشکر طیبہ کے کمانڈر لطیف نامی ایک دہشت گرد کو گھیر رکھا ہے۔ ایک ویڈیو میں فوجی افسران مسلسل دہشت گرد لطیف سے ہتھیار ڈالنے اور خودسپردگی کرنے کی اپیل کرتے نظر آئے۔

کولگام: جموں و کشمیر کے کولگام میں جاری انسداد دہشت گردی آپریشن کے دوران سکیورٹی فورسز نے ایک دہشت گرد کو گھیر لیا ہے۔ ذرائع کے مطابق، سکیورٹی اہلکاروں نے اسے خودسپردگی کا موقع دیا، لیکن اس نے ہتھیار ڈالنے سے انکار کردیا۔ اس کے بعد سکیورٹی فورسز اور دہشت گرد کے درمیان انکاؤنٹر شروع ہوگیا۔

لشکر کے کمانڈر لطیف کو گھیرے میں لینے کا دعویٰ

ذرائع کے مطابق، کولگام میں سکیورٹی فورسز نے لشکر طیبہ کے کمانڈر لطیف نامی ایک دہشت گرد کو گھیر رکھا ہے۔ ایک ویڈیو میں فوجی افسران مسلسل دہشت گرد لطیف سے ہتھیار ڈالنے اور خودسپردگی کرنے کی اپیل کرتے نظر آئے۔ ایک افسر کو دہشت گرد لطیف سے یہ کہتے ہوئے سنا گیا، ’’ہم تمہارے ساتھ ہیں۔‘‘ تاہم، اس نے خودسپردگی سے انکار کردیا۔ فی الحال دہشت گرد اور سکیورٹی فورسز کے درمیان انکاؤنٹر جاری ہے۔

کئی گاؤں میں گھر گھر تلاشی مہم جاری

یہ انکاؤنٹر ایک بڑے تلاشی آپریشن کے دوران ہوا ہے، جو کولگام ضلع کے کئی علاقوں میں مسلسل جاری ہے۔ اس آپریشن کے تحت سکیورٹی فورسز کئی گاؤں میں گھر گھر جاکر تلاشی لے رہی ہیں۔ اس مشترکہ آپریشن میں فوج کی 9 راشٹریہ رائفلز، سی آر پی ایف اور جموں و کشمیر پولیس شامل ہیں۔

آپریشن کے پہلے دن ایک مشتبہ دہشت گرد ہلاک

آپریشن کے پہلے دن پیر کے روز ایک مشتبہ دہشت گرد مارا گیا تھا۔ سکیورٹی فورسز نے سی سی ٹی وی فوٹیج جاری کرکے تفصیلات فراہم کی تھیں کہ کس طرح عمر نے اکھران حملے کو انجام دینے میں لطیف بھٹ کی مدد کی اور کس طرح لطیف دوبارہ سرگرم ہوگیا۔

22 سالہ لطیف بھٹ پر 15 لاکھ روپے کا انعام

ذرائع کے مطابق، 22 سالہ لطیف بھٹ وادی کشمیر میں لشکر طیبہ کا آخری سرگرم مقامی کمانڈر ہے۔ وہ کولگام کے کھیون چادر گاؤں کا رہنے والا ہے۔ اس پر 15 لاکھ روپے کا انعام بھی مقرر ہے۔ وہ وادی میں ہونے والے کئی حملوں میں ملوث رہا ہے۔ یہ دہشت گرد 11 نومبر کو مرکزی ریزرو پولیس فورس (سی آر پی ایف) کی ایک چوکی پر ہونے والے حملے میں بھی شامل تھا۔

ٹی آر ایف کے ذریعے حملے کرنے کا الزام

واضح رہے کہ لشکر طیبہ اپنے پراکسی تنظیم ’دی ریزسٹنس فرنٹ‘ (ٹی آر ایف) کے نام سے حملے کرتا ہے۔ اسے پاکستان میں موجود اپنے آقاؤں سے ہدایات ملتی تھیں۔ بتایا جاتا ہے کہ پاکستان کی خفیہ ایجنسی آئی ایس آئی، لطیف بھٹ کی مدد سے کشمیر میں اپنا مقامی نیٹ ورک مزید مضبوط کرنا چاہتی تھی۔

بھارت ایکسپریس۔



بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔

Also Read