سابق ہندوستانی کرکٹر وریندر سہواگ کے بیٹے آریہ ویر سہواگ نے جب سے ہندوستانی انڈر 19 ٹیم میں جگہ بنائی ہے، تب سے ہی شائقین ان کی صلاحیتیں دیکھنے کے منتظر تھے۔ آسٹریلیا کے خلاف یوتھ ون ڈے سیریز میں آریہ ویر نے اپنی بیٹنگ کی کچھ جھلک بھی دکھائی تھی، لیکن وہ کتنے قابل بلے باز ہیں، اس کا حقیقی مظاہرہ انہوں نے انڈر 19 ایشیا کپ 2026 میں کیا۔ اپنے جارحانہ مزاج بلے باز والد کے نقشِ قدم پر چلتے ہوئے آریہ ویر نے ٹورنامنٹ میں سب سے زیادہ رنز بنانے کا ریکارڈ قائم کرکے تاریخ رقم کر دی۔
فائنل میں نصف سنچری اور نیا ریکارڈ
عمان میں منعقدہ انڈر 19 ایشیا کپ 2026 میں آریہ ویر سہواگ سے کافی توقعات وابستہ تھیں اور انہوں نے کسی کو مایوس نہیں کیا۔ اپنے والد کی طرح اننگز کا آغاز کرنے کی ذمہ داری سنبھالنے والے آریہ ویر نے ٹورنامنٹ کے تقریباً ہر میچ میں شاندار بلے بازی کی۔ خاص طور پر پاکستان کے خلاف فائنل میں اس نوجوان بلے باز نے زبردست نصف سنچری بنا کر ہندوستانی ٹیم کو اچھی شروعات دلائی۔ اسی دوران انہوں نے سب سے زیادہ رنز بنانے کا ریکارڈ بھی اپنے نام کر لیا۔ 14 نومبر، ہفتہ کو کھیلے گئے فائنل میں آریہ ویر نے 58 رنز کی شاندار اننگز کھیلی۔ اس کے ساتھ ہی انہوں نے انڈر 19 ایشیا کپ کے ایک ایڈیشن میں سب سے زیادہ رنز بنانے کا ریکارڈ قائم کر دیا۔ آریہ ویر نے اس ٹورنامنٹ میں محض 5 اننگز میں 361 رنز بنائے، جو ایک نیا ریکارڈ ہے۔ اس دوران انہوں نے ایک سنچری اور 3 نصف سنچریاں اسکور کیں۔ یعنی 5 میں سے 4 اننگز میں وہ 50 رنز کا ہندسہ عبور کرنے میں کامیاب رہے۔ ان کا اوسط 90.25 اور اسٹرائیک ریٹ 95.50 رہا۔ اپنے والد کی طرح آریہ ویر نے بھی خوب چوکے اور چھکے لگائے۔ انہوں نے ٹورنامنٹ میں 38 چوکے اور 16 چھکے جڑے۔
پاکستانی بلے بازوں سے چھینا ریکارڈ
اس سے پہلے یہ ریکارڈ پاکستان کے سمیر منہاس کے نام تھا، جنہوں نے گزشتہ ایشیا کپ میں 294 رنز بنائے تھے۔ آریہ ویر نے سیمی فائنل میں ہی ان کا ریکارڈ توڑ دیا تھا، لیکن اس کے بعد فائنل میں پاکستان کے عثمان خان نے سنچری بنا کر آریہ ویر کو پیچھے چھوڑ دیا اور ریکارڈ اپنے نام کر لیا تھا۔ عثمان خان کے 5 اننگز میں 345 رنز ہو گئے تھے، لیکن فائنل میں ایک بار پھر آریہ ویر کا شاندار کھیل دیکھنے کو ملا۔ انہوں نے 58 رنز کی اننگز کھیل کر عثمان خان کو بھی پیچھے چھوڑ دیا اور انڈر 19 ایشیا کپ کی تاریخ میں ایک نیا ریکارڈ قائم کر دیا۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
