نئی دہلی : صدر جمہوریہ دروپدی مرمو نے ہفتہ کو سردار ولبھ بھائی پٹیل کی 151ویں یوم پیدائش کے موقع پر نئی دہلی کے پٹیل چوک میں ان کے مجسمے پر گلہائے عقیدت پیش کرکے خراج عقیدت ادا کیا۔اس موقع پر نائب صدر سی پی رادھا کرشنن، مرکزی وزیر داخلہ امت شاہ، دہلی کے لیفٹیننٹ گورنر ترنجیت سنگھ سندھو اور دہلی کی وزیر اعلیٰ ریکھا گپتا نے بھی سردار پٹیل کے مجسمے پر پھول چڑھائے۔ لوک سبھا کی رکن پارلیمنٹ بانسری سوراج بھی اس موقع پر موجود رہیں اور انہوں نے بھی خراج عقیدت پیش کیا۔
پٹیل چوک کی کیا ہے اہمیت؟
پٹیل چوک نئی دہلی کے اہم اور انتظامی اعتبار سے مصروف ترین علاقوں میں شمار ہوتا ہے۔ اس کا نام ہندوستان کے پہلے نائب وزیر اعظم اور وزیر داخلہ سردار ولبھ بھائی پٹیل کے نام پر رکھا گیا ہے۔ یہ نئی دہلی کے وسطی علاقے میں واقع ہے، جہاں کئی اہم سرکاری دفاتر، وزارتیں اور ادارے موجود ہیں۔
31 اکتوبر کو منایا جاتا ہے قومی اتحاد کا دن
سردار ولبھ بھائی پٹیل کی پیدائش 31 اکتوبر 1875 کو گجرات کے نڈیاڈ میں ہوئی تھی۔ وہ ہندوستان کے اہم مجاہد آزادی، وکیل اور سیاست داں تھے۔ انہیں ملک کے پہلے نائب وزیر اعظم اور وزیر داخلہ کے طور پر جانا جاتا ہے۔حکومت ہند نے 2014 میں سردار ولبھ بھائی پٹیل کی یوم پیدائش یعنی 31 اکتوبر کو ’قومی اتحاد کے دن‘ کے طور پر منانے کا آغاز کیا تھا۔ تب سے ہر سال 31 اکتوبر کو یہ دن منایا جاتا ہے۔ اس کا مقصد ملک کی یکجہتی، سالمیت اور سلامتی کو مضبوط بنانے کا پیغام دینا ہے۔اس دن ملک بھر میں ’رن فار یونٹی‘ اور اتحاد مارچ سمیت مختلف خصوصی پروگرام منعقد کیے جاتے ہیں۔ خاص بات یہ ہے کہ اس مرتبہ ایکتا نگر میں ’رن فار یونٹی‘ کا انعقاد شام کے وقت کیا جا رہا ہے۔ وزیر اعظم نریندر مودی نے جمعہ کو بناس کانٹھا میں ایک پروگرام کے دوران اس کی اطلاع دی تھی اور نوجوانوں سے بڑی تعداد میں اس میں شرکت کرنے کی اپیل بھی کی تھی۔
500 سے زائد شاہی ریاستوں کو ہندوستان میں ملانے میں اہم کردار
آزادی کے بعد 500 سے زائد شاہی ریاستوں کو ہندوستانی یونین میں شامل کرکے ملک کے سیاسی اتحاد کو یقینی بنانے میں سردار ولبھ بھائی پٹیل نے اہم ترین کردار ادا کیا تھا۔ اسی وجہ سے انہیں ’آہنی مرد‘ اور ہندوستان کے اتحاد کا معمار کہا جاتا ہے۔سردار ولبھ بھائی پٹیل کا انتقال 15 دسمبر 1950 کو ہوا تھا۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
