Major Fire in Delhi’s Mangolpuri: دہلی کے منگول پوری میں خوفناک آتشزدگی، 4 افراد کی موت، متعد افراد زخمی

نئی دہلی : دہلی کے منگول پوری صنعتی علاقے میں جمعہ کی رات اس وقت افراتفری مچ گئی، جب یہاں ایک جوتا فیکٹری میں بھیانک آگ لگ گئی۔ اس حادثے میں اب تک 4 افراد کی موت کی اطلاع ہے، جب کہ کئی افراد زخمی ہوئے ہیں۔ زخمیوں کو سنجے گاندھی میموریل اسپتال میں داخل کرایا گیا ہے۔آگ لگنے کی اطلاع ملتے ہی فائر بریگیڈ کی 20 گاڑیاں اور پولیس کی ٹیمیں موقع پر پہنچ گئیں اور راحت و بچاؤ کا کام شروع کر دیا۔ پولیس کے مطابق 6 افراد کو بے ہوشی کی حالت میں باہر نکالا گیا ہے۔ فی الحال آگ لگنے کی وجوہات کی جانچ کی جا رہی ہے۔

فیکٹری کے بیسمنٹ میں لگی آگ

فائر بریگیڈ حکام کے مطابق جمعہ کی رات تقریباً 9:30 بجے آگ لگنے کی اطلاع ملی تھی۔ اس کے بعد فائر بریگیڈ کی ٹیموں نے فوری کارروائی کرتے ہوئے آگ پر بیسمنٹ میں ہی قابو پا لیا، لیکن اس کا دھواں اوپر کی 4 منزلوں تک پھیل گیا تھا، جس کی وجہ سے راحت اور بچاؤ کے کام میں دشواری پیش آئی۔فیکٹری کی تیسری اور چوتھی منزل پر موجود لوگوں کو بحفاظت باہر نکالا گیا۔ ان میں سے کئی افراد بے ہوشی کی حالت میں تھے، جنہیں فوری طور پر اسپتال پہنچایا گیا۔ اس حادثے میں اب تک 4 افراد کی موت ہو چکی ہے۔

یہ بھی پڑھیں: اگلے 8 گھنٹوں میں 17 ریاستوں میں طوفان اور موسلادھار بارش کا الرٹ، 70 کلومیٹر فی گھنٹہ کی رفتار سے چلیں گی ہوائیں

فیکٹری مالک سے ہوگی پوچھ گچھ

ڈی سی پی وکرم سنگھ نے بتایا کہ فی الحال آگ لگنے کی اصل وجہ معلوم نہیں ہو سکی ہے۔ فیکٹری مالک کو موقع پر بلایا گیا ہے، جبکہ ٹھیکیدار اور ملازمین سے بھی پوچھ گچھ کی جا رہی ہے۔ ابھی یہ بھی واضح نہیں ہو سکا ہے کہ حادثے کے وقت فیکٹری میں کتنے مزدور موجود تھے۔انہوں نے بتایا کہ آگ بیسمنٹ سے اوپر کی منزلوں تک پھیل گئی تھی اور دھواں بھر جانے کی وجہ سے کئی افراد بے ہوش ہو گئے۔ آگ لگنے کی وجوہات کی جانچ جاری ہے۔ فی الحال آگ پر قابو پا لیا گیا ہے، جس کے بعد تلاشی مہم چلائی جا رہی ہے تاکہ یہ معلوم کیا جا سکے کہ کہیں کوئی شخص عمارت کے اندر پھنسا تو نہیں ہے۔دوسری جانب جوتا فیکٹری میں آگ لگنے کی خبر سے آدھی رات تک علاقے میں ہنگامہ برپا رہا۔ جائے حادثہ پر بڑی تعداد میں لوگ جمع ہو گئے اور راحت و بچاؤ کے کام کے دوران افراتفری کا ماحول بنا رہا۔

بھارت ایکسپریس اردو