نئی دہلی :نیوزی لینڈ کے خلاف منگل، 27 اکتوبر کو ہونے والے تیسرے ٹی 20 مقابلے سے پہلے ہندوستانی ٹیم کو بڑا جھٹکا لگا ہے۔ چوٹ کی وجہ سے دوسرا ٹی 20 میچ نہیں کھیل پانے والے ایشان کشن تیسرے مقابلے سے بھی باہر ہوگئے ہیں۔ ہندوستانی کرکٹ کنٹرول بورڈ (بی سی سی آئی) نے اس کی تصدیق کی ہے۔بی سی سی آئی نے سوشل میڈیا پلیٹ فارم ’ایکس‘ پر بتایا کہ ایشان کشن اپنی دائیں ران میں معمولی چوٹ سے تیزی سے صحت یاب ہو رہے ہیں۔ انہیں نیوزی لینڈ کے خلاف سیریز کے پہلے ٹی 20 بین الاقوامی میچ کے دوران یہ چوٹ لگی تھی۔ تاہم، وہ ابھی میچ کھیلنے کے لیے پوری طرح فٹ نہیں ہوئے ہیں، اسی لیے 27 اکتوبر 2026 کو ویلنگٹن میں ہونے والے تیسرے ٹی 20 میچ میں حصہ نہیں لے سکیں گے۔بورڈ کے مطابق، ایشان کشن کی صحت یابی پر بی سی سی آئی کی طبی ٹیم مسلسل نظر رکھ رہی ہے۔ وہیں، کمار کشاگرا تیسرے ٹی 20 میچ کے لیے بھی ٹیم کے ساتھ برقرار رہیں گے۔
دوسرے ٹی 20 میں ایشان کی جگہ ویبھَو سوریہ ونشی کو ملا تھا موقع
قابل ذکر ہے کہ ایشان کشن کی جگہ دوسرے ٹی 20 میچ میں ویبھَو سوریہ ونشی کو پلیئنگ الیون میں شامل کیا گیا تھا۔ انہیں تیسرے نمبر پر بلے بازی کے لیے اتارا گیا، لیکن وہ اپنی کارکردگی سے متاثر نہیں کر سکے۔ ویبھَو 8 گیندوں پر صرف 4 رن بنا کر آؤٹ ہوگئے تھے۔ایشان کشن کی غیر موجودگی میں امکان ہے کہ 15 سالہ ویبھَو سوریہ ونشی کو تیسرے ٹی 20 میچ میں بھی پلیئنگ الیون میں موقع دیا جائے۔ حتمی ٹیم کا فیصلہ میچ سے پہلے کیا جائے گا۔
دوسرے ٹی 20 میں ہندوستان نے 6 وکٹوں سے حاصل کی تھی جیت
نیوزی لینڈ کے خلاف دوسرے ٹی 20 میچ میں ہندوستانی ٹیم کی کارکردگی شاندار رہی تھی۔ نیوزی لینڈ کی جانب سے دیے گئے 181 رن کے ہدف کو ہندوستان نے 6 وکٹوں کے نقصان پر ایک گیند باقی رہتے ہوئے حاصل کر لیا تھا۔ہندوستان کی جانب سے تلک ورما نے بہترین بلے بازی کرتے ہوئے صرف 26 گیندوں پر 51 رن کی جارحانہ اننگز کھیلی اور ٹیم کی جیت میں اہم کردار ادا کیا۔ وہیں، نمن دھیر نے 17 گیندوں پر 31 رن بنائے، جبکہ نتیش کمار ریڈی نے 13 گیندوں پر ناٹ آؤٹ 26 رن بنا کر ٹیم کو کامیابی دلانے میں اہم کردار ادا کیا۔پانچ میچوں کی اس ٹی 20 سیریز میں ہندوستانی ٹیم فی الحال 2-0 سے آگے ہے۔ ایسے میں تیسرے مقابلے میں بھی ٹیم انڈیا کی نظریں جیت حاصل کرکے سیریز میں اپنی برتری مزید مضبوط کرنے پر ہوں گی۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
