نئی دہلی: القاضی اردو اکیڈمی اینڈ کوچنگ ٹرسٹ کی بانی و صدر ایڈوکیٹ شاہ جبین قاضی کو اردو زبان کے فروغ کے لیے خصوصی تعاون پر بھارت ایکسپریس نیوز نیٹ ورک کی جانب سے خصوصی اعزاز سے نوازا گیا۔ نئی دہلی کے انڈیا انٹرنیشنل سینٹر میں قومی کونسل برائے فروغ اردو زبان (این سی پی یو ایل) کے اشتراک سے منعقدہ ’بزم صحافت‘ میں سہارنپور کے رکن پارلیمنٹ اور کانگریس کے سینئر لیڈر عمران مسعود، بی جے پی کے سینئر لیڈر اور ترجمان آلوک وَتس اور بھارت ایکسپریس اردو کے ایڈیٹر ڈاکٹر خالد رضاخان کے ہاتھوں ایڈوکیٹ شاہ جبین قاضی کو مومنٹو پیش کرکے ان کی خدمات کو سراہا گیا۔ اس موقع پر اردو صحافت، ادب، سیاست اور سماجی شعبے سے وابستہ متعدد اہم شخصیات موجود تھیں۔
ایڈوکیٹ شاہ جبین قاضی کا اظہار تشکر
اعزاز سے نوازے جانے پر ایڈوکیٹ شاہ جبین قاضی نے بھارت ایکسپریس نیوز نیٹ ورک کا شکریہ ادا کرتے ہوئے کہا کہ یہ اعزاز ان کے لیے حوصلہ افزا ہے۔ انہوں نے کہا کہ اردو زبان، ادب اور تعلیم کے فروغ کے لیے کام کرنا ان کے لیے اعزاز کی بات ہے۔ بزم صحافت اردو کانکلیو جیسے باوقار پروگرام میں ان کی خدمات کا اعتراف اور حوصلہ افزائی اس عزم کو مزید تقویت دیتی ہے کہ وہ اردو زبان اور نئی نسل کی تعلیمی و ادبی تربیت کے لیے اپنی کوششیں جاری رکھیں گی۔ انہوں نے بھارت ایکسپریس نیوز نیٹ ورک اور کانکلیو کی پوری ٹیم کو کامیاب انعقاد پر مبارک باد بھی پیش کی۔ آپ کو بتادیں کہ ایڈوکیٹ شاہ جبین قاضی اردو زبان کے فروغ کے لیے مختلف سطح پر کام کررہی ہیں۔ غریب بچوں کو تعلیم دلانا، اس کا بندوبست کرنا اور ان کی ضروریات کو پورا کرنا اپنا نصب العین سمجھتی ہیں۔ دہلی، مغربی یوپی اور ہریانہ کے میوات جیسے علاقوں میں تعلیمی بیداری پیدا کرنے کے لیے سرگرم رہتی ہیں۔ ساتھ ہی اردو سے متعلق تمام پروگراموں میں بڑھ چڑھ کر حصہ لیتی ہیں۔
’بزم صحافت‘ کے تحت ’اردوصحافت کانکلیو‘
قابل ذکر ہے کہ ’بزم صحافت‘ کے تحت ’اردوصحافت کانکلیو‘میں اردو زبان و صحافت کی موجودہ صورت حال، اس کے تاریخی کردار، قومی تعمیر میں اردو صحافت کی خدمات اور سیاسی مکالمے میں اردو کے کردار سمیت مختلف اہم موضوعات پر تفصیلی گفتگو ہوئی۔ کانکلیو کے افتتاحی اجلاس میں مرکزی وزیر برائے اقلیتی و پارلیمانی امور کرن رجیجو نے بحیثیت مہمان خصوصی شرکت کی۔ سابق مرکزی وزیر سید شاہنواز حسین، سابق رکن راجیہ سبھا و سینئر صحافی شاہد صدیقی اور این سی ایم ای آئی کے کارگزار چیئرمین پروفیسر (ڈاکٹر) شاہد اختر مہمانان اعزازی رہے۔ بھارت ایکسپریس نیوز نیٹ ورک کے ڈائریکٹر اینڈ گروپ مینیجنگ ایڈیٹر رادھے شیام رائے نے کلیدی خطبہ پیش کیا جبکہ قومی کونسل برائے فروغ اردو زبان کے ڈائریکٹر ڈاکٹر محمد شمس اقبال نے تعارفی کلمات ادا کیے۔ بھارت ایکسپریس اردو کے ایڈیٹر ڈاکٹر خالد رضا خان نے استقبالیہ کلمات پیش کیے اور بھارت ایکسپریس اردو کے چیف سب ایڈیٹر ڈاکٹر نثار احمد خان نے نظامت کے فرائض انجام دیے۔ افتتاحی اجلاس کے بعد این سی پی یو ایل کی تاریخ اور کارگزاریوں پر بھارت ایکسپریس اردو کی جانب سے تیار کی گئی ڈاکیومنٹری پیش کی گئی، جس کے بعد پینل ڈسکشن ہوا۔ دوسرے سیشن میں ’قومی تعمیر میں اردو صحافت کا کردار‘ جبکہ تیسرے سیشن میں ’سیاسی مکالمے میں اردو کا کردار‘ کے موضوعات پر ماہرین اور صحافیوں نے اظہار خیال کیا۔ کانکلیو کے آخری سیشن میں اردو اکادمی، دہلی کے اشتراک سے آل انڈیا مشاعرہ و کوی سمیلن کا شاندار انعقاد ہوا، جس میں ملک کے معروف شعرائے کرام نے اپنے کلام سے سامعین کو محظوظ کیا۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
