وزیراعظم نریندر مودی نے پیر کے روز نکسل ازم کے خلاف جنگ میں پولیس اور سی آر پی ایف سمیت سکیورٹی فورسز کی کامیابیوں کی ستائش کرتے ہوئے کہا کہ ہندوستان ماؤنوازوں کی دہشت سے تقریباً مکمل طور پر آزاد ہونے کے قریب پر ہے۔ وزیراعظم مودی نے یہ بات آئی این ایس وکرانت (ملکی ساختہ طیارہ بردار جنگی بحری جہاز) پر دیوالی کے موقع پر بحریہ کے اہلکاروں سے خطاب کے دوران کہی۔
125 اضلاع میں سے صرف 11 باقی، اثر صرف تین میں محدود
وزیر اعظم نے کہا: ’’آج ملک نکسلیوں اور ماؤنوازوں کی دہشت سے آزادی کے قریب ہے۔ 2014 سے پہلے ملک کے تقریباً 125 اضلاع نکسل ازم سے متاثر تھے۔ دس برسوں کی مسلسل کوششوں کے نتیجے میں یہ تعداد بہت کم ہو گئی ہے۔ اب 125 میں سے صرف 11 اضلاع ایسے ہیں جہاں ماؤنوازوں کا اثر باقی ہے اور ان میں بھی صرف 3 اضلاع تک ان کا اثرمحدود ہوگیا ہے۔ پہلی مرتبہ 100 سے زیادہ اضلاع مکمل طور پر ماؤنوازوں کی دہشت سے آزاد ہو کر سکون کی سانس لے رہے ہیں۔‘‘
لوگ خوف سے نکل کر ترقی کی راہ پر ہورہے ہیں گامزن
وزیراعظم مودی نے کہا کہ آج وہ علاقے جہاں کبھی نکسلی باغی اسکولوں، اسپتالوں اور سڑکوں کی تعمیر روک دیتے تھے، وہاں اب ترقی کے نئے دروازے کھل رہے ہیں۔ ’’آج وہ علاقے جہاں کبھی نکسلی سڑکیں بند کرتے تھے، اسکولوں کو جلایا جاتا تھا، اسپتالوں پر حملے ہوتے تھے اب وہاں شاہراہیں بن رہی ہیں، نئی صنعتیں قائم ہو رہی ہیں، اسکول اور اسپتال مقامی بچوں کے مستقبل کو سنوار رہے ہیں۔ عوام پہلی بار خوف اور جبر سے نکل کر ترقی کے دھارے میں شامل ہو رہے ہیں۔‘‘
سکیورٹی فورسز کی قربانیوں کو خراج عقیدت
وزیراعظم نے نکسل ازم کے خلاف لڑنے والے پولیس اور نیم فوجی جوانوں کی بہادری کو خراج تحسین پیش کرتے ہوئے کہا: ’’بحریہ کے جوانوں کے لیے موت کے سائے میں چلنا عام بات ہے، مگر ہمارے پولیس اہلکار جن کے ہاتھوں میں محض لاٹھی ہوتی ہے، وسائل محدود ہوتے ہیں اور جنہیں شہریوں کے درمیان ہم آہنگی سے کام کرنے کی تربیت دی جاتی ہے ان کی بہادری قابل تعریف ہے۔ بی ایس ایف اور سی آر پی ایف کے ان سپاہیوں نے نکسلیوں کے خلاف جو جدوجہد کی ہے وہ غیر معمولی ہے۔ دیوالی کے اس مبارک موقع پر میں ان پولیس جوانوں کو لاکھوں سلام پیش کرتا ہوں۔‘‘ انہوں نے مزید کہا: ’’میں ایسے کئی بہادر جوانوں کو جانتا ہوں جنہوں نے اپنے پیر یا ہاتھ کھو دیے مگر حوصلہ نہیں ہارا۔ وہ اپنے فرض کے لیے تن من دھن سے وقف ہیں۔ آزادی کے بعد پہلی بار پولیس فورس کو اتنا بڑا چیلنج درپیش ہوا اور پچھلے دس برسوں میں انہوں نے پچاس سال پرانی اس لعنت کو ختم کرنے کے لیے شاندار کام کیا ہے۔ مجھے یقین ہے کہ وہ مکمل کامیابی حاصل کریں گے کیونکہ 90 فیصد مقامات پر وہ پہلے ہی کامیاب ہو چکے ہیں۔‘‘
دیوالی فوج کے ساتھ منانے کی روایت برقرار
وزیراعظم مودی نے مسلح افواج کو اپنا ’’خاندان‘‘ قرار دیتے ہوئے کہا کہ انہوں نے گزشتہ گیارہ برسوں سے ہر سال دیوالی ملک کی افواج کے ساتھ منانے کی روایت برقرار رکھی ہے۔ انہوں نے کہا ’’میری مسلح افواج میرا خاندان ہیں۔ میں ان کے ساتھ دیوالی مناتا ہوں کیونکہ یہ وہ لوگ ہیں جو اپنی جان خطرے میں ڈال کر ہمارے ملک کی حفاظت کرتے ہیں۔ ان کی قربانی ہی ملک کی اصل روشنی ہے۔‘‘
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
