نئی دہلی: مالیگاؤں بم دھماکہ کیس میں قومی تحقیقاتی ایجنسی (NIA) کی خصوصی عدالت نے سادھوی پرگیہ سنگھ ٹھاکر سمیت تمام 7 ملزمین کو بری کر دیا۔ عدالت نے واضح کیا کہ سرکاری فریق یہ ثابت نہیں کر سکا کہ بم موٹر سائیکل میں نصب تھا یا اسے کسی مخصوص شخص نے لگایا تھا۔ یہ فیصلہ 17 سال کی عدالتی کارروائی کے بعد سامنے آیا ہے، جس میں استغاثہ ثبوتوں کے فقدان کے سبب ملزمان کو سزا دلوانے میں ناکام رہا۔
کانگریس کا سخت ردعمل
اس فیصلے پر کانگریس رہنما عمران پرتاپ گڑھی نے سخت تنقید کرتے ہوئے کہا کہ ’’یہ فیصلہ ہے، انصاف نہیں۔ کانگریس کا موقف شروع سے یہی رہا ہے کہ مذہب کا دہشت گردی سے کوئی تعلق نہیں۔ اس اصطلاح کو اس وقت کے ہوم سکریٹری آر کے سنگھ نے گھڑا تھا، جنہیں بی جے پی نے بعد میں اپنا وزیر اور ایم پی بنایا۔ بی جے پی نے ان افراد کو کبھی بھی اصل ملزم تسلیم نہیں کیا۔‘‘
#WATCH | Delhi: On NIA court acquitting all the accused in the Malegaon Blast case, Congress MP Imran Pratapgarhi says, “The Congress party has been saying from the first day that religion is not associated with terrorism. This term was coined by the then Home Secretary RK Singh.… pic.twitter.com/MCQb3b7vfX
— ANI (@ANI) July 31, 2025
اے ٹی ایس اور این آئی اے کی چارج شیٹ میں تضاد: عدالت
خصوصی عدالت کے مطابق انسداد دہشت گردی اسکواڈ (ATS) اور این آئی اے کی چارج شیٹ میں شدید تضاد پایا گیا۔ بم دھماکے کے بعد موقع پر موجود ماہرین نے ثبوت جمع نہیں کیے، جس سے ثبوتوں میں گڑبڑی ہوئی۔ عدالت نے کہا کہ یہ ثابت نہیں ہو سکا کہ بم موٹر سائیکل میں رکھا گیا تھا۔ کرنل پرساد پروہت کے خلاف کوئی ثبوت نہیں ملا کہ انہوں نے بم تیار کیا یا سپلائی کیا۔ موٹر سائیکل کی ملکیت سادھوی پرگیہ کے نام پر تھی، یہ بھی ثابت نہیں ہوا۔ عدالت نے مزید نشاندہی کی کہ پولیس کی ابتدائی تفتیش میں کئی خامیاں تھیں۔ پنچنامہ درست طریقے سے نہیں ہوا، فنگر پرنٹس اکٹھا نہیں کیے گئے، اور چیسس نمبر بھی برآمد نہیں ہوا۔ ان تمام نکات کی بنیاد پر عدالت نے ملزمان کو شک کا فائدہ دیتے ہوئے بری کر دیا۔
مالیگاؤں دھماکہ 2008
29 ستمبر 2008 کو مہاراشٹر کے مالیگاؤں شہر میں ایک بم دھماکہ ہوا تھا، جس میں6 افراد جاں بحق اور 100 سے زائد زخمی ہوئے تھے۔ یہ دھماکہ اس وقت پیش آیا جب لوگ نماز کے لیے مسجد کی جانب جا رہے تھے۔ واقعے کے اگلے دن آزاد نگر تھانے میں ایف آئی آر درج کی گئی اور تفتیش کا آغاز ہوا۔ مالیگاؤں بم دھماکہ کیس کا یہ فیصلہ نہ صرف عدالتی نظام پر سوال اٹھاتا ہے بلکہ ملک میں دہشت گردی کی تحقیقات میں پیشہ ورانہ خامیوں کو بھی اجاگر کرتا ہے۔ متاثرین کے لیے انصاف کا حصول بدستور ایک نامکمل خواب بن کر رہ گیا ہے، جبکہ عدالت نے صرف قانونی شواہد کی غیر موجودگی کی بنیاد پر فیصلہ دیا ہے۔
بھارت ایکسپریس اردو۔
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
