قومی تحقیقاتی ایجنسی (این آئی اے) نے ممبئی ہوائی اڈے سے مبینہ طور پر دہشت گرد تنظیم آئی ایس آئی ایس کے سلیپر سیل کے دو مفرور افراد کو گرفتار کیا ہے۔ اے این آئی کی خبر کے مطابق یہ دونوں 2023 کے ایک کیس میں بھی نامزد ہیں۔ گرفتار ملزمان کی شناخت عبداللہ فیاض شیخ عرف ڈائپر والا اور طلحہ خان کے نام سے ہوئی ہے۔
ان دونوں کو بیورو آف امیگریشن نے گزشتہ رات ممبئی کے بین الاقوامی ہوائی اڈے کے ٹرمینل 2 پر اس وقت روکا، جب انھوں نے جکارتہ، انڈونیشیا سے ہندوستان واپس آنے کی کوشش کی، جہاں وہ چھپے ہوئے تھے۔ اس کے بعد این آئی اے کی ٹیم نے انھیں اپنی تحویل میں لے کر گرفتار کر لیا۔
حکام کے مطابق دونوں ملزمان دو سال سے زیادہ عرصے سے فرار تھے اور این آئی اے کی خصوصی عدالت، ممبئی کی طرف سے ان کے خلاف غیر ضمانتی وارنٹ بھی جاری کیے گئے تھے۔ عہدیداروں نے کہا ’’این آئی اے نے دونوں ملزمان کے بارے میں معلومات دینے کے لیے 3 لاکھ روپے کے نقد انعام کا بھی اعلان کیا تھا۔‘‘
گرفتار ملزمان کا تعلق آئی ایس آئی ایس سے ہے: این آئی اے
تحقیقاتی ایجنسی کے مطابق دونوں ملزمان نے تشدد اور دہشت گردی کے ذریعے ملک میں اسلامی حکمرانی قائم کرنے کے لیے آئی ایس آئی ایس کے ایجنڈے کو آگے بڑھانے اور حکومت ہند کے خلاف جنگ چھیڑ کر ہندوستان کے امن اور فرقہ وارانہ ہم آہنگی کو خراب کرنے کے مقصد سے دہشت گردانہ کارروائیاں کرنے کی سازش کی تھی۔ ایجنسی کے بیان میں مزید کہا گیا ہے کہ 2022-2023 کی مدت کے دوران انھوں نے بم بنانے کی تربیتی ورکشاپ کا اہتمام کیا تھا اور اس میں حصہ لیا تھا۔ اس کے علاوہ اپنے احاطے میں اپنے بنائے گئے آئی ای ڈی بم کی جانچ کرنے کے لیے ایک ٹیسٹ دھماکہ بھی کیا تھا۔
واضح رہے کہ این آئی اے ہندوستان میں آئی ایس آئی ایس کی سرگرمیوں کی روک تھام کے لیے مستعدی سے تحقیقات کر رہی ہے۔ تفتیشی ایجنسی نے بتایا کہ عبداللہ فیاض شیخ اور طلحہ خان کے علاوہ اس کیس میں گرفتار دیگر افراد کی شناخت محمد عمران خان، محمد یونس ساکی، عبدالقادر پٹھان، سیماب ناصر الدین قاضی، ذوالفقار علی بڑودا والا، شمل ناچن، عاکف ناچن اور شاہنواز عالم کے طور پر کی گئی ہے۔
بھارت ایکسپریس اردو
بھارت ایکسپریس اردو، ہندوستان میں اردوکی بڑی نیوزویب سائٹس میں سے ایک ہے۔ آپ قومی، بین الاقوامی، علاقائی، اسپورٹس اور انٹرٹینمنٹ سے متعلق تازہ ترین خبروں اورعمدہ مواد کے لئے ہماری ویب سائٹ دیکھ سکتے ہیں۔ ویب سائٹ کی تمام خبریں فیس بک اورایکس (ٹوئٹر) پربھی شیئر کی جاتی ہیں۔ برائے مہربانی فیس بک (bharatexpressurdu@) اورایکس (bharatxpresurdu@) پرہمیں فالواورلائک کریں۔ بھارت ایکسپریس اردو یوٹیوب پربھی موجود ہے۔ آپ ہمارا یوٹیوب چینل (bharatexpressurdu@) سبسکرائب، لائک اور شیئر کرسکتے ہیں۔
