عام آدمی پارٹی (اے اے پی) کے قومی کنوینر اروند کجریوال نےآج اسمبلی انتخابات کے لیے نئی دہلی حلقہ سے اپنا پرچہ نامزدگی داخل کیاہے۔ انہوں نے عوام سے اپیل کی کہ وہ کام کی بنیاد پر ووٹ دیں۔ انہوں نے لوگوں پر زور دیا کہ وہ ‘گالی’ کی بنیاد پر نہیں بلکہ کام کی بنیاد پر ووٹ دیں۔کاغذات نامزدگی داخل کرنے سے پہلے، کجریوال نے اپنی اہلیہ سنیتا کے ساتھ صبح ہنومان مندر اور والمیکی مندر میں پوجا کی اور پھر پارٹی کے دفتر سے نئی دہلی ڈسٹرکٹ مجسٹریٹ کے دفتر تک پیدل مارچ کیا۔عام آدمی پارٹی کے سینکڑوں کارکنان سابق وزیر اعلیٰ کے ساتھ ہاتھوں میں پارٹی پرچم لے کر مارچ میں شامل ہوئے۔
दिल्ली की अपनी माताओं और बहनों के साथ, आज नई दिल्ली से नामांकन भरने जा रहा हूँ। https://t.co/hccjug3bDf
— Arvind Kejriwal (@ArvindKejriwal) January 15, 2025
نئی دہلی ڈسٹرکٹ مجسٹریٹ کے دفتر میں اپنا نامزدگی داخل کرنے کے بعد، کجریوال نے یقین ظاہر کیا کہ عام آدمی پارٹی ایک بار پھر دہلی میں اقتدار میں آئے گی۔ انہوں نے نامہ نگاروں سے کہا کہ عام آدمی پارٹی اکثریت کے ساتھ حکومت بنائے گی، میں دہلی کے لوگوں سے درخواست کرنا چاہتا ہوں کہ وہ گالیوں کی بنیاد پر نہیں بلکہ کام کی بنیاد پر ووٹ دیں۔بھارتیہ جنتا پارٹی پر حملہ کرتے ہوئے، کجریوال نے کہا کہ پارٹی کے پاس کوئی ویژن، کوئی وزیر اعلیٰ کا چہرہ نہیں ہے۔ وہ یہ نہیں بتا رہے ہیں کہ وہ اگلے پانچ سالوں میں کیا کریں گے۔ دہلی کے لوگوں کو جوتوں کے جوڑے سے نہیں خریدا جا سکتا، لوگ دیکھ رہے ہیں کہ بی جے پی کیا کر رہی ہے۔
خالصتان کی حامی تنظیم کی جانب سے اپنی جان کو خطرے کی اطلاعات پر، انہوں نے کہا کہ بھگوان ان کے ساتھ ہے۔ قدیم ہنومان مندر میں نماز ادا کرنے کے بعد انہوں نے صحافیوں سے کہاکہ جس کی حفاظت بھگوان کی طرف سے ہو اسے کوئی نقصان نہیں پہنچا سکتا۔بھگوان میرے ساتھ ہے۔ جب تک انسان کے پاس لائف لائن ہے وہ زندہ رہتا ہے۔ جس دن انسان کی لائف لائن ختم ہوتی ہے، بھگوان اسے بلاتا ہے۔وہیں سنیتا کجریوال نے کہا کہ دہلی کے لوگ جانتے ہیں کہ کون بہتر حکمرانی فراہم کرے گا۔ انہوں نے کہاکہ لوگ جانتے ہیں کہ کون قیادت کر سکتا ہے۔ اس لیے فیصلہ عوام کریں گے۔کجریوال، جو 2013 سے نئی دہلی اسمبلی سیٹ کی نمائندگی کر رہے ہیں، اس بار بھارتیہ جنتا پارٹی (بی جے پی) کے پرویش ورما اور کانگریس لیڈر سندیپ دکشت سے مقابلہ کر رہے ہیں۔
بھارت ایکسپریس۔
