نئی دہلی : جرمنی کے شہرفرینکفرٹ میں منعقدہ پچہترویں کتاب میلے میں قومی کونسل برائے فروغ اردو زبان، نئی دہلی نے بھی حصہ لیا ہے۔ یہ کتاب میلہ دنیا کے بڑے کتاب میلوں میں سے ایک ہے۔ اس کتاب میلے کی شناخت کتابوں کے کاپی رائٹ، تراجم اورپروڈکشن کے حوالے سے ہے۔ یہ کتاب میلہ 16 اکتوبر2024 کو شروع ہوا تھا اور20 اکتوبر2024 کواختتام پذیرہوگا۔ اس کتاب میلے میں دنیا کے 130 ممالک کے 17000 سے زائد ناشرین، مصنّفین اوربک ایجنٹس شرکت کررہے ہیں۔
محبان اردوقومی اردو کونسل کی کتابوں کی کررہے ہیں ستائش
ہندوستان کے 30 سے زائد سرکاری اورغیرسرکاری پبلشرزکے اسٹال یہاں موجود ہیں۔ قومی اردوکونسل کا اسٹال بھارت پویلین میں ہے۔ بھارت پویلین کا اہتام نیشنل بک ٹرسٹ، انڈیا نے کیا ہے۔ قومی اردوکونسل کے اسٹال پرتقریباً 150 کے قریب ٹائٹلس نمائش کے لئے موجود ہیں۔ قومی اردوکونسل کے اسٹال پراردواوردیگر زبانوں کے مصنّفین اورناشرین بڑی تعداد میں آرہے ہیں اورقومی اردوکونسل کی کتابوں کی ستائش کررہے ہیں۔ 17 اکتوبر2024 کوبھارت پویلین میں رام بہادر رائے جی کی کتاب آئین ہند: ’اَن کہی کہانی‘ کا اجرا بھی مشہورادیب عارف نقوی اورنیشنل بک ٹرسٹ، انڈیا کے چیئرمین پروفیسرملند سُدھاکرمراٹھے کے ہاتھوں عمل میں آیا۔ فرینکفرٹ کتاب میلے میں قومی اردوکونسل کی نمائندگی کے لئے اسسٹنٹ ڈائریکٹر(ایڈمن) محمد احمداورہیڈ بک پروموشن ابروڈ اجمل سعید موجود ہیں۔
ڈاکٹرشمس اقبال نے قومی کونسل کے اسٹاف کی کوشش کو سراہا
اس موقع پرخوشی کا اظہارکرتے ہوئے قومی اردوکونسل کے ڈائریکٹرڈاکٹرشمس اقبال نے کہا کہ قومی اردو کونسل کی فرینکفرٹ عالمی کتاب میلے میں شرکت محبانِ اردو کے لیے باعث صد افتخارہے۔ مجھے نہیں معلوم اس سے قبل کبھی کسی اردوادارے نے فرینکفرٹ کتاب میلے میں شرکت کی ہے۔ مجھے امید ہے کہ کونسل کی شرکت اردوکے لیے نیک فال ثابت ہوگی۔ قومی اردوکونسل یہاں کے عملہ اورذمے داران کی انتھک کوششوں اورلگن کی وجہ سے ترقی کی راہ پرگامزن ہے۔
بھارت ایکسپریس۔
